ଡେସ୍କ : ଭାରତ- ୱେଷ୍ଟଇଣ୍ଡିଜ୍ ମଧ୍ୟରେ ପ୍ରଥମ ଟ୍ବେଣ୍ଟି-୨୦ ମ୍ୟାଚ୍ ଆରମ୍ଭ ହୋଇଛି । ଟସ୍ ଜିତି ୱେଷ୍ଟଇଣ୍ଡିଜର ବୋଲିଂ ନିଷ୍ପତ୍ତି ନେଇ ଭାରତକୁ ବ୍ୟାଟିଂ ପାଇଁ ଆମନ୍ତ୍ରଣ କରିଛି । ୱେଷ୍ଟଇଣ୍ଡିଜ୍ ବିପକ୍ଷରେ ଭାରତ ଦିନିକିଆ ଶୃଙ୍ଖଳାକୁ ୩-୦ରେ ଜିତି ନେବା ପରେ ଏବେ ଦୃଢ ମନୋବଳ ନେଇ ଭାରତ ଘରୋଇ ଦଳ ବିପକ୍ଷରେ ୫ ମ୍ୟାଚ୍ର ଟ୍ବେଣ୍ଟି-୨୦ ଶୃଙ୍ଖଳା ଖେଳିବା ଆରମ୍ଭ କରିଛି । ପ୍ରଥମ ୩ ଓଭରରେ ଭାରତ କୌଣସି ୱିକେଟ ନ ହରାଇ ୨୫ ରନ ସଂଗ୍ରହ କରିଛି। ରୋହିତଙ୍କ ସହ ସୂର୍ଯ୍ୟକୁମାର ଯାଦବ ଇନିଂସ ଓପନ୍ କରିଛନ୍ତି ।
ଟ୍ବେଣ୍ଟି-୨୦ ବିଶ୍ବକପ୍ ବର୍ଷରେ ଏହି ଶୃଙ୍ଖଳାର ଗୁରୁତ୍ବ ଅଧିକ । ଏହି ଶୃଙ୍ଖଳାରୁ ଭାରତ ବିଶ୍ବକପ୍ ପାଇଁ ତା’ର ଦଳ ଗଠନ କରିବାର ପ୍ରୟାସ କରିବ। ଦିନିକିଆ ଶୃଙ୍ଖଳାରୁ ଭାରତର ପ୍ରମୁଖ ଖେଳାଳି ବିଶ୍ରାମ ନେଇଥିବା ବେଳେ ଟ୍ବେଣ୍ଟି୨୦ ଶୃଙ୍ଖଳାରେ କିନ୍ତୁ ବିରାଟ କୋହଲିଙ୍କୁ ଛାଡ଼ି ଅନ୍ୟ ପ୍ରମୁଖ ଖେଳାଳି ଖେଳିବାକୁ ଯାଇଛନ୍ତି। ଏହି ଶୃଙ୍ଖଳାକୁ ମିଶାଇ ବିଶ୍ବକପ୍ ପୂର୍ବରୁ ଭାରତକୁ ୧୬ଟି ଟ୍ବେଣ୍ଟି-୨୦ ଶୃଙ୍ଖଳା ଖେଳିବାର ଅଛି । ଇଣ୍ଡିଜ୍ ଶୃଙ୍ଖଳା ପରେ ଭାରତ ଏସିଆ କପ୍ରେ ୫ଟି ଏବଂ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ବିପକ୍ଷରେ ୩ଟି ଲେଖାଏଁ ଟି୨୦ ମ୍ୟାଚ୍ ଖେଳିବ ।
