କଲମପୁର: କାମ କରି ପେଟ ପୋଷିବା ପାଇଁ ସୁଦୁର ବେଙ୍ଗାଲୁରୁ ଦାଦନ ଖଟିବାକୁ ଯାଇଥିଲା ପୁଅ। କିନ୍ତୁ ଘରୁ ବାହାରିବାର ୧୫ ଦିନ ନଯାଉଣୁ ତାର ମରଣ ଖବର ଆସିଛି। ପୁଅକୁ ମୋର ଜାଣି ଶୁଣି ମାରି ଦିଆଯାଇଛି। ଏହା ଏକ ହତ୍ୟା ଘଟଣା। ମୋ ପୁଅର ଶବକୁ ଫେରାଇ ଦିଆଯାଉ। ମୁଁ ଗରିବ ବୋଲି ମୋ ପୁଅ ଦାଦନ ଖଟିବାକୁ ଯାଇଥିଲା। ମୋର କୌଣସି ସାମର୍ଥ୍ୟ ନାହିଁ। କଲମପୁର ପୁଲିସ ଥାନାରେ ଏଭଳି ଅଭିଯୋଗ କରିଛନ୍ତି ଜଣେ ଦାଦନ ଶ୍ରମିକଙ୍କ ବାପା। ଯାହାକୁ ନେଇ ସାଧାରଣରେ ଆଲୋଡନ ସୃଷ୍ଟି ହୋଇଛି।
ସୂଚନା ଅନୁସାରେ, ପୋଟେସ କଲୋନୀପଡ଼ାର ବୁଢା ମାଝୀଙ୍କ ୧୮ ବର୍ଷିୟ ପୁଅ କୁଅଁର ମାଝୀ ନିଜର ସାଥି ଶ୍ରମିକଙ୍କ ସହ ବେଙ୍ଗାଲୁରୁର ଏକେଡା ନଗରକୁ ଯାଇଥିଲେ କାମ କରିବା ପାଇଁ। ଗତ ୧୩ ତାରିଖ ଦିନ କିଛି ସାଥି ଶ୍ରମିକଙ୍କ ସହ ତାଙ୍କର ବଚସା ହୋଇଥିଲା। ଏହାପରେ ୧୫ ତାରିଖ ଦିନ କୁଅଁରଙ୍କ ମୃତ୍ୟୁ ହୋଇଥିବା ସୂଚନା ମିଳିଥିବାରୁ ପରିବାର ଲୋକ ତାଙ୍କ ମୃତ୍ୟୁକୁ ସହଜରେ ଗ୍ରହଣ କରି ପାରୁନାହାନ୍ତି। ତେଣୁ କୁଅଁରର ମୃତ୍ୟୁ ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଅଭିଯୋଗ କରି ଥାନାରେ ଏତଲା ଦେଇଛନ୍ତି ପରିବାର ଲୋକ। ଅନ୍ୟପଟେ ଏକେଡା ନଗର ଥାନାରେ ଏନେଇ ସୂଚନା ପହଞ୍ଚିବା ପରେ ପୁଲିସ ମୃତଦେହ ଜବତ କରି ଘଟଣାର ତଦନ୍ତ କରୁଥିବା ସୂଚନା ମିଳିଛି।
କାମ ଧନ୍ଦା ଅଭାବ ଦର୍ଶାଇ ଦିନକୁ ଦିନ ମାନବ ଚାଲାଣ ବୃଦ୍ଧି ପାଉଛି। ପ୍ରଶାସନର କୌଣସି ନିୟମ ରୋକି ପାରୁନାହିଁ ଦାଦନ ଚାଲାଣକୁ, ରୋକି ପାରୁନାହିଁ କୌଣସି ଶ୍ରମ ଯୋଜନା। ଯେଉଁଥିପାଇଁ ଦାଦନ ଶ୍ରମିକ ଉପରେ ନିର୍ଯ୍ୟାତନା ବୃଦ୍ଧି ପାଉଛି। ଶ୍ରମିକ ଦଲାଲ କବ୍ଜାରେ କବଳିତ ହେଉଛନ୍ତି ଦାଦନ ପରିବାର। କିଏ ଦାଦନ ଖଟିବାକୁ ଯାଇ ହାତ ଗୋଡ କଟା ହୋଇ ନିର୍ଯ୍ୟାତିତ ହୋଇ ଫେରୁଛି ତ କିଏ ନିଖୋଜ, ପୁଣି କିଏ ଶବ ହୋଇ ଫେରୁଛି। ପୁଣି କିଛି ଶ୍ରମିକଙ୍କ ଭାଗ୍ୟରେ ଗାଁ ମାଟି ଜୁଟୁନାହିଁ। ବର୍ତମାନ କୁଅଁରଙ୍କ ମୃତଦେହ ଗାଁକୁ ଫେରିବ କି ନାହିଁ ସେନେଇ ସନ୍ଦେହ ଦେଖା ଦେଇଛି। ଜିଲ୍ଲା ପ୍ରଶାସନ ଏନେଇ ପଦକ୍ଷେପ ନେଲେ ହୁଏତ କୁଅଁରଙ୍କ ମୃତଦେହ ଗାଁ ମାଟିକୁ ଫେରି ପାରନ୍ତା। କିନ୍ତୁ ଏ ଦିଗରେ କାର୍ଯ୍ୟ କରିବା ନେଇ କୌଣସି ଲୋକ ପ୍ରତିିନିଧି ଅଥବା ତଥାକଥିତ ସମାଜସେବୀଙ୍କ ଆଗ୍ରହ ନାହିଁ।
Comments are closed.