ଢେଙ୍କାନାଳ ସଦର: ନାବାଳିକା ହିନ୍ଦୁ ଛାତ୍ରୀଙ୍କୁ ମୁସଲିମ୍ ସଂପ୍ରଦାୟର ଜଣେ ଯୁବକ ନିଶା ଶୁଙ୍ଘାଇ ଅପହରଣ କରିନେଇଥିବା ଅଭିଯୋଗ ହୋଇଛି। ଏହି ଘଟଣା ଢେଙ୍କାନାଳ ସଦର ଥାନା ଝାରଗାଡିଆ ଫାଣ୍ଡି ଅନ୍ତର୍ଗତ ଗୁଣ୍ଡିଚାପଡା ଅଞ୍ଚଳରେ ଘଟିଛି। ଝିଅକୁ ତୁରନ୍ତ ଉଦ୍ଧାର ପାଇଁ ପରିବାର ଲୋକେ ସଦର ଥାନାରେ ଅଭିଯୋଗ କରିଥିବା ବେଳେ ତାଙ୍କ ସମର୍ଥନରେ ଆଖପାଖ ୧୮ ଗୋଟି ପଞ୍ଚାୟତର ସରପଞ୍ଚ ସଦର ଥାନାର ଦ୍ୱାରସ୍ଥ ହୋଇଛନ୍ତି। କୌଣସି ସାଂପ୍ରଦାୟିକ ବିଶୃଙ୍ଖଳା ଉପୁଜିବା ପୂର୍ବରୁ ନାବାଳିକା ଛାତ୍ରୀଙ୍କୁ ଉଦ୍ଧାର କରିବା ପାଇଁ ଥାନା ଅଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି। ଅପହୃତ ଛାତ୍ରୀ ଜଣକ ସିମିନଇ କଲେଜରେ ପାଠ ପଢୁଥିଲେ। ଝିଅର ବୟସ ୧୭ ବର୍ଷ ହୋଇଥିବା ବେଳେ ପୁଅର ବୟସ ୨୨ ହେବ ବୋଲି ପୁଲିସ ସୂତ୍ରରୁ ଜଣାପଡିଛି ।
ମଙ୍ଗଳବାର ଦିନ କଲେଜକୁ ପ୍ରତିଦିନ ଭଳି ଜଣେ କଲେଜ ଛାତ୍ରୀ ପାଠ ପଢିବାପାଇଁ ଆସିଥିଲେ। କିଛି ଦିନ ହେବ ଜଣେ ମୁସିଲିମ ଯୁବକ ତାଙ୍କୁ ପ୍ରେମ ନିବେଦନ କରି ବିଫଳ ହେବା ପରେ ତାଙ୍କୁ ଅପହରଣ କରିବା ପାଇଁ ଯୋଜନା କରିଥିଲେ। ନାବାଳିକା କଲେଜ ଛାତ୍ରୀଙ୍କୁ କ୍ଲୋରେଫର୍ମ ଶୁଙ୍ଘାଇ ଅଚେତ କରିବା ପରେ ତାଙ୍କୁ ଏକ କାର ଯୋଗେ ଅପହରଣ କରି ନେଇଥିବା ଜଣାପଡିଛି। ଏହାକୁ ନେଇ ଝିଅର ବାପା ସଦର ଥାନାରେ ଅଭିଯୋଗ କରିଥିବାର ଜଣାପଡିଛି। ପୁଲିସ ଏକ ଟିମ ଗଠନ କରି ବିଭିନ୍ନ ଅଞ୍ଚଳରେ ତଦନ୍ତ ଚଳାଇଛି।
