ନୂଆଦିଲ୍ଲୀ: ସାଧାରଣତଃ ଯେ କୌଣସି ପ୍ରକାର ଦେହ ଖରାପ ହେଲେ ଆମେ ଔଷଧ ଉପରେ ନିର୍ଭର କରଥାଉ। କିନ୍ତୁ ବର୍ତ୍ତମାନ ଏଭଳି କିଛି ସତ ସାମ୍ନାକୁ ଆସିଛି, ଯାହା ଶୁଣିଲେ ଆପଣମାନେ ବି ଭୟଭୀତ ହୋଇପଡିବେ । କ୍ୟାନ୍ସର ଭଳି ମାରାତ୍ମକ ରୋଗରେ ପୀଡ଼ିତ ରୋଗୀଙ୍କୁ ନକଲି ଔଷଧ! ବିଶ୍ବାସ ଲାଗୁ ନଥିଲେ ମଧ୍ୟ କଥାଟି ସତ। ଦିଲ୍ଲୀ ପୁଲିସ ମୋଦୀ ନଗର ଇଲାକାରୁ ବିପୁଳ ପରିମାଣରେ ନକଲି କ୍ୟାନସର ଔଷଧ ଜବତ କରିବା ସହ ଏହି ମାମଲାରେ ୭ ଜଣଙ୍କୁ ଗିରଫ କରିଛି। ଗିରଫ ୭ ଜଣଙ୍କ ମଧ୍ୟରେ ଦିଲ୍ଲୀ କ୍ୟାନ୍ସର ହସ୍ପିଟାଲର ଦୁଇଜଣ କର୍ମଚାରୀ ରହିଛନ୍ତି। ଜବତ ହୋଇଥିବା ସାମଗ୍ରୀର ଆନୁମାନିକ ମୂଲ୍ୟ ୪ କୋଟି ଟଙ୍କା ହେବ। ସୂଚନା ମୂତାବକ କୌଣସି ଏକ ବିଶେଷ ସୂତ୍ରରୁ ଦିଲ୍ଲୀ କ୍ରାଇମ୍ବ୍ରାଞ୍ଚକୁ ନକଲି କ୍ୟାନ୍ସର ଔଷଧ ପ୍ରସ୍ତୁତ ଓ ବିକ୍ରି କରୁଥିବା ଏକ ରାକେଟ୍ ସମ୍ପର୍କରେ ସୂଚନା ମିଳିଥିଲା। ଏହି ସୂଚନା ଆଧାରରେ ମଙ୍ଗଳବାର, ଦିଲ୍ଲୀ କ୍ୟାନ୍ସର ହସ୍ପିଟାଲ ସମେତ ୪ଟି ସ୍ଥାନରେ ଏକାସଙ୍ଗରେ ଚଢ଼ଉ କରାଯାଇଥିଲା। ଚଢ଼ଉରେ ବିପୁଳ ପରିମାଣରେ ନକଲି ଇଞ୍ଜେକସନ୍ ଶିଶି, ଔଷଧ ଲେବେଲ୍, ରବର ପ୍ୟାକ୍ ସିଲ୍, ପ୍ୟାକେଜିଂ ସାମଗ୍ରୀ, ପ୍ୟାକେଜିଂ ମେସିନ୍ ଆଦି ଜବତ କରାଯାଇଛି। ମୁଖ୍ୟ ଅଭିଯୁକ୍ତ ଭିଫିଲ ଜୈନ , ନକଲି ଔଷଧର ପ୍ୟାକେଜିଂ କାମ ପରିଚାଳନା କରୁଥିବା ସୂରଯ ସାତଙ୍କ ଘରେ ଚଢ଼ଉ କରାଯାଇଥିଲା। ଅନ୍ୟ ଜଣେ ଅଭିଯୁକ୍ତ ନୀରଜ ଚୌହାନଙ୍କ ଗୁରୁଗ୍ରାମ ଆପାର୍ଟମେଣ୍ଟରୁ ୧୩୭ଟି କେତ୍ରୁଦା, ଇନ୍ଫିନ୍ଜି, ଟେସେନ୍ଟ୍ରିକ୍, ପେରଜେତା, ଓପଦ୍ୟାତା, ଡାରଜାଲେକ୍ସ, ଏରବିଟକ୍ସ ଇନ୍ଜେକ୍ସ ଶିଶି, ସହ ୫୧୯ଟି ଖାଲି ଶିଶି ଜବତ କରାଯାଇଥିଲା। ସେହିଭଳି ତୁଷାର ଚୌହାନଙ୍କ ଘରୁ ୮୬୪ଟି ଖାଲି ଇଞ୍ଜେକସନ୍ ଶିଶି ଜବତ କରାଯାଇଛି। ଯମୁନା ବିହାର ଠାରେ କରାଯାଇଥିବା ଚଢ଼ଉରେ, ପରଭେଜ୍ଙ୍କ ଠାରୁ ୨୦ ଖାଲି ଶିଶି ପ୍ୟାକେଟ୍ ଜବତ କରାଯାଇଛି। ମୁଖ୍ୟ ଅଭିଯୁକ୍ତ ଭିଫିଲ୍ଙ୍କ ନିମନ୍ତେ ପରଭେଜ୍ ଖାଲି ଶିଶି ଯୋଗାଡ଼ କରୁଥିଲା। ସେହିପରି କୋମଲ ତିୱାରୀ ଓ ଅଭିନୟ କୋହଲିଙ୍କ ନିକଟରୁ ଖାଲି ଶିଶି ଓ ଅଧା ବ୍ୟବହୃତ କ୍ୟାନ୍ସର ଇଞ୍ଜେକସନ୍ ଶିଶି ଜବତ କରାଯିବା ସହ ଗିରଫ କରାଯାଇଛି।
Popular Categories
Previous article
Next article