ଅଦିନିଆ ବର୍ଷାକୁ ଦୃଷ୍ଟିରେ ରଖି ଚାଷୀ ସଚେତନତା ରଥ ଉଦଘାଟିତ

ଆଠଗଡ : ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଆଗାମୀ ୧୯ ତାରିଖ ବୁଧବାରଠାରୁ ୩/୪ ଦିନ ଓଡ଼ିଶାରେ ବର୍ଷା ହେବ। ଏହାକୁ ଦୃଷ୍ଟିରେ ରଖି ଚାଷୀମାନଙ୍କୁ ସଚେତନ କରିବା ଲାଗି ମଙ୍ଗଳବାର ଏକ ସଚେତନତା ରଥକୁ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମାଙ୍କ ଦ୍ବାରା ତାଙ୍କ କାର୍ଯ୍ୟାଳୟ ପରିସରରେ ଉଦଘାଟିତ ହୋଇଯାଇଛି। ଧାନ ମଣ୍ତିରେ ଗଛିତ ଧାନ ବର୍ଷା ପ୍ରଭାବରୁ ସୁରକ୍ଷିତ ରଖିବା ପାଇଁ ଚାଷୀମାନେ ପଦକ୍ଷେପ ନେବା ସହିତ ଖରାଟିଆ ଡାଲି, ତୈଳବୀଜ ଫସଲ ଓ ପନିପରିବା ଆଦି ବୁଣାବୁଣି କାର୍ଯ୍ୟ ସାମୟିକ ସ୍ଥଗିତ ରଖିବା, ଫସଲରେ କୀଟନାଶକ ଔଷଧ ଓ ସାର ପ୍ରୟୋଗ ବନ୍ଦ କରିବା ପାଇଁ ଏହି ରଥ ମାଧ୍ୟମରେ ସଚେତନତା କରାଯାଉଛି। ଏହି ସଚେତନତା ରଥ ଉପଖଣ୍ଡର ସମସ୍ତ ପଞ୍ଚାୟତ ପରିଭ୍ରମଣ କରି ଚାଷୀମାନଙ୍କୁ ସଚେତନ କରାଇବ। ନରସିଂହପୁର ନିୟନ୍ତ୍ରିତ ବଜାର କମିଟିର ଆନୁକୂଲ୍ୟରେ ଅନୁଷ୍ଠିତ ଏହି ଉଦଘାଟନୀ ଉତ୍ସବରେ ସହକାରୀ ଜିଲ୍ଲାପାଳ ମାନସ ରଞ୍ଜନ ବେହେରା, ଡେପୁଟି କଲେକ୍ଟର ଅଭିପ୍ସା ମହାନ୍ତି, ନିୟନ୍ତ୍ରିତ ବଜାର କମିଟିର ସଂପାଦକ ରାମନାରାୟଣ ମଲ୍ଲିକ ପ୍ରମୁଖ ଉପସ୍ଥିତ ଥିଲେ।