ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ଆମ୍ବପୁଆ ସ୍ଥିତ ଶିବାନନ୍ଦ ନଗର ଛକରେ ଗତକାଲି ସନ୍ଧ୍ୟା ସମୟରେ ଦୁର୍ବତ୍ତମାନେ ଏକ ବାଇକରେ ଆସି ମହିଳାଙ୍କ ବେକରୁ ସୁନାର ମଙ୍ଗଳସୂତ୍ର ଝାମ୍ପି ନେଇ ଚମ୍ପଟ ମାରିଥିବା ନେଇ ଥାନାରେ ଲିଖିତ ଅଭିଯୋଗ ହୋଇଛି।
ସୂଚନା ପ୍ରକାରେ ରଘୁନାଥପୁର ଗ୍ରାମର ଟି. ମହୋନ ରାଓ ଗତକାଲି ସନ୍ଧ୍ୟା ପ୍ରାୟ ସାଢେ ୪ ସମୟରେ ଭଉଣୀ ଓ ଭାଉଜଙ୍କ ସହ ମିଶି ନିଜେ ରହିବା ପାଇଁ ଘର ଭଡ଼ା ଖୋଜିବାକୁ ଆମ୍ବପୁଆ ସ୍ଥିତ ଶିବାନନ୍ଦ ନଗରକୁ ଯାଉଥିବା ବେଳେ ଛକରେ ଦୁଇ ଜଣ ଅଜଣା ବ୍ୟକ୍ତି ଏକ ବାଇକରେ ଆସି ହିନ୍ଦୀରେ ଏହି ରାସ୍ତାଟି କେଉଁ ଆଡେ ଯାଇଛି ପଚାରିଥିଲେ।
ଏହାପରେ ବାଇକ ପଛରେ ବସିଥିବା ବ୍ୟକ୍ତି ଜଣକ ଭଉଣୀର ମୁହଁକୁ ମାଡ଼ ମାରି ବେକରେ ପିନ୍ଧିଥିବା ପ୍ରାୟ ୧୭ ଗ୍ରାମର ସୁନାର ମଙ୍ଗଳ ସୂତ୍ରକୁ ଝାମ୍ପି ନେଇ ଚାଲିଯାଇଥିଲେ। ଉକ୍ତ ବାଇକ ନମ୍ବରଟି ଓଡ଼ି ୧୩ ଏଲ ୪୮୫୩ ବୋଲି ଅଭିଯୋଗ ପତ୍ରରେ ଉଲ୍ଲେଖ ରହିବା ସହ ଅନ୍ୟ ଏକ ବାଇକରେ ଆଉ ଦୁଇ ଜଣ ରହିଥିବା ନେଇ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପ୍ରକାରେ ପୁଲିସ କେସ ନମ୍ବର ୯୬/୨୪ ମାମଲା ରୁଜୁ କରି ତଦନ୍ତ ଚାଲିଥିବା ଥାନା ଅଧିକାରୀ ବିବେକାନନ୍ଦ ସ୍ୱାଇଁ ସୂଚନା ଦେଇଛନ୍ତି।
Comments are closed.