ପୁରୀ : ରାଜ୍ୟ ସରକାରଙ୍କ ହସ୍ତକ୍ଷେପ ପରେ ଶନିବାର ପୁଣିଥରେ ଶ୍ରୀମନ୍ଦିର ସିଂହଦ୍ବାର ସମ୍ମୁଖରେ ଆଲୋକ ବ୍ୟବସ୍ଥା କରାଯାଇଛି। ପ୍ରଶାସନ ଅନୁମତି ବିନା ବିଦ୍ୟୁତ୍ ହାଇ ଫୋକସ୍ ବଲ୍ବଗୁଡ଼ିକୁ କାଢ଼ି ନେଇଥିବା ଇଭେଣ୍ଟ ମ୍ୟାନେଜମେଣ୍ଟ ସଂସ୍ଥାର ୪ ଶ୍ରମିକଙ୍କୁ ପୁଲିସ ଅଟକ ରଖିଛି। ଏଥିନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ବାର ଥାନାରେ ଲିଖିତ ଅଭିଯୋଗ କରାଯାଇଛି। ମୁଖ୍ୟ ସଚିବ ପ୍ରଦୀପ କୁମାର ଜେନା ପୁରୀ ଗସ୍ତରେ ଆସି ଘଟଣାସ୍ଥଳ ପରିଦର୍ଶନ କରିଛନ୍ତି। ଶ୍ରୀଜଗନ୍ନାଥ ମନ୍ଦିର ଚତୁଃପାର୍ଶ୍ବରେ ଯଥାଶୀଘ୍ର ଆଲୋକ ବ୍ୟବସ୍ଥା କରିବାକୁ ସେ ନିର୍ଦେଶ ଦେଇଛନ୍ତି। ତାହାକୁ ଭିତ୍ତିକରି ଭୁବନେଶ୍ବରର ଏକ ଇଭେଣ୍ଟ ମ୍ୟାନେଜମେଣ୍ଟ ସଂସ୍ଥା ପକ୍ଷରୁ ପୁଣି ଥରେ ଆଲୋକ ବ୍ୟବସ୍ଥା କରାଯାଇଛି। ସୂଚନା ଅନୁଯାୟୀ ପରିକ୍ରମା ମାର୍ଗ ଲୋକାର୍ପଣ ପୂର୍ବରୁ ଏହି ସଂସ୍ଥା ଠିକାରେ ଆଲୋକ ବ୍ୟବସ୍ଥା କରିଥିଲା। ଏଥିପାଇଁ ମାସିକ ଭଡ଼ା ଧାର୍ଯ୍ୟ କରାଯାଇଥିଲା। ବିଜେଡି ନିର୍ବାଚନରେ ହାରିଯିବା ସହ ସରକାର ପରିବର୍ତ୍ତନ ହେଉଥିବା ଜାଣି ସମ୍ପୃକ୍ତ ସଂସ୍ଥା ଦୁଇଦିନ ତଳେ ସିଂହଦ୍ବାର ସମ୍ମୁଖରେ ଲଗାଇଥିବା ହାଇ ଫୋକସ୍ ବଲ୍ବଗୁଡ଼ିକୁ ହଠାତ୍ କାଢ଼ି ନେଇଥିଲା। ଏଥିଯୋଗୁଁ ଶ୍ରୀଜଗନ୍ନାଥ ମନ୍ଦିର ସମ୍ମୁଖ ସମେତ ଚାରିପାଖ ଅନ୍ଧକାର ହୋଇଯାଇଥିଲା। ଓଡ଼ିଶା ଉଚ୍ଚ ନ୍ୟାୟାଳୟ ଅଦାଲତ ମିତ୍ର ଏନ୍. କେ ମହାନ୍ତି ଏଥିନେଇ ଉଦ୍ବେଗ ପ୍ରକାଶ କରିଛନ୍ତି। ରାତିସୁଦ୍ଧା ଆଲୋକ ବ୍ୟବସ୍ଥା କରିବାକୁ ସେ ପରାମର୍ଶ ଦେଇଛନ୍ତି। ଏହି ଘଟଣାର ତଦନ୍ତ କରାଯାଉଥିବା ଜିଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ କହିଛନ୍ତି। ସଚେତନ ନାଗରିକ ମଞ୍ଚ ପକ୍ଷରୁ ଥାନାରେ ଏନେଇ ଅଭିଯୋଗ କରାଯାଇଛି।
Comments are closed.