କନ୍ୟା ସନ୍ତାନ ଅଧିକାର ଉପରେ ସଚେତନତା ସୃଷ୍ଟି କଲେ ଦେବରାୟ ନୟାପଲ୍ଲୀ ମହାବିଦ୍ୟାଳୟ ଛାତ୍ରଛାତ୍ରୀ

ଭୁବନେଶ୍ବର: ଦେବରାୟ ନୟାପଲ୍ଲୀ ମହାବିଦ୍ୟାଳୟରେ ରାଜ୍ୟ ସରକାରଙ୍କର ସମନ୍ୱିତ-ଯୁବ-ବିକାଶ କାର୍ୟ୍ୟକ୍ରମ ଅଧିନରେ ଶୁକ୍ରବାର ‘କନ୍ୟା ସନ୍ତାନ’ର ଅଧିକାର ସମ୍ବନ୍ଧୀୟ ସଚେତନତା କାର୍ୟ୍ୟକ୍ରମ ଅନୁଷ୍ଠିତ ହୋଇଯାଇଛି। ଯୁକ୍ତ ଦୁଇ ଶ୍ରେଣୀର ଛାତ୍ରଛାତ୍ରୀମାନେ ଶୁକ୍ରବାର ମହାବିଦ୍ୟାଳୟରୁ ବାହାରି ସମସ୍ତେ ହାତରେ ବ୍ୟାନର ଏବଂ ପ୍ଲାକାର୍ଡ଼ ପ୍ରଦର୍ଶନ ସହ କନ୍ୟା ସନ୍ତାନମାନଙ୍କର ସୁରକ୍ଷା, ଶିକ୍ଷା ଏବଂ ଅଧିକାର ପ୍ରଭୃତି ବିଷୟରେ ସ୍ଲୋଗାନ ପ୍ରଦାନ କରିଥିଲେ।

ଛାତ୍ରଛାତ୍ରୀମାନେ ନୟାପଲ୍ଲୀ ଅଞ୍ଚଳରେ ସରକାରଙ୍କର କନ୍ୟା ସନ୍ତାନ ପ୍ରୋତ୍ସାହନ ଯୋଜନା ସଚେତନତା ସୃଷ୍ଟି କରିଥିଲେ। ମୁଣ୍ଡା ସାହି ଏବଂ ବ୍ରିଟ୍ କଲୋନୀ ପ୍ରଭୃତି ସାହିଗୁଡ଼ିକରେ କନ୍ୟା ସନ୍ତାନର ସୁରକ୍ଷା, ଶିକ୍ଷା ଏବଂ ଅଧିକାର ପ୍ରଭୃତି ବିଷୟରେ ଆଲୋଚନା କରିଥିଲେ। ଏଥିରେ ବହୁ ସଂଖ୍ୟାରେ ଅଧ୍ୟାପକ, ଅଧ୍ୟାପିକା ଏବଂ କର୍ମଚାରୀ ସାମିଲ୍ ହୋଇଥିଲେ । ଅଧ୍ୟକ୍ଷା ରୀନାରାଣୀ ଘଡ଼େଇ ଏବଂ ନୋଡ଼ାଲ ଅଧିକାରୀ ନିଜର ବକ୍ତବ୍ୟ ପ୍ରଦାନ କରି ରାଜ୍ୟ ସରକାରଙ୍କର ଏହି ସମନ୍ୱିତ ଯୁବ ବିକାଶ ଯୋଜନା ଅଧିନରେ ‘କନ୍ୟା ସନ୍ତାନ ପ୍ରୋତ୍ସାହନ’ ଯୋଜନାକୁ ଭୂୟସୀ ପ୍ରଶଂସା କରିଥିଲେ । ନୟାପଲ୍ଲୀ ମୁଣ୍ଡା ସାହି, ବ୍ରିଟ୍ କଲୋନୀ, ତୋଟାପଡ଼ା ଇତ୍ୟାଦି ଅଞ୍ଚଳକୁ ପରିକ୍ରମା କରିଥିଲେ ।

ଏଥିରେ ଛାତ୍ରଛାତ୍ରୀମାନେ କନ୍ୟା ସନ୍ତାନର ଶିକ୍ଷା କ୍ଷେତ୍ରରେ ଓ ମୌଳିକ ଅଧିକାର ସମ୍ବନ୍ଧରେ ଲୋକମାନଙ୍କୁ ସୁଚେଇବା ସହ କନ୍ୟା ସନ୍ତାନର ସର୍ବାଙ୍ଗୀନ ଉନ୍ନତି କଳ୍ପେ ରାଜ୍ୟ ସରକାରଙ୍କର ବିଭିନ୍ନ ଯୋଜନା ସମ୍ବନ୍ଧରେ ଅବଗତ କରାଇଥିଲେ।