ହରଭଙ୍ଗା :ବୈାଦ୍ଧ ଜିଲା ହରଭଙ୍ଗା ବ୍ଲକ ପୁରୁଣାକଟକ ଥାନା ଅନ୍ତର୍ଗତ ଭବାନୀପୁର ଗ୍ରାମର ଶୈଶବ ସାହୁଙ୍କ ପୁଅ ଗୋବିନ୍ଦ ସାହୁ(୨୫)ଙ୍କ ଝୁଲନ୍ତା ମୃତଦେହ ନୟାଗଡ଼ ଜିଲା ଦଶପଲ୍ଲା କୁଟିବାରୀ ଜଙ୍ଗଲରୁ ପୁଲିସ ଉଦ୍ଧାର କରିଥିବା ଜଣାପଡ଼ିଛି। ସ୍ଥାନୀୟ ଅଞ୍ଚଳର କିଛି ବ୍ୟକ୍ତି ଜଙ୍ଗଲକୁ ପତ୍ରତୋଳି ଯାଇଥିବା ବେଳେ ମୃତଦେହକୁ ଦେଖି ପୁଲିସକୁ ସୂଚନା ଦେଇଥିଲେ। ଘଟଣାସ୍ଥଳରେ ଯୁବକଙ୍କ ଏକ ଟ୍ରଲି ବ୍ୟାଗ ଓ ଗଛ ମୂଳରେ ଚପଲ ରହିଥିବା ବେଳେ ପାରିପାର୍ଶ୍ବିକସ୍ଥିତି ଏବଂ ପ୍ରାଥମିକ ତଦନ୍ତରୁ ପୁଲିସ ଯୁବକ ଜଣଙ୍କ ଆତ୍ମହତ୍ୟା କରିଥିବା ସନ୍ଦେହ କରୁଛି।
ଘଟଣାସ୍ଥଳରେ ଦଶପଲ୍ଲା ଥାନା ଅଧିକାରୀ ମୁକେଶ କୁମାର ବେହେରା ଉପସ୍ଥିତ ରହି ତଦନ୍ତ ଚଳାଇଛନ୍ତି। ମୃତକଙ୍କ ପରିଚୟ ଜାଣିବା ପାଇଁ ମାଜିଷ୍ଟ୍ରେଟ ତଥା ଅତିରିକ୍ତ ତହସିଲଦାରଙ୍କ ଉପସ୍ଥିତିରେ ବ୍ୟାଗ୍ ଖୋଲା ଯାଇଥିଲା। ସେଥିରୁ ମିଳିଥିବା ଆଧାରକାର୍ଡ଼ରୁ ଯୁବକଙ୍କ ଘର ଠିକଣା ଜଣାପଡିଥିଲା। ଯଦି ଯୁବକ ଜଣଙ୍କ ଆତ୍ମହତ୍ୟା କରିଥାଏ, ତାହାହେଲେ ଏଠାକୁ କେଉଁ ପରିସ୍ଥିତିରେ ପହଞ୍ଚିଲା ତାକୁ ନେଇ ପୁଲିସ ଅଧିକ ତଦନ୍ତ ଚଳେଇଛି। ମୃତଦେହ ବ୍ୟବଛେଦ ପରେ ମୃତ୍ୟୁ କାରଣ ସ୍ପଷ୍ଟ ହେବ ବୋଲି ସୂଚନା ମିଳିଛି।
Comments are closed.