ଆଠଗଡ : ଆଠଗଡ ଅଞ୍ଚଳରେ ପରିକ୍ରମା କରିବାକୁ ଥିବା ଶିକ୍ଷା ସଚେତନତା ରଥକୁ ଗୁରୁବାର ଆଠଗଡ ଏନଏସି ଅଧ୍ୟକ୍ଷା ସସ୍ମିତା ରାଉତ ମୁଖ୍ୟ ଅତିଥି ଭାବେ ଯୋଗଦେଇ ଉଦ୍ଘାଟନ କରିଥିଲେ। ଏହି ଅବସରରେ ଉଦ୍ବୋଧନ ଦେଇ ଶ୍ରୀମତୀ ରାଉତ ଶିକ୍ଷା ସମସ୍ତ ଶିଶୁଙ୍କର ମୌଳିକ ଅଧିକାର ଏବଂ ସମସ୍ତେ ଶିକ୍ଷିତ ହେଲେ ଏକ ସୁଦୃଢ ଦେଶ ଗଠନ ହୋଇପାରିବ ବୋଲି ମତବ୍ୟକ୍ତ କରିଥିଲେ । ବ୍ଲକ ଶିକ୍ଷାଧିକାରୀ ବିଜୟଲକ୍ଷ୍ମୀ ସାମଲ ଏହି କାର୍ଯ୍ୟକ୍ରମକୁ ସଂଯୋଜନା କରି ଏହି ଶିକ୍ଷା ସଚେତନତା ରଥ ମାଧ୍ୟମରେ ଲୋକମାନଙ୍କୁ ସେମାନଙ୍କର ସନ୍ତାନଙ୍କୁ ବିଦ୍ୟାଳୟକୁ ପଠାଇବା ପାଇଁ ପ୍ରୋତ୍ସାହିତ କରିବ ବୋଲି ଆଶାବ୍ୟକ୍ତ କରିଥିଲେ। ଶିକ୍ଷା ହିଁ ଜୀବନର ଶ୍ରେଷ୍ଠ ଉପଲବ୍ଧି ଏବଂ ସମସ୍ତେ କିପରି ଶିକ୍ଷିତ ହେବେ ସେ ଦିଗରେ ଅଭିଭାବକଙ୍କର ଗୁରୁଦାୟିତ୍ୱ ରହିଛି ବୋଲି ଶ୍ରୀମତୀ ସାମଲ ପ୍ରକାଶ କରିଥିଲେ । ଏହି କାର୍ଯ୍ୟକ୍ରମରେ ପ୍ରାଥମିକ ଶିକ୍ଷକ ସଂଘର ସଭାପତି କିଶୋର ଚନ୍ଦ୍ର ବେହେରା, ଶିକ୍ଷାବିତ୍ ନୀଳମଣି ନାୟକ, ସମସ୍ତ ସିଆରସିସି ଏବଂ ବହୁ ଶିକ୍ଷକ ଶିକ୍ଷୟିତ୍ରୀ ଯୋଗଦାନ କରିଥିଲେ । ଏହି ଶିକ୍ଷା ସଚେତନତା ରଥ ଆଠଗଡ ବ୍ଲକର ସମସ୍ତ ପଞ୍ଚାୟତ ଅଧିନରେ ଥିବା ଗ୍ରାମାଞ୍ଚଳ ଓ ବିଦ୍ୟାଳୟ ଗୁଡିକ ପରିକ୍ରମା କରିବ ବୋଲି ବିଇଓ ଶ୍ରୀମତୀ ସାମଲ ପ୍ରକାଶ କରିଥିଲେ।
Comments are closed.