ଭୁବନେଶ୍ୱର: ଇଲେକ୍ଟ୍ରୋନିକ୍ସ, ସୂଚନା ପ୍ରଯୁକ୍ତିବିଦ୍ୟା, କ୍ରୀଡା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା କୋରାପୁଟ ଜିଲା ଗସ୍ତ କରିଛନ୍ତି। ଏହି ଅବସରରେ ଜିଲାପାଳ ମଧୁସୂଦନ ମିଶ୍ରଙ୍କ ସହ କୋରାପୁଟ ଜିଲାର କ୍ରୀଡା ଓ ଆଇଟି ଭିତ୍ତିଭୂମି ସୁଦୃଢୀକରଣ ଉପରେ ସେ ଆଲୋଚନା କରିଥିଲେ। ଏହାପରେ ମନ୍ତ୍ରୀ ଶ୍ରୀ ବେହେରା ନିର୍ମାଣଧୀନ ଜୟପୁର ଇଣ୍ଟିଗ୍ରେଟେଡ ସ୍ପୋର୍ଟ କମ୍ପ୍ଲେକ୍ସ ପରିଦର୍ଶନରେ ଯାଇ ନିର୍ମାଣ କାର୍ଯ୍ୟର ସମୀକ୍ଷା କରିଥିଲେ।
କୋଭିଡ କଟକଣା ପାଇଁ ନିର୍ମାଣ କାର୍ଯ୍ୟ ପଛେଇ ଯାଇଥିବାରୁ ବାକି ଥିବା କାର୍ୟ୍ୟକୁ ଶୀଘ୍ର ଶେଷ କରିବା ପାଇଁ ଦାୟିତ୍ୱ ନେଇଥିବା ସଂସ୍ଥାକୁ ନିର୍ଦେଶ ଦେଇଥିଲେ। ମୁଖ୍ୟମନ୍ତ୍ରୀ ସବୁ ଜିଲାରେ ଇଣ୍ଟିଗ୍ରେଟେଡ ସ୍ପୋର୍ଟ୍ସ କମ୍ପ୍ଲେକ୍ସ ନିର୍ମାଣର ଯେଉଁ ଲକ୍ଷ୍ୟ ରଖିଛନ୍ତି ତାହା ଶୀଘ୍ର ପୁରା କରିବା ପାଇଁ ଦାୟିତ୍ୱରେ ଥିବା ଅଧିକାରୀ ଓ ନିର୍ମାଣ ସଂସ୍ଥାକୁ ନିର୍ଦେଶ ଦେଇଥିଲେ। ସରକାରଙ୍କ ଯୋଜନା ଅନୁଯାୟୀ ପ୍ରତ୍ୟେକ ଜିଲ୍ଲାରେ ହେବାକୁ ଇଣ୍ଟିଗ୍ରେଟେଡ ସ୍ପୋର୍ଟ୍ସ କମ୍ପ୍ଲେକ୍ସରେ ଫୁଟବଲ, ହକି ସ୍ୱିମିଂପୁଲ, ଇଣ୍ଡୋର ହଲ, ଟେନିସ କୋର୍ଟ, ଭଲ୍ଲିବଲ ଆଦି ବିଭିନ୍ନ କ୍ରୀଡା ସୁବିଧା ଉପଲବଦ୍ଧ ହେବ। ପରେ ମନ୍ତ୍ରୀ ଶ୍ରୀ ବେହେରା ଜୟପୁର ଠାରେ ନିର୍ମାଣ ହେବାକୁ ଥିବା ଏସଟିପିଆଇ ଅଞ୍ଚଳ ବୁଲି ଦେଖିଥିଲେ ଓ ଆଇଟି କ୍ଷେତ୍ରକୁ ସୁଦୃଢ କରିବାରେ ଏଠାକାର ଏସଟିପିଆଇ ବେଶ ସହାୟକ ହେବ ଓ ଏଥି ସହିତ ଆଇଟି କ୍ଷେତ୍ରରେ ସ୍ଥାନୀୟ ନିଯୁକ୍ତିକୁ ମଧ୍ୟ ବେଶ ପ୍ରୋତ୍ସାହିତ କରିବ ବୋଲି ମନ୍ତ୍ରୀ ଶ୍ରୀ ବେହେରା କହିଥିଲେ।
