ମୁମ୍ବଇ : ମୁମ୍ବଇସ୍ଥିତ ୧୮ ମହଲା ବିଶିଷ୍ଟ କୋଠା ‘ଅଶୋକ ସମ୍ରାଟ’ରେ ରବିବାର ଅଗ୍ନିକାଣ୍ଡ ଘଟି ଜଣେ ବୃଦ୍ଧାଙ୍କ ମୃତ୍ୟୁ ଘଟିଛି । ୧୯ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି। ଅଗ୍ନିଶମ ବାହିନୀ ଏବଂ ପୁଲିସ୍ କୋଠାର ଉପର ମହଲରେ ଫସି ରହିଥିବା ୫୦ରୁ ଊର୍ଦ୍ଧ୍ବ ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରିବାରେ ସଫଳ ହୋଇଛନ୍ତି।
ସୂଚନା ଅନୁସାରେ ରବିବାର ଭୋର ସମୟରେ କୋଠାର ତୃତୀୟ ମହମଲାରେ ନିଅାଁ ଲାଗିଥିବା ଦେଖିବାକୁ ମିଳିଥିଲା। କିଛି ସମୟ ମଧ୍ୟରେ ନିଅାଁ ଅନ୍ୟ ମହଲାକୁ ବ୍ୟାପୀ ଯାଇଥିଲା। ଉପର ମହଲାରେ ପାଖାପାଖି ୯୬ ଜଣ ଲୋକ ଥିଲେ। ନିଅାଁ ଦେଖି କିଛି ଲୋକ ବାହାରକୁ ପଳାଇ ଆସିଥିଲେ। ପରେ ଦମକଳ ବାହିନୀ ଓ ପୁଲିସ୍ ପହଞ୍ଚି ଅନ୍ୟ ଲୋକଙ୍କୁ ଉଦ୍ଧାର କରିଥିଲେ। ନିଅାଁରେ ପୋଡ଼ି ହୋଇ ଜଣେ ବୃଦ୍ଧାଙ୍କ ମୃତ୍ୟୁ ଘଟିଛି। ମୃତାଙ୍କ ନାମ ଲକ୍ଷ୍ମୀବାଇ ଓ ବୟସ ୭୦ ବର୍ଷ ବୋଲି ପୁଲିସ୍ ପ୍ରକାଶ କରିଛି। ଅଗ୍ନିକାଣ୍ଡର ସଠିକ କାରଣ ଜଣାପଡିନାହିଁ।
