ଲାଞ୍ଜିଗଡ଼ : ଦୁଇଦିନ ଧରି ନିଖୋଜ ଥିବା କଳାହାଣ୍ଡି ଜିଲା ଲାଞ୍ଜିଗଡ ସ୍ଥିତ ବେଦାନ୍ତ କମ୍ପାନୀର ଜଣେ ଉଚ୍ଚ ପଦସ୍ଥ କର୍ମଚାରୀଙ୍କ ମୃତଦେହ ନିକଟସ୍ଥ ଟାଙ୍ଗନକଣା ଡ଼୍ୟାମରୁ ଆଜି ଲାଞ୍ଜିଗଡ ପୁଲିସ ଉଦ୍ଧାର କରିଛି। ପୁଲିସ ସୁତ୍ରରୁ ପ୍ରକାଶ ଯେ କନ୍ଧମାଳ ଜିଲା ଜି.ଉଦୟଗିରୀ ଥାନା ଅର୍ନ୍ତଗତ ଗଦଗୁଡା ଗ୍ରାମର ପ୍ରତ୍ୟୁଷ ପ୍ରଧାନ(୩୩) ଲାଞ୍ଜିଗଡ ସ୍ଥିତ ବେଦାନ୍ତ କମ୍ପାନୀରେ ଡେପୁଟି ମ୍ୟାନେଜର ଭାବେ କାର୍ୟ୍ୟରତ ଥିଲେ। ଗତ ୧ତାରିଖ ଠାରୁ ସେ ନିଜର କାର ସହିତ ଲାଞ୍ଜିଗଡରୁ ନିଖୋଜ ଥିବା ବେଳେ ତାଙ୍କ ନିଖୋଜ ସଂପର୍କରେ କମ୍ପାନୀ ପକ୍ଷରୁ ଏକ ନିଖୋଜ ମାମଲା ରୁଜୁ ହୋଇଥିଲା। ଏହାପରେ ଲାଞ୍ଜିଗଡ ପୁଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଥିବା ବେଳେ ଗତକାଲି ବିଳମ୍ବିତ ରାତିରେ ତାଙ୍କ କାରକୁ ଛତ୍ରପୁର ପଞ୍ଚାୟତ ଟାଙ୍ଗନକଣା ଡ଼୍ୟାମ ନିକଟରେ ଠାବ କରାଯାଇଥିଲା।
ଆଜି ସକାଳୁ ଲାଞ୍ଜିଗଡ ଥାନାଧିକାରୀ ସତ୍ୟାନନ୍ଦ ପାତ୍ରଙ୍କ ନେତୃତ୍ୱରେ ପାଖାପାଖି ଅଞ୍ଚଳ ଖୋଜାଖୋଜି କରାଯିବା ସହ ଲାଞ୍ଜିଗଡ ଅଗ୍ନିଶମ ବାହିନୀ ତରଫରୁ ଷ୍ଟେସନ ଅଫିସର ମନୋରଞ୍ଜନ ପାଢ଼ୀଙ୍କ ନେତୃତ୍ୱରେ ଅଗ୍ନିଶମ କର୍ମଚାରୀ ଦେବରାଜ ପ୍ରଧାନ, ଗୁପ୍ତେଶ୍ୱର ନାଏକ, କୃଷ୍ଣଚନ୍ଦ୍ର ସ୍ୱାଇଁ, ବସନ୍ତ ବେହେରା ଓ ରବିନ୍ଦ୍ର ଭୋଇ ଡେମର ପାଣି ଭିତରେ ବୁଡି ଖୋଜାଖୋଜି କରିଥିଲେ। ଦୀର୍ଘ ସମୟ ଖୋଜାଖୋଜି ପରେ ଦିନ ୧୧ଟା ବେଳେ ତାଙ୍କ ମୃତଦେହ ଠାବ କରାଯାଇଥିଲା। ଏ ସଂପର୍କରେ ଲାଞ୍ଜିଗଡ ପୁଲିସ ପକ୍ଷରୁ ଏକ ମାମଲା ରୁଜୁ କରି ଏସଆଇ ରମା ରମଣୀ ମିଶ୍ର ତଦନ୍ତ କରୁଛନ୍ତି। ପ୍ରତ୍ୟୁଷଙ୍କ ମୃତ୍ୟୁ ଖବର ପାଇବା ପରେ ତାଙ୍କ ପରିବାର ଲୋକେ ଲାଞ୍ଜିଗଡରେ ଆସି ପହଞ୍ଚିଥିବା ବେଳେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତାଙ୍କ ମୃତ୍ୟୁରେ କମ୍ପାନୀ କର୍ମଚାରୀ ମହଲରେ ଶୋକାକୁଳ ପରିବେଷ ସୃଷ୍ଟି ହୋଇଛି। ଘଟଣାଟି ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
