ଜେରୁଜେଲମ୍ : ମଧ୍ୟପ୍ରାଚ୍ୟ ରାଷ୍ଟ୍ର ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ପତ୍ନୀ ସାରା ନେତାନ୍ୟାହୁଙ୍କ ନାମରେ ଠକେଇ ଅଭିଯୋଗ ହୋଇଛି। ତାଙ୍କ ନାମରେ ରାଜଧାନୀ ଜେରୁଜେଲମ୍ରେ ଅବସ୍ଥିତ ପ୍ରଧାନମନ୍ତ୍ରୀଙ୍କ ସରକାରୀ ବାସଭବନରେ ରୋଷେଇ ପାଣ୍ଠିରୁ ଏକ ଲକ୍ଷ ଡଲାର(ଭାରତୀୟ ମୁଦ୍ରାରେ ୬୮ଲକ୍ଷ ଟଙ୍କା) ଅପବ୍ୟୟ ଅଭିଯୋଗ ହୋଇଥିବା ବିଚାର ବିଭାଗ ପକ୍ଷରୁ ସୂଚନା ଦିଆଯାଇଛି। ବିଶେଷକରି ୨୦୧୦ରୁ ୨୦୧୩ ମଧ୍ୟରେ ନିଜ କର୍ମଚାରୀଙ୍କ ମାଧ୍ୟମରେ ଚତୁରତାର ସହ ଓ ଯୋଜନାବଦ୍ଧ ଭାବେ ବାହାର ରେସ୍ତୋରାଁରୁ ଖାଦ୍ୟ ମଗାଇବାରେ ଏହି ଅପବ୍ୟୟ ହୋଇଥିବା ଜଣାପଡ଼ିଛି। ନିୟମ ଅନୁସାରେ ପ୍ରଧାନମନ୍ତ୍ରୀଙ୍କ ବାସଭବନରେ ରୋଷେୟା ନିଯୁକ୍ତ ହୋଇଥିବାବେଳେ ବାହାରୁ ଖାଦ୍ୟ ମଗାଯାଇପାରିବ ନାହିଁ। ସାରା ଏହି ନିୟମର କେବଳ ଉଲ୍ଲଙ୍ଘନ କରିନାହାନ୍ତି; ବରଂ ବାହାରୁ ଖାଦ୍ୟ ମଗାଇବା ପାଇଁ ରୋଷେୟା ନିଯୁକ୍ତିକୁ ଲୁଚାଇଛନ୍ତି। ଏହି ଘଟଣା ନେଇ ସାରାଙ୍କ ବିରୋଧରେ ତଦନ୍ତ ସହ ବିଚାର ଆରମ୍ଭ ହୋଇଛି।
