ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଶୁଭେଚ୍ଛା ପାଇଁ ଜନଜାତି ବିଦ୍ୟାଳୟରେ ସାନ୍ତାଳି ନୃତ୍ୟ ପ୍ରଦର୍ଶନ

ଗୁରୁଡିଝାଟିଆ: ଓଡିଆ ଝିଅ ଦ୍ରୌପଦୀ ମୁର୍ମୁ ଦେଶର ସର୍ବୋଚ୍ଚ ଆସନ ମହାମହିମ ରାଷ୍ଟ୍ରପତି ପଦରେ ଆଜି ଶପଥ ଗ୍ରହଣ କରିଛନ୍ତି। ମହାମହିମ ରାଷ୍ଟ୍ରପତି ଶ୍ରୀମତୀ ମୁର୍ମୁ ଓଡିଆ ମାଆର ସୁଯୋଗ୍ୟା ସନ୍ତାନ। ତାଙ୍କର ଦେଶର ସର୍ବୋଚ୍ଚ ଆସନ ଆସୀନ ହେବା ସାଢେ ୪କୋଟି ଓଡିଆଙ୍କ ଗର୍ବ ଓ ଗୌରବ ବୋଲି ବକ୍ତାମାନେ ପ୍ରକାଶ କରିଥିଲେ। ପ୍ରାୟ ୩ଶହରୁ ଅଧିକ ଛାତ୍ରୀମାନେ ମହାମହିମ ଓଡ଼ିଆ ଝିଅ ଦ୍ରୌପଦୀ ମୁର୍ମୁଙ୍କ ପାଇଁ ନିଜକୁ ନୃତ୍ୟ ଓ ଗୀତରେ ହଜାଇ ଦେଇଥିଲେ। ସାନ୍ତାଳି ନୃତ୍ୟ ସାଙ୍ଗକୁ ଆଦିବାସୀ ନୃତ୍ୟ ସଂଗୀତରେ ବିଦ୍ୟାଳୟ ପରିବେଶ ଉଚ୍ଚୁଳି ପଡିଥିଲା।

ଆମେ ବି ମଧ୍ୟ ହାରିବୁ ନାହିଁ। ପ୍ରତିକୂଳ ପରିବେଶ ଭିତରେ ଆଗକୁ ଯାଇ ଗାଁ,ରାଜ୍ୟ ଓ ଦେଶର ନାମ ରଖିବୁ ଆମ ରାଷ୍ଟ୍ରପତିଙ୍କ ଭଳି ବୋଲି ଛାତ୍ରୀମାନେ କହିଥିଲେ। ବିଦ୍ୟାଳୟ ପକ୍ଷରୁ ପ୍ରଧାନଶିକ୍ଷୟିତ୍ରୀ ସବିତା ଘଡେଇଙ୍କ ଅଧ୍ୟକ୍ଷତାରେ ଏକ ସଭା ଅନୁଷ୍ଠିତ ହୋଇଥିଲା। ଜିଲ୍ଲା ପରିଷଦ ସଦସ୍ୟ ବଳଭଦ୍ର ବାଘ, ଅନୁସୂଚିତ ଜାତି ଓ ଜନଜାତି ବିଦ୍ୟାଳୟର ସର୍କଲ ଇନ୍ସପେକ୍ଟର ସଂଗୀତା ବେହେରା ଓ ବିଦ୍ୟାଳୟ ପରିଚାଳନା କମିଟିର ସଦସ୍ୟ, ସଦସ୍ୟା ,ପଞ୍ଚାୟତ ଜନପ୍ରତିନିଧି ପ୍ରମୁଖ ଅତିଥି ଭାବରେ ଯୋଗଦେଇଥିଲେ। ବିଦ୍ୟାଳୟର ବରିଷ୍ଠ ଶିକ୍ଷୟିତ୍ରୀ ଜ୍ୟୋତିର୍ମୟୀ ମହାନ୍ତିଙ୍କ ସଂଯୋଜନାରେ ସାନ୍ତାଳି ନୃତ୍ୟ, ଜନଜାତି ନୃତ୍ୟ ଓ ସଂଗୀତ ପରିବେଷିତ ହୋଇଥିଲା। ବିଦ୍ୟାଳୟର ବରିଷ୍ଠ ଶିକ୍ଷୟିତ୍ରୀ ଶ୍ୱେତପଦ୍ମା ମହାନ୍ତି ଧନ୍ୟବାଦ ଅର୍ପଣ କରିଥିଲେ। ଏଥିରେ ଆଠଗଡ ବ୍ଳକ ଅନ୍ତର୍ଗତ ମାଧବପୁର ଅନୁସୂଚିତ ଜାତି ଓ ଜନଜାତି ବିଦ୍ୟାଳୟର ବିଦ୍ୟାର୍ଥୀମାନେ ସାମିଲ ହୋଇଛନ୍ତି।