ୱାଶିଂଟନ୍: ଚିକିତ୍ସା ବିଜ୍ଞାନ ଇତିହାସରେ ପ୍ରଥମ ଥର ପାଇଁ ରୋଗୀକୁ ବେହୋସ କରା ନ ଯାଇ ମସ୍ତିଷ୍କ ଅସ୍ତ୍ରୋପଚାର କରାଯାଇଛି। ଏହାସହିତ ଅସ୍ତ୍ରୋପଚାର ସମୟର ଦୃଶ୍ୟକୁ ଫେସ୍ବୁକ୍ରେ ଲାଇଭ୍ ମଧ୍ୟ କରାଯାଇଛି। ଯାହାକୁ ହଜାର ହଜାର ଲୋକ ଦେଖିଛନ୍ତି। ଆଶ୍ଚର୍ଯ୍ୟ ଲାଗିଲେ ମଧ୍ୟ ଏହା ସତ। ଆମେରିକାର ଏକ ଡାକ୍ତରଖାନା ମେଥୋଡିଷ୍ଟ୍ ଡଲାସରେ ଜେନା ସ୍କ୍ରେଡ଼୍ ନାମକ ଜଣେ ମହିଳାଙ୍କର ମସ୍ତିଷ୍କ ଅସ୍ତ୍ରୋପଚାର କରାଯାଇଛି, ସେ ପୁଣି ସମ୍ପୂର୍ଣ୍ଣ ସଚେତ ଥିବାବେଳେ। ଏହାସହିତ ଡାକ୍ତରଖାନାର ଫେସ୍ବୁକ୍ ପେଜ୍ରେ ସକାଳ ୧୧:୪୫ ଠାରୁ ଏହି ଅସ୍ତ୍ରୋପଚାର ପ୍ରକ୍ରିୟାର ଲାଇଭ୍ ଷ୍ଟ୍ରିମିଂ ମଧ୍ୟ କରାଯାଇଛି।
ଅସ୍ତ୍ରୋପଚାର ସମୟରେ ଜେନା ଡାକ୍ତରଙ୍କ ସହ କଥାବାର୍ତ୍ତା କରୁଥିବା ଏହି ଲାଇଭ୍ ଭିଡିଓରେ ଦେଖିବାକୁ ମିଳିଛି। ମେଥୋଡିଷ୍ଟ୍ ଡଲାସର ମୁଖ୍ୟ ଡା. ନିମେଶ ପଟେଲଙ୍କ କହିବାନୁସାରେ, ଏ ପ୍ରକାର ଅସ୍ତ୍ରୋପଚାର ସମୟରେ ରୋଗୀ ଲଗାତର କଥାବାର୍ତ୍ତା କରିବା ଆବଶ୍ୟକ। ଏହାଦ୍ୱାରା ଅସ୍ତ୍ରୋପଚାରରେ ଯଦି କୌଣସି ଭୁଲ୍ ହୁଏ ତେବେ ତାହାକୁ ସୁଧାରିହେବ। ଅସ୍ତ୍ରୋପଚାର ସମୟରେ ଡାକ୍ତରମାନେ ଜେନାଙ୍କୁ ଲଗାତର କିଛି ଫଟୋ ଦେଖାଉଥିଲେ। ଏହାଦ୍ୱାରା ସ୍ପଷ୍ଟ କରାଯାଉଥିଲା ଯେ ଅସ୍ତ୍ରୋପଚାର ସମୟରେ ତାଙ୍କ ମସ୍ତିଷ୍କର ଭଲ ସ୍ଥାନ ଗୁଡ଼ିକରେ କୌଣସି କ୍ଷତି ପହଞ୍ଚା ଯାଉନାହିଁ।
ଡାକ୍ତର ବାର୍ଟେଲ ମିଶେଲ କହିଛନ୍ତି, ଯଦି ଏହି ଅସ୍ତ୍ରୋପଚାରରେ କିଛି ତ୍ରୁଟି ରହିଥାଆନ୍ତା, ତେବେ ଜେନା ସାରା ଜୀବନ ପାଇଁ ମୁକ ହୋଇ ଯାଇଥାଆନ୍ତେ। ତେଣୁ ଆମେ ତାଙ୍କ ସହ କଥାବାର୍ତ୍ତା କରୁଥିଲୁ। ଯଦ୍ୱାରା ଆମେ ଜାଣି ପାରିବୁ ଯେ, ଅସ୍ତ୍ରୋପଚାର ସଠିକ୍ ଭାବେ ଚାଲିଛି। ତେବେ ଏହି ଅସ୍ତ୍ରୋପଚାର ଦେଖି ଅନ୍ୟ ଲୋକମାନେ ମଧ୍ୟ ଉପକୃତ ହେବେ ବୋଲି ନିଜେ ଜେନା କହିଛନ୍ତି।
