ହରଭଙ୍ଗା: ବୌଦ୍ଧ ଜିଲ୍ଲା ହରଭଙ୍ଗା ତହସିଲ ଅନ୍ତର୍ଗତ ଖରଶଙ୍କୁଲେଇ ନୂଆ ପଥର ଖାଦାନାରେ ବୁଧୁବାର ହରଭଙ୍ଗା ତହସିଲଦାର ଶମ୍ଭୁଭୂଷଣ ମିଶ୍ର, ଅତିରିକ୍ତ ତହସିଲଦାର ହରିଓମ ଭୋଇ, ସୁପରଭାଇଜର ନିଶିକାନ୍ତ ମେହେର ପ୍ରମୁଖ ସଦଳବଳେ ଚଢାଉ କରିଛନ୍ତି। ଘଟଣାସ୍ଥଳରେ ପହଞ୍ଚିଲା ପରେ ଉକ୍ତ ପଥର ଖାଦାନରୁ ହିଟାଚି ମେସିନ ସାହାଯ୍ୟରେ ବେଆଇନଭାବେ ପଥର ଉତ୍ତୋଳନ କରାଯାଇ ଚୋରାଚାଲାଣ ଚାଲିଥିବା ଦେଖିବାକୁ ପାଇଥିଲେ। ବିନା ଲିଜରେ ଦୀର୍ଘ ୩ବର୍ଷ ହେଲା ରଣଜିତ ବିଲଡକନ ନାମକ ଠିକାସଂସ୍ଥା କାହା ସାହସରେ ଏଭଳି ବେଆଇନ ପଥର ଉତ୍ତୋଳନ କରୁଥିଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ତହସିଲଦାର ଠିକାସଂସ୍ଥା ବିରୁଦ୍ଧରେ ୨୩ଲକ୍ଷ ୯୫ହଜାର ଟଙ୍କା ରୟାଲଟି ସହିତ ୫ଲକ୍ଷଟଙ୍କା ଜୋରିମାନା ଦେବାକୁ ଏକ ଡିମାଣ୍ଡ ନୋଟିସ ଦେଇଛନ୍ତି। ଏହା ସହିତ ପଥର ଉତ୍ତୋଳନ କରୁଥିବା ମେସିନ ଉପରେ ୧ଲକ୍ଷଟଙ୍କା ଜୋରିମାନା କାଟିଛନ୍ତି।
ସୂଚନା ଥାଉ କି, ଧଳପୁର-ଆଠମଲ୍ଲିକ ମହାନଦୀସେତୁ ନିର୍ମାଣ କରୁଥିବା ରଣଜିତ ବିଲ୍ଡକନ ନାମକ ଠିକାସଂସ୍ଥା ୨୦୧୯ରେ ଖରଶଙ୍କୁଲେଇ ନୂଆ ପଥର ଖାଦାନକୁ ତିନି ମାସିଆ ଲିଜ ଆକାରେ ନେଇଥିଲା। ମାତ୍ର ଲିଜ ନବୀକରଣ ନକରି ଦୀର୍ଘ ୩ବର୍ଷ ହେଲା କିଛି ଅସାଧୁ ରାଜସ୍ୱ କର୍ମଚାରୀଙ୍କୁ ହାତକରି ବେନିୟମ ପଥର ଉତ୍ତୋଳନ ଯୋଗୁଁ ସରକାରଙ୍କ ଲକ୍ଷଲକ୍ଷ ଟଙ୍କା ରାଜସ୍ୱ ହାନୀ ଘଟୁଥିଲା। ମାତ୍ର ଏତେ ବିଳମ୍ବରେ ରାଜସ୍ୱ ବିଭାଗ ଠିକାସଂସ୍ଥା ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଘଟଣା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏ ସର୍ମ୍ପକରେ ହରଭଙ୍ଗା ତହସିଲଦାର ଶମ୍ଭୁଭୂଷଣ ମିଶ୍ରଙ୍କୁ ପଚାରିବାରୁ ବେଆଇନଭାବେ ଠିକାସଂସ୍ଥା ପଥର ଉତ୍ତୋଳନ କରିବା ସ୍ପଷ୍ଟ ହୋଇଛି। ଠିକାସଂସ୍ଥା ବିରୁଦ୍ଧରେ ଜୋରିମାନା, ରୟାଲିଟି ସହ ୨୯ଲକ୍ଷଟଙ୍କା ଦେବାକୁ ନିର୍ଦ୍ଦେଶ ଦିଆଯାଇଛି। ଠିକାସଂସ୍ଥା ରୟାଲଟି ଦେଖାଇନପାରିଲେ ଆମେ ମାପ ଅନୁସାରେ ରୟାଲଟି ଏବଂ ଜୋରିମାନା ଆଦାୟ ପାଇଁ ନୋଟିସ କରାଯିବ ବୋଲି କହିଥିଲେ।ଏହା ସହିତ ଆଗକୁ ବିନା କାଗଜପତ୍ରରେ ଖଣ୍ଡିଏ ବି ପଥର ନେଲେ ପୁର୍ନବାର କାର୍ଯ୍ୟାନୁଷ୍ଠାନ ନିଆଯିବ।
