ଆମେରିକାରେ ମିଳିଥିବା ଏକ ଡାଇନୋସର କଙ୍କାଳ ୩୭୩ କୋଟି ଟଙ୍କାରେ ନିଲାମ ହୋଇଥିବା ଜଣାପଡ଼ିଛି। ଆମେରିକାର କଲୋରାଡୋ ବାସିନ୍ଦା ଜାସନ କୁପର ନିଜ ବାସଗୃହର ବାରିପଟେ ନିର୍ମାଣ କାର୍ଯ୍ୟ ପାଇଁ ଖନନ କରୁଥିବା ବେଳେ ବହୁସଂଖ୍ୟକ ହାଡ଼ ପାଇଥିଲେ। କୁପର ଜଣେ ସରୀସୃପ ବିଶେଷଜ୍ଞ ହୋଇଥିବାରୁ ମିଳିଥିବା ହାଡ଼ଗୁଡ଼ିକୁ ଠିକ୍ କ୍ରମରେ ସଜାଇବା ପରେ ତାହା ଏକ ଷ୍ଟେଗାସରସ୍ ଡାଇନୋସର କଙ୍କାଳ ବୋଲି ଜାଣିବାକୁ ପାଇଲେ। ସେହି କଙ୍କାଳକୁ ନ୍ୟୁୟର୍କରେ ନିଲାମ କରାଯାଇଥିଲା।
ଏହାକୁ ୮ଜଣ ବ୍ୟକ୍ତି ମିଶି ଭାରତୀୟ ମୁଦ୍ରାରେ ୩୭୩ କୋଟି ଟଙ୍କାରେ କିଣିଥିଲେ। ଏହି ଡାଇନୋସର ୧୧ ଫୁଟ ଲମ୍ବା ହୋଇଥିବା ବେଳେ ତାହାର ୩୧୯ଟି ହାଡ଼ ରହିଥିଲା। ଅନ୍ୟପକ୍ଷରେ ଏହି ଡାଇନୋସର କଙ୍କାଳକୁ ନିଲାମ ନ କରି ସଂଗ୍ରହାଳୟରେ ରଖିବାକୁ କେତେକ ବ୍ୟକ୍ତି ପ୍ରସ୍ତାବ ଦେଇଥିଲେ। ତେବେ କୁପର ସେହି ପ୍ରସ୍ତାବକୁ ପ୍ରତ୍ୟାଖାନ କରି ଦେଇଥିଲେ।
