ଧରାପଡ଼ିଲା ଦୁର୍ଦ୍ଦାନ୍ତ ଅପରାଧୀ କାଳିଆ

କଟକ : ସ୍ତ୍ରୀକୁ ନିର୍ଯାତନା ଦେବା ଘଟଣାରେ ବାଦାମବାଡି ଥାନା ପୁଲିସ ଜଣେ ଦୁର୍ଦ୍ଦାନ୍ତ ଅପରାଧୀକୁ ଗିରଫ କରିଛି। ଅଭିଯୁକ୍ତ ଜଣକ ହେଲେ ଶଙ୍କରପୁର ପରିଡା ସାହିର ମଧୁସୂଦନ ବୈଠାଲ ଓରଫ କାଳିଆ(୩୭) । ତାକୁ ଅଦାଲତ ଚାଲାଣ କରାଯାଇଥିବା ଥାନା ଅଧିକାରୀ ରଶ୍ମିରଞ୍ଜନ ମହାପାତ୍ର କହିଛନ୍ତି।
ଅଭିଯୁକ୍ତ କାଳିଆ ଜଣେ ପେସାଦାର ଅପରାଧୀ। ମୁଖ୍ୟତଃ ଧମକଚମକ, ଦାଦାବଟି ଆଦାୟ, ବୋମାମାଡ, ଗଣ୍ଡଗୋଳ କରିବା ତା’ର ପେଶା। ପୂର୍ବରୁ କାଳିଆ ନାମରେ ବିଭିନ୍ନ ଥାନାରେ ଅପରାଧୀକ ମାମଲା ରହିଥିଲା। ନିକଟରେ ସେ ଜାମିନରେ ଆସିଥିଲା। ବାରମ୍ବାର ଜେଲ ଯିବା ସତ୍ତ୍ବେ କାଳିଆ ତା’ର ସ୍ୱଭାବରେ କୌଣସି ପରିବର୍ତ୍ତନ ଆଣି ନଥିଲା। ରାସ୍ତାଘାଟରେ ଉତ୍ପାତ କରିବା ସହିତ ପ୍ରତିଦିନ ମଦ ପିଇ ଘରକୁ ଆସି ସ୍ତ୍ରୀକୁ ମାରଧର କରୁଥିଲା। ତେବେ ମଙ୍ଗଳବାର ନିର୍ଯାତନାର ସବୁ ସୀମା ଟପିଯାଇଥିଲା। ନିଶାଶକ୍ତ ଅବସ୍ଥାରେ କାଳିଆ ସ୍ତ୍ରୀକୁ ନିସ୍ତୁକ ମାଡ ମାରିଥିଲା । ପାଟିଶୁଣି ପଡୋଶୀ ମହିଳା କାଳିଆ ସ୍ତ୍ରୀକୁ ଉଦ୍ଧାର କରିଥିଲେ । ଚିକିତ୍ସା ପରେ ସେ ଘଟଣା ସଂକ୍ରାନ୍ତରେ ଥାନାରେ ଅଭିଯୋଗ କରିଥିଲେ। ଏତଲାକ୍ରମେ ବାଦାମବାଡି ପୁଲିସ ମାମଲା ରୁଜୁକରି କାଳିଆକୁ ଗିରଫ କରିଛି।