ନୂଆଦିଲ୍ଲୀ: ଲୋକସଭା ନିର୍ବାଚନକୁ ନେଇ ବିଜେପି ସମ୍ପୂର୍ଣ୍ଣ ଭାବେ ସକ୍ରିୟ ହୋଇପଡ଼ିଛି। ପିଏମ ମୋଦୀଙ୍କ ନେତୃତ୍ୱରେ ଏନଡିଏ କେନ୍ଦ୍ରରେ ଦମ୍ଦାର୍ ବିଜୟ ହାସଲ ବୋଲି ଆକଳନ କରାଯାଉଛି। ରାମ ମନ୍ଦିର ଉଦ୍ଘାଟନକୁ ବିଜେପିର ମାଷ୍ଟର କାର୍ଡ଼ ଭାବେ ବିବେଚନା କରାଯାଉଛି। ଫେବୃଆରୀ ଶେଷରେ ନିର୍ବାଚନ ତାରିଖ ଘୋଷଣା ନେଇ ମଧ୍ୟ ଚର୍ଚ୍ଚା ହେଉଛି। ଇତି ମଧ୍ୟରେ ପ୍ରଧାନମନ୍ତ୍ରୀ ମୋଦୀ କେଉଁ ସଂସଦୀୟ ଆସନରୁ ନିର୍ବାଚନ ଲଢିବେ ସେ ନେଇ କଳ୍ପନାଜଳ୍ପନା ବଢିବାରେ ଲାଗିଛି। ୨୦୧୯ ଭଳି ପୁଣି ଥରେ ସାଧାରଣ ନିର୍ବାଚନ ପୂର୍ବରୁ ଚର୍ଚ୍ଚା ଜୋର ଧରିଛି ଯେ, ଏଥର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ବାରାଣସୀ ସଂସଦୀୟ କ୍ଷେତ୍ର ବ୍ୟତୀତ ଅନ୍ୟ କେଉଁ ଆସନରୁ ପ୍ରତିଦ୍ୱନ୍ଦ୍ୱିତା କରିବେ କି ନାହିଁ? ଯଦି ଅନ୍ୟ କେଉଁଠୁ ପ୍ରତିଦ୍ୱନ୍ଦ୍ୱିତା କରନ୍ତି, ତେବେ ଏହା କେଉଁ ଆସନ ହେବ?
କନ୍ୟାକୁମାରୀଠୁ ଆରମ୍ଭ କରି ପୁରୀ ପର୍ଯ୍ୟନ୍ତ ଚର୍ଚ୍ଚା:
ଏନେଇ ଏବେ କନ୍ୟାକୁମାରୀଠାରୁ ଆରମ୍ଭ କରି ପୁରୀ ଲୋକସଭା ସଂସଦୀୟ ଆସନ ପର୍ଯ୍ୟନ୍ତର ନାମ ଶୁଣିବାକୁ ମିଳୁଛି। କେହି ମତ ଦେଉଛନ୍ତି ଯେ, ଦକ୍ଷିଣରେ ବିସ୍ତାର ପାଇଁ ମୋଦୀ ସେଠାକାର କୌଣସି ଏକ ଆସନ ଚୟନ କରିବେ ତ ଆଉ କେହି କହୁଛନ୍ତି ଓଡ଼ିଶାରେ ବାର୍ତ୍ତା ଦେବା ପାଇଁ ପୁରୀରୁ ମଧ୍ୟ ଲଢିପାରନ୍ତି। କିନ୍ତୁ ବିଜେପି ନେତାମାନେ ଏଭଳି ଆଲୋଚନାକୁ ଅଧିକ ଗୁରୁତ୍ୱ ଦେଉନାହାନ୍ତି। ସେମାନେ କହୁଛନ୍ତି ଯେ, ପିଏମ ମୋଦୀ ଅନ୍ୟ କୌଣସି ଆସନରୁ ପ୍ରତିଦ୍ୱନ୍ଦ୍ୱିତା କରିବେ କି ନାହିଁ, ସେ ବିଷୟରେ ଏବେ ଆଲୋଚନା କରିବାର କୌଣସି ଅର୍ଥ ନାହିଁ, କାରଣ ବର୍ତ୍ତମାନ କେହି କିଛି ଜାଣି ନାହାନ୍ତି। ପ୍ରଧାନମନ୍ତ୍ରୀ ମୋଦୀ ନିଜେ ଏହି ନିଷ୍ପତ୍ତି ନେବେ। ତେବେ ୨୦୧୯ରେ ମଧ୍ୟ ଏଭଳି ଚର୍ଚ୍ଚା ହୋଇଥିଲା।
ଶେଷରେ ମୋଦୀ ବାରାଣସୀରୁ ତାଙ୍କ ଏକମାତ୍ର ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ। ୨୦୧୪ରେ ଅବଶ୍ୟ ସେ ଦୁଇଟି ଆସନରେ ନିର୍ବାଚନ ଲଢିଥିଲେ। ସେତେବେଳେ ସେ ଗୁଜରାଟର ମୁଖ୍ୟମନ୍ତ୍ରୀ ଥିଲେ ଏବଂ ସେଠାରେ ଭଦୋଦରା ଆସନରୁ ମଧ୍ୟ ନିର୍ବାଚନ ଲଢିଥିଲେ, କିନ୍ତୁ ପରେ ସେହି ଆସନ ଛାଡ଼ି ବାରାଣସୀର ସାଂସଦ ରହିଲେ। ତେବେ ପ୍ରଧାନମନ୍ତ୍ରୀ ମୋଦୀ କେଉଁଠାରୁ ଲଢିବେ ସେନେଇ ଏପର୍ଯ୍ୟନ୍ତ ଆନୁଷ୍ଠାନିକ ଭାବେ କିଛି ଖବର ମିଳିନାହିଁ। କିନ୍ତୁ ଏହା ନିଶ୍ଚିତ ଯେ, ମୋଦୀ ଯେଉଁଠାରୁ ବି ନିର୍ବାଚନ ମଇଦାନକୁ ଓହ୍ଲାଇବେ ତାହାର ପ୍ରଭାବ ସେହି ରାଜ୍ୟ ସହ ଏହାର ଆଖପାଖ ସଂସଦୀୟ ଆସନ ଉପରେ ପଡ଼ିବ।
Comments are closed.