ଫୁଲବାଣୀ : କନ୍ଧମାଳ ଜିଲ୍ଲାର ଫିରିଙ୍ଗିଆ ବ୍ଲକ୍ ଅନ୍ତର୍ଗତ ଡିଣ୍ଡିରା ଗାଁ ପଞ୍ଚାୟତ କୁଡୁକି ଗ୍ରାମରେ ମିଶନ ଜୀବିକା ମାଧ୍ୟମରେ ସ୍ବୟଂ ସହାୟିକା ଗୋଷ୍ଠୀକୁ କୃଷି ଯନ୍ତ୍ରପାତି ପାୱାର ଟିଲର ବଣ୍ଟନ କରାଯାଇଛି। ସୂଚନା ପ୍ରକାରେ କୁଡୁକି ଗ୍ରାମର ସ୍ଵୟଂ ସହାୟିକା ଗୋଷ୍ଠୀରେ ୧୨ ଜଣ ସଦସ୍ୟା ଅଛନ୍ତି । ମିଶନ ସାଥୀ ବଡଣା କହଁରଙ୍କ ପ୍ରୟାସରେ ଫୁଲବାଣୀ ଆଦିବାସୀ ଉନ୍ନୟନ ସଂସ୍ଥାର ପ୍ରକଳ୍ପ ପ୍ରଶାସକ ପ୍ରବୀଣ କୁମାର ବାଣୁଆଁଙ୍କ ଦ୍ୱାରା ଏହି ଦଳକୁ ପାୱାର ଟିଲର ବଣ୍ଟନ କରାଯାଇଛି। ସେମାନଙ୍କର ସର୍ବାଙ୍ଗୀନ ଉନ୍ନତି ପାଇଁ ଖରାଦିନିଆ ଚାଷ କରିବା ସହିତ ସୂର୍ଯ୍ୟମୁଖୀ ଚାଷ କରିବାକୁ ପରାମର୍ଶ ଦେଇଥିଲେ ।
ପ୍ରୋଜେକ୍ଟ ମ୍ୟାନେଜର ପି.ମୂରଲିମୋହନ ଏହି ଗ୍ରାମର ଚାଷୀ ଭାଇମାନେ ସମସ୍ତେ ମୂଲ୍ୟବାନ ଅର୍ଥକାରୀ ଫସଲ ଯଥା ମିଠା ମକା, କଲରା ଓ କାକୁଡ଼ି ପରି ପନିପରିବା ଚାଷ କରୁଥିବାବେଳେ ୨୦ ଏକର ଜମିରେ ସୂର୍ଯ୍ୟମୁଖୀ ଚାଷ କରି ଆଗାମୀ ୬ ମାସ ମଧ୍ୟରେ ଏହାର ମୂଲ୍ୟ ବାହାର କରିବାକୁ ପଡ଼ିବ ବୋଲି କହିଥିଲେ। ଏଥିରେ ଡିଣ୍ଡିରା ଗାଁ ଗ୍ରାମ ପଞ୍ଚାୟତର ସରପଞ୍ଚ ରଞ୍ଜିତା ମଲିକ ଉପସ୍ଥିତ ଥିଲେ । ଏହାର ପ୍ରାରମ୍ଭିକ ସ୍ୱାଗତ କାର୍ଯ୍ୟକ୍ରମକୁ ଜୀବିକା ବିଶେଷଜ୍ଞ ଦାୟିତ୍ୱରେ ଥିବା ଶ୍ରୀପତି ପାତ୍ରଙ୍କ ଦ୍ୱାରା ଶୁଭାରମ୍ଭ କରାଯାଇଥିଲା। ଶେଷରେ ସ୍ଵୟଂ ସହାୟିକା ଗୋଷ୍ଠୀର ସଭାନେତ୍ରୀ ମାନିନୀ କହଁର ଉପସ୍ଥିତ ସମସ୍ତ କର୍ମକର୍ତ୍ତାଙ୍କୁ ଧନ୍ୟବାଦ ଅର୍ପଣ କରିଥିଲେ ।
