କଲମପୁର : କଲମପୁର ଥାନା ଅନ୍ତର୍ଗତ ବଙ୍କାପଲାର ପଦରପଡା କ୍ରିକେଟ ଆସୋସିଏସନ୍ ପକ୍ଷରୁ କ୍ରିକେଟ ଟୁର୍ଣ୍ଣାମେଣ୍ଟର ଆୟୋଜନ କରାଯାଇଛି। ଶୁକ୍ରବାର କଲମପୁର ବ୍ଲକ ଅନ୍ତର୍ଗତ ବାଲିଛଡା ଏବଂ ଜୁନାଗଡ଼ ବ୍ଲକ ଅନ୍ତର୍ଗତ ତାଳପଦର କ୍ରିକେଟ ଦଳ ମଧ୍ୟରେ ଏକ ଗୁରୁତ୍ବପୂର୍ଣ୍ଣ ମ୍ୟାଚ ଖେଳାଯାଉଥିଲା । ବାଲିଛଡା ଦଳ ନିର୍ଦ୍ଧାରିତ ଓଭର ମଧ୍ୟରେ ୧୩୮ରନ୍ ସଂଗ୍ରହ କରି ଥିଲେ। ପ୍ରତିପକ୍ଷ ଦଳ ବିଜୟ ଲକ୍ଷ୍ୟ ୧୩୯ ରନ୍ ସଂଗ୍ରହ ପାଇଁ ପଡ଼ିଆକୁ ଓହ୍ଲାଇ ଥିଲା।
କିନ୍ତୁ ଅମ୍ପିୟାରଙ୍କ ନିଷ୍ପତ୍ତିରେ ତୃଟି ଯୋଗୁଁ ତାଳପଦର ଦଳର ବ୍ୟାଟିଂ ବିପର୍ଯ୍ୟୟ ଘଟିଥିଲା। ଯାହାକୁ ନେଇ ତାଳପଦର ଦଳର ସମର୍ଥକମାନଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା। ଯାହାକୁ ନେଇ ଆୟୋଜକ ମାନଙ୍କ ସହିତ ସମର୍ଥକଙ୍କ ମଧ୍ୟରେ ବଚସା ହେଇଥିଲା। ଏପରିକି ତାଳପଦର ଦଳର ଟଇକଚନ ବାଗ ନାମକ ଜନୈକ ସମର୍ଥକଙ୍କୁ ଆୟୋଜକ କମିଟିର ସଦସ୍ୟ ସନ୍ତୋଷ ବିହାର ଅନ୍ୟ ଦୁଇ ସହଯୋଗୀଙ୍କ ସହ ଆକ୍ରମଣ କରିଥିବା ନେଇ କଲମପୁର ଥାନାରେ ଏକ ଏତଲା ଦିଆ ଯାଇଛି। ଅନ୍ୟପଟେ ଏଭଳି ଅଭିଯୋଗ ମିଥ୍ୟା ଓ କପୋଳ କଳ୍ପିତ ବୋଲି ସନ୍ତୋଷ ସୂଚନା ଦେଇଛନ୍ତି।
