ନୂଆଦିଲ୍ଲୀ/ଇସଲାମାବାଦ : ଭାରତ ଏବଂ ପାକିସ୍ତାନର ବିଭିନ୍ନ ଜେଲରେ ବନ୍ଦୀ ଥିବା ଉଭୟ ଦେଶର ମହିଳା ଓ ୭୦ ବର୍ଷରୁ ଊର୍ଦ୍ଧ୍ବ ବୃଦ୍ଧଙ୍କ ମୁକ୍ତି ପାଇଁ ପ୍ରୟାସ ଆରମ୍ଭ ହୋଇଛି । ଏହି କ୍ରମରେ ଭାରତର ବିଭିନ୍ନ ଜେଲରେ ବନ୍ଦୀ ଥିବା ପାକିସ୍ତାନୀ ଓ ପାକିସ୍ତାନରେ ବନ୍ଦୀ ଥିବା ଭାରତୀୟ ମହିଳା ଓ ବୃଦ୍ଧ ବନ୍ଦୀଙ୍କୁ ମୁକ୍ତ କରିବାକୁ ଉଭୟ ପକ୍ଷ ରାଜି ହୋଇଛନ୍ତି । ଉଭୟ ଦେଶ ଯୁଗ୍ମ ବିଚାର ବିଭାଗୀୟ କମିଟିର ଯାତ୍ରା ଓ ଅନୁଧ୍ୟାନ କାର୍ଯ୍ୟକୁ ପୁନଃ ଆରମ୍ଭ କରିବାକୁ ସହମ୍ମତି ପ୍ରଦାନ କରିଛନ୍ତି । କେନ୍ଦ୍ର ବୈଦେଶିକ ମନ୍ତ୍ରଣାଳୟ ପକ୍ଷରୁ ଜାରି ଏକ ଇସ୍ତାହାରରେ କୁହାଯାଇଛି ଯେ ପାକିସ୍ତାନ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କ ପ୍ରସ୍ତାବକୁ ସକରାତ୍ମକ ଭାବେ ଗ୍ରହଣ କରିଛି । ଏହାଦ୍ୱାରା ଉଭୟ ଦେଶରେ ବନ୍ଦୀ ମହିଳା ଓ ୬୦ ବର୍ଷରୁ ଅଧିକ ବୟସର ନାଗରିକଙ୍କ ମୁକ୍ତି ଓ ସ୍ୱଦେଶ ପ୍ରତ୍ୟାବର୍ତ୍ତନ କରାଯାଇପାରିବ । ଗତ ବର୍ଷ ଅକ୍ଟୋବର ମାସରେ ସୁଷମା ସ୍ୱରାଜ ପାକିସ୍ତାନ ଉଚ୍ଚାୟୁକ୍ତଙ୍କୁ ଏନେଇ ଅବଗତ କରାଇଥିଲେ । ମହିଳା, ଶିଶୁ, ବୟସ୍କଙ୍କ ସହ ଜଡିତ ପ୍ରସଙ୍ଗରେ ଉଭୟ ଦେଶ ମାନବିକତା ପୃଷ୍ଟଭୂମିରେ କାର୍ଯ୍ୟ କରିବାକୁ ସୁଷମା ପ୍ରସ୍ତାବ ଦେଇଥିଲେ । ଉଭୟ ଦେଶର ଯୁଗ୍ମ ବିଚାରବିଭାଗୀୟ କମିଟି ଉଭୟ ଦେଶକୁ ଯାତ୍ରା କରି ବନ୍ଦୀଙ୍କ ସଂଖ୍ୟା ଓ ସ୍ଥିତି ଅନୁଧ୍ୟାନ କରିବେ । ବିଶେଷ କରି ମାନସିକ ବିକାରଗ୍ରସ୍ତ ଓ ମତ୍ସ୍ୟଜୀବୀ ବନ୍ଦୀଙ୍କ ସମ୍ପର୍କରେ ଯୁଗ୍ମ ବିଚାରବିଭାଗୀୟ କମିଟି ତଥ୍ୟ ସଂଗ୍ରହ କରି ପଦକ୍ଷେପ ନେବେ । ପାକିସ୍ତାନ ବିଦେଶ ମନ୍ତ୍ରୀ ଖ୍ୱାଜା ମହମ୍ମଦ ଆସିଫ ମାନବିକତା ଦୃଷ୍ଟି କୋଣରୁ ଏହି ପଦକ୍ଷେପକୁ ସ୍ୱୀକୃତି ପ୍ରଦାନ କରିବା ସହ ସ୍ୱାଗତ ଜଣାଇଛନ୍ତି । ପାକିସ୍ତାନରେ ଥିବା ୬୦ ବର୍ଷ ବୟସରୁ ଊର୍ଦ୍ଧ୍ବ ଏବଂ ୧୮ ବର୍ଷରୁ କମ୍ ବୟସ୍କ ଭାରତୀୟ ବନ୍ଦୀଙ୍କ ମୁକ୍ତି ପାଇଁ ଅନୁମତି ପ୍ରଦାନ କରାଯାଇଛି ବୋଲି ପାକିସ୍ତାନ ବୈଦେଶିକ ମନ୍ତ୍ରଣାଳୟ ମୁଖପାତ୍ର ମୋହମ୍ମଦ ଫୈଜଲ ପ୍ରକାଶ କରିଛନ୍ତି ।
Popular Categories
Previous article
Next article