ତିଗିରିଆ : ତିଗିରିଆ ବ୍ଳକର ପ୍ରସିଦ୍ଧ ଗଦାଧରପୁର ଶ୍ରୀରଘୁନାଥ ଜୀଉଙ୍କ ଶ୍ରୀରାମ ନବମୀ ପୀଠରେ ଚଳିତ ଥର ୫୦ ବର୍ଷ ପୂର୍ତ୍ତି ରାମନବମୀ ବ୍ରତର ସବର୍ଣ୍ଣ ଜୟନ୍ତୀ ମହାସମାରୋହରେ ପାଳନ କରାଯାଉଛି । ଏଥିପାଇଁ ଗତ ସୋମବାର ଶୁଭ ଖୁଣ୍ଟ ପ୍ରତିଷ୍ଠା ପରଠାରୁ ପୀଠ ଚଳଚଞ୍ଚଳ ହୋଇ ଉଠିଛି। ପୀଠରେ ସାଜସଜ୍ଜା, ନାଟ ମଣ୍ଡପ ଓ ଆନନ୍ଦ ବଜାର ନିର୍ମାଣ ସହିତ ରୋଷଶାଳ ବ୍ୟବସ୍ଥିତ କରିବାରେ ବ୍ରତୀମାନେ ଲାଗି ପଡିଛନ୍ତି। ପ୍ରତି ବର୍ଷ ପରି ଚଳିତ ବର୍ଷ ମଧ୍ୟ ୩ଶହରୁ ଊର୍ଦ୍ଧ୍ବ ପୁରୁଷ ଓ ମହିଳା ବ୍ରତୀ ନବଦିନ ବ୍ୟାପୀ ପୀଠରେ ନିଷ୍ଠାର ସହିତ ବ୍ରତ ପାଳନ କରିବେ ବୋଲି ଆୟୋଜକ ନବମୀ ପରିଷଦ ପକ୍ଷରୁ ଜଣାପଡ଼ିଛି।
ସୁବର୍ଣ୍ଣ ଜୟନ୍ତୀ ଅବସରରେ ପ୍ରତ୍ୟହ ରାତିରେ ବିଭିନ୍ନ ଅଞ୍ଚଳର ରାମଲୀଳା କଳାକାର ଗୋଷ୍ଠୀଙ୍କୁ ନେଇ ଗୀତିନାଟ୍ୟ ପ୍ରତିଯୋଗିତା ଅନୁଷ୍ଠିତ ହେବ। ଏହାଛଡ଼ା ଖ୍ୟାତନାମା ପ୍ରବକ୍ତାଙ୍କ ଦ୍ଵାରା ରାମକଥା ପ୍ରବଚନ ଅନୁଷ୍ଠିତ ହେବ। ଗୁରୁବାର ସକାଳୁ ପୀଠରେ ବିଜେ ଶ୍ରୀ ରଘୁନାଥ ଜୀଉଙ୍କ ସ୍ବତନ୍ତ୍ର ସେବା ପୂଜା ଅନୁଷ୍ଠିତ ହେବା ପରେ ଗ୍ରାମରେ ବିଭିନ୍ନ ସ୍ଥାନରେ ପୂଜା ପାଉଥିବା ଅନ୍ୟାନ୍ୟ ଦେବଦେବୀଙ୍କ ପୀଠରେ ନୂତନ ବାନା ପ୍ରତିଷ୍ଠା କରାଯିବ। ପୂର୍ବାହ୍ନ ସାଢେ଼ ୧୦ଟା ସମୟରେ ନିକଟସ୍ଥ ଖଳି ନଦୀରୁ ବିରାଟ କଳସ ଶୋଭାଯାତ୍ରା ଅନୁଷ୍ଠିତ ହେବ। ଏହାପରେ ପୀଠରେ କଳସ ସ୍ଥାପନ ପରେ ଅଖଣ୍ଡ ଯଜ୍ଞାରମ୍ଭ କରାଯିବ ବୋଲି ସେବକ ପ୍ରଫୁଲ୍ଲ କୁମାର ମହାପାତ୍ର ଓ ଆଚାର୍ଯ୍ୟ ସନ୍ତୋଷ କୁମାର ଶତପଥୀଙ୍କ ଠାରୁ ସୂଚନା ମିଳିଛି। ସନ୍ଧ୍ୟାରେ ଏକ ବର୍ଣ୍ଣାଢ଼୍ୟ ପରିବେଶରେ ସାଂସ୍କୃତିକ ମହୋତ୍ସବର ଉଦଘାଟନ କାର୍ଯ୍ୟକ୍ରମ ରହିଛି। ଏହି ପୀଠରେ ପ୍ରତ୍ୟେହ ସନ୍ଧ୍ୟାରେ ବିଜେ ଚତୁର୍ଦ୍ଧା ବିଗ୍ରହ ପ୍ରଭୁ ଶ୍ରୀରାମ, ମାତା ଜାନକୀ, ଅନୁଜ ଲକ୍ଷଣ ଏବଂ ହନୁମାନଙ୍କର ସ୍ବତନ୍ତ୍ର ନବଧା ବେଶ ଅନୁଷ୍ଠିତ ହୋଇଥାଏ। ଏହି ଦୁର୍ଲଭ ବେଶ ଦର୍ଶନ ପାଇଁ ଶହଶହ ଭକ୍ତ ଓ ଶ୍ରଦ୍ଧାଳୁଙ୍କ ସମାଗମ ହୋଇଥାଏ।