ୱେଷ୍ଟଇଣ୍ଡିଜ୍ ବିପକ୍ଷ ଟ୍ବେଣ୍ଟି-୨୦ ଶୃଙ୍ଖଳା ପାଇଁ ଦଳକୁ ଅଧିନାୟକ ରୋହିତ ଶର୍ମା, ହାର୍ଦିକ ପାଣ୍ଡ୍ୟା, ଭୁବନେଶ୍ବର କୁମାର, ହର୍ଷଲ ପଟେଲ, ଋଷଭ ପନ୍ତ୍, ଦିନେଶ କାର୍ତ୍ତିକ ଓ ଭୁବନେଶ୍ବର କୁମାର ଫେରିଛନ୍ତି । ଏବେ ଦେଖିବାର କଥା ଯେ କେ.ଏଲ୍. ରାହୁଲ ଦଳରୁ ବାଦ୍ ପଡ଼ିଥିବା ବେଳେ ରୋହିତଙ୍କ ସହ ସୂର୍ଯ୍ୟକୁମାର ଯାଦବ ଇନିଂସ ଓପନ୍ କରୁଛନ୍ତି । କୋହଲିଙ୍କ ଅନୁପସ୍ଥିତିର ଫାଇଦା ଉଠାଇବାକୁ ହୁଡା ଚାହିଁବେ। ୱେଷ୍ଟଇଣ୍ଡିଜ୍ ବ୍ୟାଟିଂ ଲାଇନ୍ରେ କାଏଲ୍ ମେୟର୍ସ, ନିକୋଲାସ୍ ପୁରନ୍, ଆକିଲ ହୋସେନ୍ଙ୍କ ପରି ବାମହାତି ବ୍ୟାଟ୍ସମ୍ୟାନ୍ ଥିବାରୁ ଟି-୨୦ ଦଳକୁ ଫେରିଥିବା ଅଫ୍ସ୍ପିନର ରବିଚନ୍ଦ୍ରନ ଅଶ୍ବିନଙ୍କୁ ଖେଳାଇବା କଥା ଭାରତ ବିଚାର କରିପାରେ। ପୁଣି ଯୁଜବେନ୍ଦ୍ର ଚହଲ ନଥିବାରୁ ଲେଗ୍ସ୍ପିନର ରବି ବିଷ୍ଣୋଇ ଓ କୁଲ୍ଦୀପ ଯାଦବଙ୍କ ମଧ୍ୟରୁ ଜଣେ ଖେଳିପାରନ୍ତି। ପେସ୍ ବୋଲର ଭାବେ ହର୍ଷଲ ପଟେଲ ଓ ଭୁବନେଶ୍ବର କୁମାର ଖେଳିବା ନିଶ୍ଚିତ ହୋଇଥିବା ବେଳେେଳ ୩ୟ ପେସ୍ ବୋଲର ଭାବେ ଅର୍ଶଦୀପ ସିଂହ ଓ ଆଭେସ୍ ଖାଁଙ୍କ ମଧ୍ୟରୁ ଜଣେ ଖେଳିବେ। ଏହା ସତ ଯେ ଦିନିକିଆ ଅପେକ୍ଷା ଟ୍ବେଣ୍ଟି-୨୦ରେ ୱେଷ୍ଟଇଣ୍ଡିଜ୍ ଅଧିକ ଶକ୍ତିଶାଳୀ ଦଳ। ବାଂଲାଦେଶଠାରୁ ଇଣ୍ଡିଜ୍ ଦିନିକିଆ ଶୃଙ୍ଖଳା ୦-୩ରେ ହାରିଥିଲେ ହେଁ ଟି୨୦ ଶୃଙ୍ଖଳାକୁ ୨-୦ରେ ଜିତିଥିଲା। ବୋଲିଂରେ ୱେଷ୍ଟଇଣ୍ଡିଜ୍ ସେପରି ଶକ୍ତିଶାଳୀ ନାହିଁ। ଏହାର ବ୍ୟାଟ୍ସମ୍ୟାନ୍ ଯଦି ସଫଳ ହୁଅନ୍ତି; ତେବେ ଏହା ଭାରତକୁ ରୋକିପାରେ। ଅଦ୍ୟାବଧି ଉଭୟ ଦେଶଙ୍କ ମଧ୍ୟରେ ୭ଟି ଟ୍ବେଣ୍ଟି-୨୦ ଶୃଙ୍ଖଳା ଖେଳା ଯାଇଥିବା ବେଳେ ଭାରତ ୫ଟି ଜିତିଛି । ପୁଣି ଉଭୟ ଦେଶଙ୍କ ମଧ୍ୟରେ ଶୃଙ୍ଖଳାରେ ଭାରତ କ୍ରମାଗତ ୪ଟି ଜିତିଛି।
