ରେଙ୍ଗାଲି : ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ରେଙ୍ଗାଲିବ୍ଲକ ଅଞ୍ଚଳର ଜନଜୀବନ ପ୍ରଭାବିତ ହୋଇପଡିଛି। ସକାଳ ୧୦ଟାରୁ ତାତି ଅସହ୍ଯ ହୋଇ ତାପମାତ୍ରା ୩୭/୩୮ ଡିଗ୍ରୀ ରହୁଥିବା ବେଳେ ମଧ୍ଯାହ୍ନରେ ୪୦ ରୁ ୪୧ଡିଗ୍ରୀ ସେଲସିୟସକୁ ଛୁଇଁଛି। ଅପରାହ୍ନ ୨ଟା ୩୦ମିନିଟରେ ବ୍ଳକର ତାପମାତ୍ରା ୪୨ ଡିଗ୍ରୀକୁ ଛୁଇଁଛି। ପ୍ରଚଣ୍ଡ ତାତିରେ ପଙ୍ଖାରୁ ବି ତତଲା ପବନ ବାହାରୁଛି। ଲୋକେ ତ୍ରାହି ତ୍ରାହି ଡାକ ଛାଡୁଛନ୍ତି।
ତେବେ ପରିତାପର ବିଷୟ ଯେ ଏଭଳି ଉତ୍ତପ୍ତ ଆଗ୍ନେୟଗିରି ଭଲି ପରିବେଶରେ ଜନ ଜୀବନ ଡହଳ ବିକଳ ହେଉ ଥିବାବେଳେ ବ୍ଳକ ଅଞ୍ଚଳରେ ସ୍କୁଲ କଲେଜ ଖୋଲା ରହିଛି। କୋମଳମତି ଛାତ୍ରଛାତ୍ରୀ ପ୍ରଚଣ୍ଡ ତାତିରେ ଛଟପଟ ହୋଇ ପାଠ ପଢୁଥିଲେ ବି ଏପର୍ଯ୍ୟନ୍ତ ଖରାଛୁଟି ଘୋଷଣା କରାଯାଇ ନଥିବାରୁ ଜନସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି। ଶୀତତାପ ନିୟନ୍ତ୍ରିତ କୋଠରୀ ଭିତରେ ବସି ନୀତିନିୟମ ନିର୍ଦ୍ଧାରଣ କରୁଥିବା ଉଚ୍ଚ କର୍ତ୍ତୃପକ୍ଷଙ୍କୁ ପ୍ରଚଣ୍ଡ ଗ୍ରୀଷ୍ମ ପ୍ରବାହର ଅନୁଭୂତ ହେଉ ନଥିବାରୁ ବୋଧହୁଏ ଖରାଛୁଟି ଘୋଷଣା ହେଉନାହିଁ ବୋଲି ସମାଲୋଚକ ମହଲରେ ପ୍ରତିକ୍ରିୟା ପ୍ରକାଶ ପାଉଛି। ଆଉ କେତେ ଡିଗ୍ରୀ ଟପିଲେ ଖରାଛୁଟି ଘୋଷଣା ହେବ ବୋଲି ପ୍ରଶ୍ନ ହେଉଛି। ଛାତ୍ରଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଶୀଘ୍ର ଖରାଛୁଟି ଘୋଷଣା କରାଯାଉ ବୋଲି ଦାବି ହେଉଛି। ଖରାକୁ ଦେଖି ଜିଲ୍ଲାପାଳ ସ୍କୁଲ ବନ୍ଦର ନିଷ୍ପତ୍ତି ନେବେ ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଘୋଷଣା କରି ଥିବା ପରିପ୍ରେକ୍ଷୀରେ ସମ୍ବଲପୁର ଜିଲ୍ଲାପାଳ ଏଦିଗରେ ଦୃଷ୍ଟିଦେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।
