ଜାତିସଂଘ କର୍ମଚାରୀଙ୍କୁ ଶୀଘ୍ର ମୁକ୍ତ କରିବାକୁ ଆହ୍ୱାନ ଦେଲେ ବିଶ୍ୱ ସ୍ୱାସ୍ଥ୍ୟ ସଂଗଠନ ମୁଖ୍ୟ

ଡେସ୍କ: ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ)ର ମହାନିର୍ଦ୍ଦେଶକ ଟେଡ୍ରୋସ୍ ଆଧାନମ୍ ଗେବ୍ରେୟେସୁସ୍ କହିଛନ୍ତି ଯେ ୟେମେନର ରାଜଧାନୀ ସାନାରେ ହୂତି ଗୋଷ୍ଠୀ ଦ୍ୱାରା ଗିରଫ ହୋଇଥିବା ଜାତିସଂଘର ୧୩ ଜଣ କର୍ମଚାରୀଙ୍କୁ ମୁକ୍ତ କରିବା ନେଇ ଆଲୋଚନା ଶେଷ ହୋଇଛି। ସାମାଜିକ ଗଣମାଧ୍ୟମ ପୋଷ୍ଟରେ ଶ୍ରୀ ଗେବ୍ରେୟେସୁସ୍ କହିଛନ୍ତି ଯେ ବନ୍ଦୀଙ୍କୁ ତୁରନ୍ତ ମୁକ୍ତ କରିବା ପାଇଁ ହୁ ଦାବି ଜାରି ରଖିଛି। ଜାତିସଂଘ ଜୁନ୍ ମାସରେ ନିଶ୍ଚିତ କରିଥିଲା ଯେ ଏହାର ୧୩ ଜଣ କର୍ମଚାରୀଙ୍କୁ ସାନାରେ ହୁତିମାନେ ଅଟକ ରଖିଛନ୍ତି।

ଅନ୍ୟପକ୍ଷରେ ଶ୍ରୀ ଗେବ୍ରେୟେସୁସ୍ କହିଛନ୍ତି ଯେ ୟେମେନର ରାଜଧାନୀ ସାନାରୁ ସେ ଏବଂ ଅନ୍ୟ କେତେକ ଜାତିସଂଘ ଓ ହୁ ଅଧିକାରୀ ବିମାନରେ ଚଢ଼ିବାକୁ ଯାଉଥିବା ବେଳେ ସାନା ଅନ୍ତର୍ଜାତୀୟ ବିମାନବନ୍ଦର ଆକାଶମାର୍ଗରୁ ବୋମାମାଡ଼ର ଶିକାର ହୋଇଥିଲା। ସେ ଏବଂ ତାଙ୍କ ସହଯୋଗୀମାନେ ସୁରକ୍ଷିତ ଥିବା କହିବା ସହ ହୁ ମୁଖ୍ୟ କହିଛନ୍ତି ଯେ ସେମାନେ ଯିବା ପୂର୍ବରୁ ବିମାନବନ୍ଦରର କ୍ଷୟକ୍ଷତିର ମରାମତି ପାଇଁ ଅପେକ୍ଷା କରିବାକୁ ପଡ଼ିବ।

ୟେମେନର ପଶ୍ଚିମ ଉପକୂଳ ଏବଂ ଆଭ୍ୟନ୍ତରୀଣ ୟେମେନରେ ଥିବା ହୂତି ନିୟନ୍ତ୍ରିତ ସାମରିକ ଅଂଚଳକୁ ଲକ୍ଷ୍ୟ କରି ଇସ୍ରାଏଲ ଗତକାଲି ଆକାଶମାର୍ଗରୁ ଆକ୍ରମଣ ଆରମ୍ଭ କରିଥିଲା। ଉତ୍ତର ୟେମେନର ଅଧିକାଂଶ ଅଞ୍ଚଳକୁ ନିୟନ୍ତ୍ରଣ କରୁଥିବା ହୁତିମାନେ ନଭେମ୍ବର ୨୦୨୩ରୁ ଇସ୍ରାଏଲ ବିରୋଧରେ ନିୟମିତ ରକେଟ୍ ଏବଂ ଡ୍ରୋନ୍ ଆକ୍ରମଣ କରୁଛନ୍ତି। ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ ୟେମେନର ହୁତି ଓ ଇସ୍ରାଏଲ ମଧ୍ୟରେ ଉତ୍ତେଜନାକୁ ନିନ୍ଦା କରିବା ସହ ଅସ୍ତ୍ରବିରତି ପାଇଁ ଆହ୍ୱାନ ଦେଇଛନ୍ତି।