ଟାଉନ ଥାନା ସମ୍ମୁଖରେ ବେଆଇନ ଭାରିଯାନ ପାର୍କିଂ

କେନ୍ଦୁଝରଗଡ଼ : ଲୋକଙ୍କ ଧନଜୀବନ ସୁରକ୍ଷା ପାଇଁ ପୁଲିସ କାର୍ଯ୍ୟରତ ଥିବାବେଳେ ପୁଲିସର କାର୍ଯ୍ୟଶୈଳୀ ଯୋଗୁଁ ଯଦି ସାଧାରଣ ଲୋକେ ବିପଦର ସମ୍ମୁଖୀନ ହୁଅନ୍ତି ତାହାଲେ ଲୋକେ କାହାକୁ ଗୁହାରୀ କରିବେ ବୋଲି ଗତ କିଛିମାସ ଧରି କେନ୍ଦୁଝର ସହରରେ ଚର୍ଚ୍ଚାର ବିଷୟ ହୋଇଛି । ବାଡ ଯଦି କ୍ଷେତ ଖାଏ ନ୍ୟାୟରେ କେନ୍ଦୁଝର ଟାଉନ ଥାନା ପୁଲିସ ପକ୍ଷରୁ ଜାତୀୟ ରାଜପଥରେ ଦୁର୍ଘଟଣାଗ୍ରସ୍ତ ଭାରୀଯାନକୁ ଜବତ କରାଯାଇ ପରବର୍ତ୍ତୀ ସମୟରେ ଟାଉନ ଥାନା ସମ୍ମୁଖ ସହରର ପ୍ରମୁଖ ରାସ୍ତାର ଉଭୟ ପାଶ୍ୱର୍ରେ ମାସ ମାସ ଧରି ବେଆଇନ ଭାବେ ପାର୍କିଂ କରିବା ଦ୍ବାରା ସେହି ରାସ୍ତା ଦେଇ ଯାତାୟାତ କରୁଥିବା ଲୋକଙ୍କୁ ନାହିଁ ନଥିବା ହୀନସ୍ତାର ସମ୍ମୁଖୀନ ହେବାକୁ ପଡୁଛି । ବିଜୁ ପଟ୍ଟନାୟକ ଚକ ଠାରୁ ଜିଲାପାଳଙ୍କ ଆବାସିକ କାର୍ଯ୍ୟାଳୟ, ଉପଜିଲାପାଳ କାର୍ଯ୍ୟାଳୟ, ଦୁର୍ନିତୀ ନିବାରଣ କାର୍ଯ୍ୟାଳୟ, ରାସ୍ତା ଓ ଗୃହ ବିଭାଗ ମୁଖ୍ୟ ଯନ୍ତ୍ରୀଙ୍କ କାର୍ଯ୍ୟାଳୟ, ତହସିଲ କାର୍ଯ୍ୟାଳୟ, ଅଡିଟୋରିୟମ, ହ୍ୟାଣ୍ଡବଲ ଗ୍ରାଉଣ୍ଡ ଭଳି ବହୁ ବ୍ୟସ୍ତବହୁଳ କାର୍ଯ୍ୟାଳୟକୁ ଉକ୍ତ ରାସ୍ତା ଦେଇ ଜନସାଧାରଣ ଯାତାୟତ କରୁଥିବା ବେଳେ ଥାନା ସମ୍ମୁଖରେ ବେଆଇନ ଭାରୀଯାନ ପାର୍କିଂ ଯୋଗୁଁ ଅନେକ ସମୟରେ ସହରବାସୀଙ୍କୁ ମନୁଷ୍ୟକୃତ ଟ୍ରାଫିକ୍‌‌ ସମସ୍ୟାର ସମ୍ମୁଖୀନ ହେବାକୁ ପଡୁଛି । ବିଶେଷକରି ପ୍ରାତଃ ଓ ସାନ୍ଧ୍ୟ ଭ୍ରମଣରେ ଉକ୍ତ ରାସ୍ତା ଦେଇ ଚାଲି ଚାଲି ଯାଉଥିବା ସହରର ବରିଷ୍ଠ ନାଗରିକ ଥାନା ସମ୍ମୁଖ ବେଆଇନ ଭାରୀଯାନ ପାର୍କିଂ ଯୋଗୁଁ ଛୋଟବଡ ଦୁର୍ଘଟଣାର ସମ୍ମୁଖୀନ ହେଉଥିଲେ ହେଁ ପୁଲିସ ଭୟରେ କେହି ମୁହଁ ଖୋଲିବାକୁ ସାହାସ ଜୁଟାଇ ପାରୁନାହାନ୍ତି । ଏପରିକି ଦୁର୍ଘଟଣାଗ୍ରସ୍ତ ଟ୍ରକ୍‌‌ ପାର୍କିଂ ଯୋଗୁଁ ଉକ୍ତ ରାସ୍ତା ଉନ୍ନତିକରଣ ସମୟରେ ଥାନା ସମ୍ମୁଖ ଅଳ୍ପ ରାସ୍ତା ପିଚୁ କାର୍ଯ୍ୟ ହୋଇନପାରିବା ଦେଖିବାକୁ ମିଳିଛି । ଏଭଳିସ୍ଥିତିରେ ସହରବାସୀଙ୍କ ମୂଲ୍ୟବାନ ଧନଜୀବନକୁ ଦୃଷ୍ଟିରେ ରଖି ପୁଲିସ ପ୍ରଶାସନ ତୁରନ୍ତ ରାସ୍ତା ଉପରେ ମାସ ମାସ ଧରି ବେଆଇନ ଭାବେ ରଖିଥିବା ଦୁର୍ଘଟଣାଗ୍ରସ୍ତ ଟ୍ରକ ଗୁଡିକୁ ତୁରନ୍ତ ରାସ୍ତା ଉପରୁ ଅପସାରଣ କରିବାକୁ ବରିଷ୍ଠ ନାଗରିକ ରମାକାନ୍ତ ମହାନ୍ତି ଓ ମନୋରଞ୍ଜନ ଜେନା ଦାବି କରିଛନ୍ତି।