ଭୁବନେଶ୍ବର : ପଞ୍ଚଦଶ ବିଧାନସଭାର ଶେଷ ତଥା ବଜେଟ୍ ଅଧିବେଶନ ଆସନ୍ତାକାଲିଠାରୁ ଆରମ୍ଭ ହେଉଛି। ଆସନ୍ତା ୧୨ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ଅଧିବେଶନରେ ୭ଟି କାର୍ଯ୍ୟଦିବସ ରହିଛି। ବିଧାନସଭାର ତ୍ରିସ୍ତରୀୟ ସୁରକ୍ଷା ବ୍ୟବସ୍ଥାକୁ ପୁଲିସ ମହାନିର୍ଦେଶକ ଡ. ରାଜେନ୍ଦ୍ର ପ୍ରସାଦ ଶର୍ମା, ଗୁଇନ୍ଦା ନିର୍ଦେଶକ ସୁନିଲ୍ ରଏ, ପୁଲିସ କମିସନର ସତ୍ୟଜିତ ମହାନ୍ତି, ଅତିରିକ୍ତ ପୁଲିସ କମିସନର ସଞ୍ଜୟ ସିଂହ, ଆଇଜି(ଆଇନଶୃଙ୍ଖଳା) ଅମିତାଭ ଠାକୁର, ଡିସିପି ଅନୁପ କୁମାର ସାହୁ ଏବଂ ଅନ୍ୟ ବରିଷ୍ଠ ଅଧିକାରୀମାନେ ଅପରାହ୍ଣରେ ଅନୁଧ୍ୟାନ କରିଛନ୍ତି।
ବିଧାନସଭାର ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ପାଇଁ ୩୦ ପ୍ଲାଟୁନ୍ ପୁଲିସ ଫୋର୍ସ ମୁତୟନ କରାଯିବାକୁ ବନ୍ଦୋବସ୍ତ କରାଯାଇଛି। ସୁରକ୍ଷା ବ୍ୟବସ୍ଥାକୁ ତଦାରଖ କରିବା ଲାଗି ୧୦୦ରୁ ଅଧିକ ଅଫିସରଙ୍କୁ ମୁତୟନ କରାଯିବା ବୋଲି ପୁଲିସ କମିସନର ଶ୍ରୀ ମହାନ୍ତି ସୂଚନା ଦେଇଛନ୍ତି। ୫ଟି କ୍ୟୁଆର୍ଟି, ୨ଟି ଆତଙ୍କବାଦୀ ନିରୋଧ ଦଳ ମୁତୟନ କରାଯାଇଛି। ଏହା ବ୍ୟତୀତ ବିଧାନସଭା ଭିତର ବାହାରେ ସାଦାପୋଷାକରେ ପୁଲିସ ଅଧିକାରୀଙ୍କୁ ମୁତୟନ କରାଯିବ।
ସେହିପରି ବିଧାନସଭା ଭିତର ଓ ବାହାରେ ୫୦ରୁ ଅଧିକ ସିସିଟିଭି ଲଗାଯାଇ ଏକ କେଣ୍ଟ୍ରାଲ୍ରୁମ୍ ମାଧ୍ୟମରେ ନଜର ରଖାଯିବ। ବଜେଟ୍ ଅଧିବେଶନ ଥିବାରୁ ବିଭିନ୍ନ ସଂଗଠନ ପକ୍ଷରୁ ଜୋର୍ଦାର୍ ବିକ୍ଷୋଭ ପ୍ରଦର୍ଶନ କରାଯିବ ବୋଲି ଆଶା କରାଯାଉଛି। ତେଣୁ ବିଧାନସଭା ସାମ୍ନାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଲୋୟର ପିଏମ୍ଜିରେ ବିକ୍ଷୋଭକାରୀଙ୍କ ପାଇଁ କେତେକ କଟକଣା କରାଯାଇଛି। ଶୋଭାଯାତ୍ରାକୁ କେବଳ ଲୋୟର ପିଏମ୍ଜିରେ ଅନୁମତି ପ୍ରଦାନ କରାଯିବ ବୋଲି ପୁଲିସ କମିସନର ସୂଚନା ଦେଇଛନ୍ତି।
ବିଧାନସଭା ସୁରକ୍ଷା ବ୍ୟବସ୍ଥା ଯାଞ୍ଚ କଲେ ଡିଜି
Popular Categories
Previous article
Next article