ଆଠଗଡ : ଆଠଗଡ ବ୍ଲକ ଅନ୍ତର୍ଗତ କଟକିଆସାହି ପଞ୍ଚାୟତର ବଉଳପଦାସ୍ଥିତ ହରିବାବା ଛାତ୍ର ମଙ୍ଗଳ ଦାତବ୍ୟ ସଂସ୍ଥା ଆନୁକୁଲ୍ୟରେ ବୁଧବାର ଗତ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ବିଦ୍ୟାର୍ଥୀଙ୍କୁ ଜ୍ଞାନଜ୍ୟୋତି ପ୍ରତିଭା ସମ୍ମାନ ପ୍ରଦାନ କରାଯାଇଛି । ସଂସ୍ଥାର ମୁଖ୍ୟ ଉପଦେଷ୍ଟା ସାଧୁ ଗଦାଧର ଦାସଙ୍କ ପୃଷ୍ଠପୋଷକତାରେ ଏବଂ ଶିକ୍ଷାବିତ୍ ଶ୍ୟାମସୁନ୍ଦର ବାରିକଙ୍କ ସଭାପତିତ୍ୱରେ ଆୟୋଜିତ ଏହି ସମାରୋହକୁ ଶିକ୍ଷାବିତ୍ ତଥା ସଂପାଦକ ଶ୍ରୁତିଧର ପ୍ରଧାନ ସଂଯୋଜନା କରିଥିଲେ। ନଦୀକୂଳ ଅଞ୍ଚଳରେ ଗୁଣାତ୍ମକ ଶିକ୍ଷାର ବିକାଶ ଦିଗରେ ଜ୍ଞାନଜ୍ୟୋତି ପ୍ରତିଭା ସମ୍ମାନ ବିଦ୍ୟାର୍ଥୀଙ୍କ ପାଇଁ ପ୍ରେରଣାର ଉତ୍ସ ହେବ ବୋଲି ପ୍ରଧାନ ଶିକ୍ଷକ ତଥା ସଦସ୍ୟ ବନବିହାରୀ ଦାସ, ଧରଣୀଧର ମହାପାତ୍ର ଓ ବିଷ୍ଣୁଚରଣ ସାହୁ ପ୍ରମୁଖ ବକ୍ତାମାନେ ମତବ୍ୟକ୍ତ କରିଥିଲେ । ନଦୀକୂଳ ଅଞ୍ଚଳର ପାଟେଣିଗାଁସ୍ଥିତ ସର୍ପେଶ୍ୱର ବିଦ୍ୟାପୀଠ ଓ ମେଘାର ବିଶ୍ୱେଶ୍ୱର ପ୍ରକଳ୍ପ ହାଇସ୍କୁଲରେ ଗତ ମାଟ୍ରିକ ପରୀକ୍ଷାରେ ଏ-୧, ଏ-୨, ବି-୧ ଓ ବି-୨ ଗ୍ରେଡରେ ଉତ୍ତୀର୍ଣ୍ଣ ହୋଇଥିବା ୩୨ଜଣ ବିଦ୍ୟାର୍ଥୀଙ୍କୁ ଜ୍ଞାନଜ୍ୟୋତି ପ୍ରତିଭା ସମ୍ମାନ ସ୍ୱରୂପ ପୁଷ୍ପଗୁଚ୍ଛ, ଉତ୍ତରୀୟ ଓ ଫଳକ ଦେଇ ସମ୍ବର୍ଦ୍ଧିତ କରାଯାଇଥିଲା । ସଂସ୍ଥାର ସଦସ୍ୟ ସୁରେଶ ଚନ୍ଦ୍ର ପଣ୍ଡା, ରାଜକିଶୋର ପଣ୍ଡା, ରାଧାନାଥ ପଣ୍ଡା, ବିଭୁତି ଭୂଷଣ ସାମଲ ଓ ଟୁକୁନା କଅଁର କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଶେଷରେ ସହ ସଂପାଦକ ଫକିର ଚରଣ ପାଣି ଧନ୍ୟବାଦ ଅର୍ପଣ କରିଥିଲେ।
Comments are closed.