ଭୁବନେଶ୍ୱର: ଆସନ୍ତା ୨୪ ଘଣ୍ଟାମଧ୍ୟରେ ବାତ୍ୟାର ରୂପନେବ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଲଘୁଚାପ। କିନ୍ତୁ ବାତ୍ୟା ନଜରରୁ ହଟିଛି ଓଡିଶା। ଭାରତୀୟ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସନ୍ଧ୍ୟା ୫.୩୫ ରେ ଜାରି ବୁଲେଟିନରେ ଓଡିଶାର ନାଁ ନଥିବାରୁ ଏହା ଓଡିଶା ଉପକୂଳରେ ମାଡ କରିବ ନାହିଁ ବୋଲି ସୂଚନା ମିଳିଛି। ଏହି ବାତ୍ୟା ଉତ୍ତର ଓ ଉତ୍ତର ପଶ୍ଚିମ ଦିଗକୁ ମୁହାଁଉଥିବା ସୂଚନା ଦେଇଛି ଭାରତୀୟ ପାଣିପାଗ ବିଜ୍ଞାନ କେନ୍ଦ୍ର। ବାତ୍ୟା ପଶ୍ଚିମବଙ୍ଗ ଏବଂ ବାଂଲାଦେଶ ଆଡକୁ ମୁହାଁଉଥିବା ସନ୍ଧ୍ୟା ବୁଲେଟିନରେ ସୂଚନା ଦେଇଛି ପାଣିପାଗ ବିଭାଗ।
ଅବପାତର ରୂପନେଇଥିବା ଲଘୁଚାପ କ୍ରମଶ ଘନିଭୂତ ହୋଇ ବାତ୍ୟା ଆଡକୁ ମୁହାଁଉଛି କିନ୍ତୁ ଏହା ଆଗାମୀ ୫ ଦିନ ଯାଏଁ ସ୍ଥଳ ଭାଗ ଛୁଇଁବ ନାହିଁ ବୋଲି ସୂଚନା ଦେଇଛନ୍ତି ଭାରତୀୟ ପାଣିପାଗ ବିଜ୍ଞାନ କେନ୍ଦ୍ର ମହାନିର୍ଦେଶକ ମୃତ୍ୟୁଞ୍ଜୟ ମହାପାତ୍ର। ଏହି ବାତ୍ୟା ବର୍ତ୍ତମାନ ଘଣ୍ଟାପ୍ରତି ୫ରୁ ୬ କିମି ବେଗରେ ଗତି କରୁଛି। ଏଣୁ ଏହା ସ୍ଥଳଭାଗ ଛୁଇଁବାରେ ସମୟ ଲାଗିବ। ଭାରତୀୟ ପାଣିପାଗ ବିଜ୍ଞାନ କେନ୍ଦ୍ରର ସୂଚନାଅନୁଯାୟୀ ବୁଧବାର ସକାଳ ୫.୩୦ ସୁଦ୍ଧା ଏହା ଅବପାତର ରୂପ ନେଇଛି। ଧିରେ ଧିରେ ଏହା ଘନିଭୂତ ହୋଇ ବତ୍ୟାର ରୂପନେବ। ଏହା ବର୍ତ୍ତମାନ ପାରଦୀପ ଠାରୁ ୮୧୦ କିଲୋମିଟର ଦୂରରେ ଥିବା ବେଳେ ପଶ୍ଚିମବଙ୍ଗର ସାଗର ଆଇଲ୍ୟାଣ୍ଡ ଠାରୁ ୯୨୦ ଏବଂ ବାଂଲାଦେଶର ଖେପୁପରା ଠାରୁ ୯୬୦ କିଲୋମିଟର ଦୂରରେ ରହିଛି। ବର୍ତ୍ତମାନ ସମୟରେ ଅବପାତ ଘଣ୍ଟାକୁ ୬ କି.ମି. ବେଗରେ ଉତ୍ତର-ପଶ୍ଚିମ ଦିଗକୁ ଗତି କରୁଛି। ଏହାର ପ୍ରଭାବରେ ୮ ତାରିଖରୁ ସମୁଦ୍ର ଅଶାନ୍ତ ରହିବ। ଏଣୁ ଏହି ସମୟରେ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନଯିବା ପାଇଁ ବାରଣ କରାଯାଇଛି। ଏହି ବାତ୍ୟାକୁ ନେଇ ଲୋକେ ଭୟଭୀତ ହେବାର କୌଣସି କାରଣ ନାହିଁ ବୋଲି ଭାରତୀୟ ପାଣିପାଗ ବିଜ୍ଞାନ କେନ୍ଦ୍ର ମହାନିର୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି।
