ବରିଡା ଶାଗ ପାଇଁ ଜମୁଛି ଗ୍ରାହକଙ୍କ ଭିଡ଼ 

ଫୁଲବାଣୀ : ଖରାଦିନ ଆସିଲେ ସାଧାରଣତଃ ପଖାଳ ଭାତ ସାଙ୍ଗକୁ ଶାଗଭଜା ଖାଇବାକୁ ଲୋକଙ୍କୁ ଭାରି ଇଚ୍ଛା ହୁଏ । ତେଣୁ ବଜାରରେ ଲୋକେ ଅନ୍ୟାନ୍ୟ ପନିପରିବା କିଣିବା ଅପେକ୍ଷା ଶାଗ ଟିକେ କିଣିବାକୁ ବେଶୀ ପସନ୍ଦ କରନ୍ତି । ଏହି ସମୟରେ କନ୍ଧମାଳ ଜିଲ୍ଲାର ପ୍ରାୟ ଅଂଚଳରେ ବରିଡା ଶାଗର ଚାହିଦା ବଢ଼ିଯାଏ । ଜିଲ୍ଲାବାସୀଙ୍କ ପାଇଁ ବରିଡା ଶାଗ ଏକ ପ୍ରକୃତିର ଅବଦାନ କହିଲେ ଅତ୍ୟୁକ୍ତି ହେବ ନାହିଁ । ଶାଗ ଦେଖିବାକୁ ଯେତିକି ସୁନ୍ଦର ସେତିକି ସ୍ୱାଦିଷ୍ଟ ମଧ୍ୟ ଏବଂ ଶାଗରେ ଭିଟାମିନ ମଧ୍ୟ ଭରି ରହିଛି । ତେଣୁ ଅନ୍ୟ ଶାଗ ମାନଙ୍କ ଅପେକ୍ଷା ବରିଡା ଶାଗର ସ୍ୱାଦ ମଧ୍ୟ ନିଆରା । ଏପ୍ରିଲ ମାସର ପହିଲି ବର୍ଷାରେ ବରିଡା ଗଛରେ ନୂଆ ପତ୍ର କଅଁଳେ । ଆଉ ବିଶେଷ କରି ଜଙ୍ଗଲରେ ଏହି ଗଛ ସବୁ ମିଳୁଥିବାରୁ ସ୍ଥାନୀୟ ଲୋକେ ଜଙ୍ଗଲକୁ ଯାଇ ବରିଡା ଗଛରେ ଚଢି ତାର କଅଁଳିଆ ପତ୍ରସବୁ ସଂଗ୍ରହ କରି ଆଣିଥାନ୍ତି ଏବଂ ନିଜ ଘରେ ରୋଷେଇ କରି ଖାଇବା ସହ ବଳକା ଶାଗ ସବୁକୁ ଗାଁରେ ହେଉ କି ହାଟରେ ହେଉ ନେଇକି ବିକ୍ରି କରି ବେଶ ଦୁଇ ପଇସା ରୋଜଗାର ମଧ୍ୟ କରିଥାନ୍ତି । ବଜାରରେ ବିକ୍ରୟ ପାଇଁ ଆସିଥିବା ବରିଡା ଶାଗ ଆଖି ପିଛୁଳାକେ ବିକ୍ରି ହୋଇଯାଏ । ଯେଉଁ ବ୍ୟକ୍ତି କିମ୍ବା ମହିଳା ବରିଡା ଶାଗ ବିକ୍ରୟ କରନ୍ତି ତାଙ୍କୁ କିଛି ବ୍ୟକ୍ତି ଆଗୁଆ ଶାଗ ପାଇଁ ଟଙ୍କା ଦେଇ ବରାଦ କରିଥାନ୍ତି । ବରିଡା ଶାଗ ବିକ୍ରୟ କରି ସ୍ଥାନୀୟ ମହିଳାମାନେ ପ୍ରତିଦିନ ୨୦୦ ରୁ ୩୦୦ ଟଙ୍କା ରୋଜଗାର କରୁଥିବା କୁହନ୍ତି ।

ଜଣେ ଶାଗ ବିକୁଥିବା ମହିଳା ମାଧୁରୀ ନାୟକଙ୍କୁ ରୋଜଗାର କଥା ପଚାରିବାରୁ ସେ କହିଛନ୍ତି, ରାତି ୪ଟାରୁ ଉଠି ପ୍ରତି ଗାଁ ଗାଁ ବୁଲି ଶାଗ ସଂଗ୍ରହ କରି ବଜାରରେ ବିକ୍ରି କରନ୍ତି । ଶାଗ କିଲୋ ପ୍ରତି ୧୩୦ ଟଙ୍କାରେ ବିକ୍ରି କରୁଥିବାବେଳେ ପାଏକୁ ୩୦ ଟଙ୍କାରେ ବିକ୍ରି କରୁଥିବା ସେ କହିଛନ୍ତି । ଉଚିତ ମୂଲ୍ୟରେ ଏହି ଶାଗ ମିଳୁଥିବାରୁ ସ୍ଥାନୀୟ ଲୋକେ ବଡ଼ ସରାଗରେ କିଣନ୍ତି । କିଛି ଗ୍ରାହକଙ୍କ କହିବା ପ୍ରକାରେ, କେବଳ ଖରାଦିନେ ହିଁ ଏହି ଶାଗ ଖାଇବାକୁ ମିଳେ ଏବଂ ଅତି ସ୍ୱାଦିଷ୍ଟ ହୋଇଥିବାରୁ ଆମେ ଆଖପାଖରେ ଥିବା ସବୁ ବଜାରକୁ ଯାଇ ଶାଗ ସଂଗ୍ରହ କରିକି ଆଣୁ । କନ୍ଧମାଳ ଜିଲ୍ଲାର ସ୍ଥାନୀୟ ଲୋକଙ୍କ ପାଇଁ ବର୍ତ୍ତମାନ ଖରାଦିନିଆ ପାଇଁ ପ୍ରିୟ ଶାଗ ବରିଡା ହୋଇଥିବାରୁ ଶାଗ ବେପାରୀ ମାନେ ମଧ୍ୟ ବେଶ ଦୁଇ ପଇସା ରୋଜଗାର କରିବାରେ ସକ୍ଷମ ହୋଇପାରିଛନ୍ତି ।