ଜି.ଉଦୟଗିରି: ସ୍ଥାନୀୟ ଥାନା ଅନ୍ତର୍ଗତ ମାଲିକାପଡି ଗ୍ରାମ ପଞ୍ଚାୟତ ସ୍ଥିତ ବତିଙ୍ଗିଆ କାମିନାଜୁ ନିକଟରେ ଏକ କାର ଭାରସାମ୍ୟ ହରାଇ ରାସ୍ତା ପାର୍ଶ୍ବରେ ଥିବା ଆମ୍ବ ଗଛରେ ପିଟି ହୋଇଯାଇଥିଲା। ଫଳରେ ଜଣକର ମୃତ୍ୟୁ ହୋଇଥିବା ବେଳେ ତିନି ଜଣ ଆହାତ ହୋଇଥିବା ଜଣାପଡିଛି।
ସୂଚନା ଯୋଗ୍ୟ ଯେ ଜି.ଉଦୟଗିରି ପଠାଣ ସାହିର ଚାରି ଜଣ ବ୍ୟକ୍ତି ପ୍ରଭୁଦତ୍ତ ପାଲ(୫୦), ଲତିଫା ନାୟକ(୨୨),ମହେଶ ନାୟକ(୨୭) ଓ ଏମଡି ପୁରଖାନ (୩୮) ମିଶି ଏକ କାର ଯୋଗେ କୌଣସି କାମରେ ମାଲିକାପଡି ଗ୍ରାମ ପଞ୍ଚାୟତ ସ୍ଥିତ ବତିଙ୍ଗିଆ କାମିନାଜୁ ଅଞ୍ଚଳକୁ ଯାଇ ଫେରୁଥିଲେ। ସେମାନେ ଫେରୁଥିବା ସମୟରେ ଉକ୍ତ କାରଟି ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଆମ୍ଭ ଗଛରେ ପିଟି ହୋଇଯାଇଥିଲା। ଖବର ପାଇ ସ୍ଥାନୀୟ ପୁଲିସ ଓ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି ସମସ୍ତଙ୍କୁ ଜି.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ଚାଳକ ଏମଡି ପୁରଖାନଙ୍କ ଡାକ୍ତରଖାନାରେ ମୃତ୍ୟୁ ହୋଇଥିବା ଡାକ୍ତର ସୂଚନା ଦେଇଥିଲେ। ଅନ୍ୟ ତିନି ଜଣ ଆହତ ହୋଇ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି। ଏମଡି ପୁରଖାନଙ୍କ ମୃତ୍ୟୁ ଖବର ପାଇବା ପରେ ଜି.ଉଦୟଗିରି ଡାକ୍ତରଖାନାରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ କାର ଭିତରେ ଥିବା ସୁରକ୍ଷା ବେଲୁନ ଫାଟି ଯାଇ ପ୍ରଚଣ୍ଡ ଶବ୍ଦ ହୋଇଥିଲା ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି। ଜି.ଉଦୟଗିରି ଥାନାରେ ୪୨/୨୨, ଧାରା ୨୭୯/୩୩୭/୩୦୪(ଏ)ଆଇପିସିରେ ଏକ ଅପମୃତ୍ୟୁ ମାମଲି ରୁଜୁ କରି ଏସଆଇ ସ୍ବାଗତିକା ବେହେରାଙ୍କୁ ଏହାର ତଦନ୍ତ ଦାୟିତ୍ବ ଦିଆଯାଇଥିବା ନେଇ ଥାନା ଅଧିକାରୀ ରେବତୀ ଶବର ସୂଚନା ଦେଇଛନ୍ତି।
Comments are closed.