ସେନେଗାଲ : ଏକଦା ଅଣ୍ଡରୱାର୍ଲଡ ଡନ୍ ଛୋଟା ରାଜନ୍ର ଘନିଷ୍ଠ ଥିବା କୁଖ୍ୟାତ ଅପରାଧୀ ରବି ପୁଜାରୀକୁ ପୁଲିସ ପଶ୍ଚିମ ଆଫ୍ରିକୀୟ ରାଷ୍ଟ୍ର ସେନେଗାଲରୁ ଗିରଫ କରିଛି। ବସ୍ତେବରେ ତାକୁ ଗତ ୨୨ତାରିଖରେ ଗିରଫ କରାଯାଇଥିଲେ ମଧ୍ୟ ଅଦାଲତରେ ହାଜର କରାଯିବା ପରେ ଏ ନେଇ ଗଣମାଧ୍ୟମକୁ ସୂଚନା ଦିଆଯାଇଛି। ବିଦେଶ ମନ୍ତ୍ରଣାଳୟ ପକ୍ଷରୁ ରବିର ଭାରତ ପ୍ରତ୍ୟର୍ପଣ ପାଇଁ ପ୍ରସ୍ତୁତି ଚାଲିଛି। ଏଥିପାଇଁ ଅନୁମତି ମିଳିଲେ ମାସକ ମଧ୍ୟରେ ରବି ଭାରତ ପ୍ରତ୍ୟର୍ପିତ ହେବ ବୋଲି ଜଣାପଡ଼ିଛି। ରବି ସେନେଗାଲରେ ‘ମହାରାଜା’ ନାମରେ ଏକ ରେସ୍ତୋରାଁ ଚଳାଉଛି। ଏହାଛଡ଼ା ମୁମ୍ବଇ ସହ ଅନ୍ୟ କେତେକ ଭାରତୀୟ ନଗରୀରେ ମଧ୍ୟ ତାର ବ୍ୟବସାୟ ରହିଛି। ରବିର ଦୁଇ ସହଯୋଗୀ ୱିଲିୟମ ରୋଡ୍ରିଗ୍ସ ଓ ଆକାଶ ସେଟ୍ଟୀଙ୍କୁ ମଧ୍ୟ ପୁଲିସ ଗିରଫ କରିଛି। ରବି ନାମରେ ମୁମ୍ବଇ ପୁଲିସ ରେଡ କର୍ଣ୍ଣର ନୋଟିସ ଜାରି କରାଯାଇଥିଲା। ବଲିଉଡ ସେଲିବ୍ରିଟିଙ୍କୁ ଧମକ ଚମକ ଦେଇ ଅର୍ଥ ଆଦାୟ କରିବା ରବିର ବଡ଼ କାମ। ମହେଶ ଭଟ୍ଟଙ୍କୁ ହତ୍ୟା ଉଦ୍ୟମ ଅଭିଯୋଗ ତା ନାମରେ ରହିଛି।
