ଝାରସୁଗୁଡ଼ା: ଝାରସୁଗୁଡ଼ା ଜିଲା ବ୍ରଜରାଜନଗର ଛୁଆଲିବେରନାରେ ଶନିବାର ଏକ ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ବିନୋଦ ପ୍ରସାଦ ଆହତ ହୋଇଛନ୍ତି । ବିନୋଦର ଡ଼ାହଣ ଗୋଡ଼ରେ ଗୁଳି ବଜିଥିବା ଜଣା ପଡ଼ିଛି । ଗୁରୁତର ଅବସ୍ଥାରେ ତାକୁ ଜିଲା ମୁଖ୍ୟ ଚିକିତ୍ସାଳୟକରେ ଭର୍ତ୍ତି କରାଯାଇଛି । ତା’ ପାଖରୁ ଗୋଟିଏ ପିସ୍ତଲ, ୩ଟି ଗୁଳି ଜବତ କରାଯାଇଛି । ବିନୋଦ ଅମିତ ଧଳ ହତ୍ୟାକାଣ୍ଡରେ ସମ୍ପୃକ୍ତ ଥିବା ସୋନୁ ଘୋଷର ସହଯୋଗୀ, ତା ନାମରେ ବିଭିନ୍ନ ଥାନାରେ ଏକାଧିକ ମାମଲା ରହିଛି ।
ମିଳିଥିବା ସୂଚନା ଅନୁଯାୟୀ, ରାତି ୩ଟା ସମୟରେ ବିନୋଦ ଏକ ବଡ଼ ଧରଣର ଅପରାଧ ଘଟାଇବା ଉଦ୍ଦେଶ୍ୟରେ ବାହାରିଥିଲା । ଏନେଇ ଖବର ପାଇ ବ୍ରଜରାଜନଗର ଆଇଆଇସି ବିଶ୍ଵାମିତ୍ର ହରିପାଲଙ୍କ ନେତୃତ୍ୱରେ ସ୍ପେଶାଲ ସ୍କ୍ୱାର୍ଡ ତା ପିଛା କରିଥିଲା। ସେହି ସମୟରେ ସେ ପୋଲିସ ଉପରକୁ ୨ ରାଉଣ୍ଡ ଗୁଳି ମାରି ଖସି ଯିବାକୁ ଚେଷ୍ଟା କରିଥିଲା । ପୁଲିସ ପକ୍ଷରୁ ଆତ୍ମ ସୁରକ୍ଷା ପାଇଁ ପାଲଟା ଗୁଳି ଚାଳନା କରାଯାଇଥିଲା ।
