ଇନ୍ଦୋର : ଆମେରିକାର ପୂର୍ବତନ ରାଷ୍ଟ୍ର ସଚିବ ହିଲାରୀ କ୍ଲିଣ୍ଟନ ରବିବାରଠାରୁ ୩ ଦିନିଆ ଭାରତର ମଧ୍ୟପ୍ରଦେଶ ଗସ୍ତରେ ଆସିଛନ୍ତି । ରବିବାର ରାତି ପ୍ରାୟ ୮ଟା ସମୟରେ ସେ ମଧ୍ୟପ୍ରଦେଶରେ ଦେବୀ ଅହଲ୍ୟାବାଇ ହୋଲକର ବିମାନବନ୍ଦରରେ ପହଞ୍ଚିଥିଲେ । ସେଠାରୁ ତାଙ୍କୁ କଡ଼ା ସୁରକ୍ଷା ମଧ୍ୟରେ ଖାରଗୋନି ଜିଲାର ମାହେଶ୍ୱର ସହରକୁ ନିଆଯାଇଛି । ସେ ସେଠାରେ ହୋଲକର ଶାସିତ ରାଜ୍ୟକୁ ବୁଲି ଦେଖିବେ । ଏହା ତାଙ୍କର ଏକ ଘରୋଇ ଗସ୍ତ ବୋଲି ଖାରଗୋନି ଜିଲାପାଳ ଅଶୋକ କୁମାର ବର୍ମା ପ୍ରକାଶ କରିଛନ୍ତି । ସେ ଏହି ଗସ୍ତ କାଳରେ ଭାରତର ବିଭିନ୍ନ ଐତିହପୂର୍ଣ୍ଣ ସ୍ଥାନ ପରିଭ୍ରମଣ କରିବେ । ମଧ୍ୟପ୍ରଦେଶର ବିଭିନ୍ନ ସ୍ଥାନ ବୁଲିବା ପରେ ସେଠାରୁ ସେ ଆମେରିକା ପ୍ରତ୍ୟାବର୍ତ୍ତନ କରିବେ ବୋଲି ସୂଚନା ଦିଆଯାଇଛି। ହୋଲକର ରାଜବଂଶଜ ରିଚାର୍ଡ ହୋଲକରଙ୍କ ଆମନ୍ତ୍ରଣରେ ହିଲାରୀ ମଧ୍ୟପ୍ରଦେଶ ଗସ୍ତରେ ଆସିଥିବା ଜାଣିବାକୁ ମିଳିଛି ।
