ଅଭିବୃଦ୍ଧି ଓ ଅନ୍ତର୍ଭୁକ୍ତୀକରଣକୁ ପ୍ରେତ୍ସାହିତ କରୁଛି ଜିଇଏମ୍, ଭାରତୀୟ ଅର୍ଥନୀତି ଉପରେ ସକାରାତ୍ମକ ପ୍ରଭାବ

ନୂଆଦିଲ୍ଳୀ: ଏକ ଦେଶର ଅର୍ଥନୈତିକ ଅଭିବୃଦ୍ଧିରେ ସରକାରୀ କ୍ରୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ, ଯାହା ଏହାର ନାଗରିକଙ୍କ ଜୀବନକୁ ସିଧାସଳଖ ପ୍ରଭାବିତ କରିଥାଏ । ଯେତେବେଳେ ସରକାର ଦକ୍ଷତାର ସହ ଏବଂ ସ୍ୱଚ୍ଛ ଭାବରେ ସାମଗ୍ରୀ ଏବଂ ସେବା କ୍ରୟ କରନ୍ତି, ଏହା କେବଳ ସରକାରୀ ପାଣ୍ଠିର ପ୍ରଭାବଶାଳୀ ବ୍ୟବହାର ସୁନିଶ୍ଚିତ କରେ ନାହିଁ ବରଂ ସମସ୍ତ ଆକାରର ବ୍ୟବସାୟ ପାଇଁ ଅର୍ଥନୈତିକ ସୁଯୋଗକୁ ମଧ୍ୟ ଉତ୍ସାହିତ କରେ । ଏହା ଫଳରେ ରୋଜଗାର ବୃଦ୍ଧି ପାଇଥାଏ, ନବସୃଜନକୁ ପ୍ରୋତ୍ସାହନ ମିଳେ ଏବଂ ସାମଗ୍ରିକ ସାମାଜିକ ବିକାଶରେ ସହାୟକ ହୋଇଥାଏ। ଭାରତରେ, ସରକାରୀ ଇ-ମାର୍କେଟପ୍ଲେସ୍ (ଜିଇଏମ୍) ସରକାରୀ କ୍ରୟରେ ଏକ ଗେମ୍-ଚେଞ୍ଜର ଭାବରେ ଉଭା ହୋଇଛି, ଯାହା ଏକ ମୁକ୍ତ ଏବଂ ଅନ୍ତର୍ଭୁକ୍ତ ପ୍ଲାଟଫର୍ମ ସୃଷ୍ଟି କରିଛି ଯାହା କେବଳ ସରକାରୀ କ୍ରେତା ନୁହଁନ୍ତି ବରଂ ସ୍ଥାନୀୟ ଉଦ୍ୟୋଗୀ, ଷ୍ଟାର୍ଟଅପ୍ ଏବଂ କ୍ଷୁଦ୍ର ବ୍ୟବସାୟୀମାନଙ୍କୁ ମଧ୍ୟ ଉପକୃତ କରୁଛି ।

ଦେଶର ସାମାଜିକ ବିକାଶ ସହିତ ତାଳଦେଇ ଜିଇଏମ୍ ଷ୍ଟାର୍ଟଅପ୍ ଗୁଡ଼ିକୁ ୩୫,୯୫୦ କୋଟି ଟଙ୍କାର ଅର୍ଡର ପୂରଣ କରିବାରେ ସକ୍ଷମ କରିଛି। ଜିଇଏମର ମୋଟ ବିକ୍ରେତା ସଂଖ୍ୟାର ୮% ମହିଳା ଉଦ୍ୟୋଗୀ, ଜିଇଏମ୍ ପୋର୍ଟାଲରେ ପଞ୍ଜୀକୃତ ସମୁଦାୟ ୧,୭୭,୭୮୬ ଜଣ ଉଦ୍ୟମ-ଭେରିଫାଏଡ୍ ମହିଳା ଅଣୁ ଏବଂ କ୍ଷୁଦ୍ର ଉଦ୍ୟୋଗ (ଏମ୍ଏସ୍ଇ) ୪୬,୬୧୫ କୋଟି ଟଙ୍କାର ସମୁଦାୟ ଅର୍ଡର ମୂଲ୍ୟ ପୂରଣ କରିଛନ୍ତି।

