୭କୋଟି ବ୍ୟୟରେ ଗୋପାଳପୁର ଓ ମାର୍କଣ୍ଡିଠାରେ ମୁହାଣ ଖନନ ପାଇଁ ଭିତ୍ତିପ୍ରସ୍ତର ସ୍ଥାପନ

ଗୋପାଳପୁର: ଗୋପାଳପୁର ଏନଏସିରେ ବୁଧବାର ନିର୍ବାହୀ ଅଧିକାରୀ ତ୍ରିନାଥ ବେହେରାଙ୍କ ଅଧ୍ୟକ୍ଷତାରେ ସ୍ୱାୟତ୍ତ ଶାସନ ଦିବସ ପାଳିତ ହୋଇଯାଇଛି। ଏହି ଅବସରରେ କାର୍ଯ୍ୟାଳୟଠାରେ ଅଧ୍ୟକ୍ଷ ଏ.ଜାନକୀ ରାମ ପତାକା ଉତ୍ତୋଳନ କରିଥିଲେ। ଏହି ଅବସରରେ ମୁଖ୍ୟ ଅତିଥି ଭାବେ ବ୍ରହ୍ମପୁର ସାଂସଦ ଚନ୍ଦ୍ର ଶେଖର ସାହୁ, ଗଞ୍ଜାମ ଜିଲ୍ଲାପାଳ ଦିବ୍ୟ ଜ୍ୟୋତି ପରିଡ଼ା, ପ୍ରଶାସନିକ ଅଧିକାରୀ ଭି.କୀର୍ତ୍ତି ଭାସନ୍, ଡୁଡା ପିଡ଼ି ସଚ୍ଚିଦାନନ୍ଦ ନାୟକ, ଜିଲ୍ଲା ପରିଷଦ ଉପାଧକ୍ଷା ରାଜେଶ୍ୱରୀ ଦୋରା, ମୁଖ୍ୟମନ୍ତ୍ରୀଙ୍କ ରାଜନୈତିକ ସଚିବ ଡଃ ଗୋପବନ୍ଧୁ ଦାସ ପ୍ରମୁଖ ଯୋଗ ଦେଇଥିଲେ। ଏହି‌ କାର୍ଯ୍ୟକ୍ରମ ପରେ ଗୋପାଳପୁର ବେକ ଓ୍ବାଟରଠାରେ ଥିବା ମତ୍ସ୍ୟ ଅବତରଣ କେନ୍ଦ୍ର ନିକଟରେ ପ୍ରାୟ ୭ କୋଟି ଟଙ୍କା ବ୍ୟୟରେ ବାହାନା ନାଳ ମୁହାଣ ଓ ବାହାଡା ନାଳ ମୁହାଣ ଖନନର ଭିତ୍ତି ପ୍ରସ୍ତର ସ୍ଥାପନ କରାଯାଇଛି।

ଏହି ଅବସରରେ ସାଂସଦ ଶ୍ରୀ ସାହୁ ମତ୍ସ୍ୟଜୀବୀଙ୍କ ଜୀବିକା ନିର୍ବାହ ପାଇଁ ୧୫୦ କୋଟି ଟଙ୍କା ବ୍ୟୟରେ ୨ ଟି ସ୍ଥାନରେ ସବୁଦିନିଆ ମୁହାଣ ନିର୍ମାଣ ପାଇଁ ପ୍ରସ୍ତାବ ରହିଥିବା କହିଥିଲେ। ଏହି ମୁହାଣ ଖନନ ଦ୍ବାରା ଆଖ ପାଖ ଅଞ୍ଚଳର ପ୍ରାୟ ୩୦ ହଜାର ମତ୍ସ୍ୟଜୀବୀ ଉପକୃତ ହୋଇପାରିବେ ବୋଲି କହିଥିଲେ। ପରେ ପୋଷ୍ଟ ଅଫିସ ନିକଟରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ପୁଷ୍ପ ମାଲ୍ୟାର୍ପଣ କରାଯାଇଥିଲା। ସ୍ଥାନୀୟ ଶ୍ରଦ୍ଧା ସଂଜୀବନୀ ଜରା ନିବାସ ଅନ୍ତେ ବାସୀଙ୍କୁ ଫଳ ଓ ମିଠା ବଣ୍ଟନ କରାଯାଇଥିଲା। ଏଥିସହ ସ୍ଥାନୀୟ ବସ ଷ୍ଟାଣ୍ଡଠାରେ ଏକ ସଭା ଅନୁଷ୍ଠିତ ହୋଇଥିଲା। ସଭାରେ ସଫେଇ କର୍ମଚାରୀଙ୍କୁ ରେନ୍ କୋଟ ଓ ସାଲ ବଣ୍ଟନ କରାଯାଇଛି। ତାହା ସହ ପୂର୍ବରୁ ଆୟୋଜିତ ବିଭିନ୍ନ ପ୍ରତିଯୋଗିତାର କୃତିତ୍ୱ ହାସଲ କରିଥିବା ମହିଳା ସଂଘ ସଦସ୍ୟାଙ୍କୁ ମାନପତ୍ର ସହ ପୁରସ୍କାର ପ୍ରଦାନ କରାଯାଇଥିଲା। ଏହି କାର୍ଯ୍ୟକ୍ରମରେ ଉପାଧ୍ୟକ୍ଷା ବି.ଉମାଙ୍କ ସମେତ ସମସ୍ତ କାଉନସିଲର, ଏନଏସି କର୍ମଚାରୀ, ସଫେଇ କର୍ମଚାରୀ ପ୍ରମୁଖ ଉପସ୍ଥିତ ଥିଲେ।