ଗଭର୍ଣ୍ଣମେଣ୍ଟ ଇ-ମାର୍କେଟପ୍ଲେସ୍ (ଜିଇଏମ୍) ହେଉଛି ଭାରତରେ ସରକାରୀ କ୍ରୟ ପାଇଁ ଏକ ଅନଲାଇନ୍ ପ୍ଲାଟଫର୍ମ ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପରିକଳ୍ପନା କରାଯାଇଥିଲା । ସରକାରୀ କ୍ରେତାମାନଙ୍କ ପାଇଁ ଏକ ଖୋଲା ଏବଂ ସ୍ୱଚ୍ଛ କ୍ରୟ ପ୍ଲାଟଫର୍ମ ସୃଷ୍ଟି କରିବା ଉଦ୍ଦେଶ୍ୟରେ ବାଣିଜ୍ୟ ଏବଂ ଶିଳ୍ପ ମନ୍ତ୍ରଣାଳୟ ଦ୍ୱାରା ଅଗଷ୍ଟ ୦୯, ୨୦୧୬ରେ ଏହି ପଦକ୍ଷେପ ଆରମ୍ଭ କରାଯାଇଥିଲା ।

ସଦ୍ୟତମ ବଜାର ପରିସଂଖ୍ୟାନ ଅନୁସାରେ ଜିଇଏମ ୧୬୨,୯୮୫ ପ୍ରାଥମିକ କ୍ରେତା, ୨୨୮,୭୫୪ ଦ୍ବିତୀୟ କ୍ରେତା ଏବଂ ୧୧,୦୦୬ ଉତ୍ପାଦ ବର୍ଗ ଏବଂ ୩୩୨ ସେବା ବର୍ଗର ବିବିଧ ପରିସର ସହିତ ଏକ ସୁଦୃଢ଼ ଇକୋସିଷ୍ଟମରେ ପରିଣତ ହୋଇଛି । ଗତ ଆର୍ଥିକ ବର୍ଷରେ ଅର୍ଡର ପରିମାଣ ୬୨,୮୬,୫୪୩ରେ ପହଞ୍ଚିଥିଲା, ଯାହାର ମୋଟ ମୂଲ୍ୟ ୪,୦୩,୩୦୫ କୋଟି ଟଙ୍କା ଥିଲା। ଚଳିତ ଆର୍ଥିକ ବର୍ଷରେ ୪,୫୨,୫୯୪ କୋଟି ଟଙ୍କାର ୬୧,୨୩,୬୯୧ ଅର୍ଡର ରେକର୍ଡ କରାଯାଇଛି। ଉଲ୍ଲେଖଯୋଗ୍ୟ, ମୋଟ ଅର୍ଡର ମୂଲ୍ୟର ୩୭.୮୭% ଅଣୁ ଏବଂ କ୍ଷୁଦ୍ର ଉଦ୍ୟୋଗ (ଏମଏସଇ)ରୁ ଆସୁଛି, ଯାହା ସ୍ଥାନୀୟ ବ୍ୟବସାୟକୁ ସଶକ୍ତ କରିବା ଏବଂ ଅନ୍ତର୍ଭୁକ୍ତ ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହିତ କରିବାରେ ଜିଇଏମର ଭୂମିକାକୁ ଦର୍ଶାଏ ।

ସରକାରୀ ଇ-ମାର୍କେଟପ୍ଲେସ୍ (ଜିଇଏମ୍) ସ୍ୱଚ୍ଛତା, ଦକ୍ଷତା ଏବଂ ସାମଗ୍ରିକତାକୁ ପ୍ରୋତ୍ସାହିତ କରି ଭାରତରେ ସର୍ବସାଧାରଣ କ୍ରୟରେ ପରିବର୍ତ୍ତନ ଆଣିଛି। ଏହା ଷ୍ଟାର୍ଟଅପ୍, ମହିଳା ଉଦ୍ୟୋଗୀ ଏବଂ ଏମଏସଏମଇମାନଙ୍କୁ ସଶକ୍ତ କରି ଜିଇଏମ୍ ଅର୍ଥନୈତିକ ଅଭିବୃଦ୍ଧି ଏବଂ ସାମାଜିକ ସମାନତାକୁ ପ୍ରୋତ୍ସାହିତ କରିଥାଏ ।