ଯାଜପୁର: ଯାଜପୁର ଜିଲା ଜେନାପୁର ଥାନା ଅନ୍ତର୍ଗତ ସୋରେଇ ଗାଁର ଜଣେ ଯୁବକଙ୍କର ତିନି ଦିନ ତଳେ ସନ୍ଦେହଜନକ ଭାବେ ମୃତ୍ୟୁ ହୋଇଥିଲା। ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ କରି ଶନିବାର ଦିନ ମୃତ ଯୁବକଙ୍କ ପରିବାର ଲୋକ ଓ ଗ୍ରାମବାସୀ ୫୩ ନମ୍ବର ଜାତୀୟ ରାଜପଥ ଅବରୋଧ କରିଛନ୍ତି। ଏହା ଫଳରେ ଚଣ୍ଡିଖୋଲ -ଡୁବୁରି ରାସ୍ତାରେ ଗାଡ଼ି ଚଳାଚଳ ସମ୍ପୂର୍ଣ୍ଣ ଭାବେ ବନ୍ଦ ରହିଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରୁଛି।
ସୂଚନାଯୋଗ୍ୟ ଯେ, ଅକ୍ଟୋବର ୩ ତାରିଖ ଦିନ ଜେନାପୁର ଥାନା ସୋରେଇ ଗ୍ରାମର ଦୀପକ ଦଳେଇ(୨୬)ଙ୍କୁ ଗ୍ରାମର ଅନ୍ୟ ଦୁଇଜଣ ଯୁବକ ବାଲେଶ୍ୱର ଯିବା ପାଇଁ ସାଙ୍ଗରେ ଡାକି ନେଇଥିଲେ। କିନ୍ତୁ ୪ ତାରିଖ ଦିନ ଭୋର ସମୟରେ ଦୀପକଙ୍କ ମୃତ ଦେହ ପାଣିକୋଇଲି ଥାନା ଅଞ୍ଚଳରୁ ମିଳିଥିଲା । ତେବେ ଦୀପକଙ୍କର କୌଣସି ପରିଚୟ ପୁଲିସ ନ ପାଇ ଅଜଣା ମୃତଦେହ ଭାବେ ଏହାର ବ୍ୟବଚ୍ଛେଦ କରିଥିଲା। ପରେ ଦୀପକଙ୍କ ପ୍ୟାଣ୍ଟ ପକେଟରୁ ମିଳିଥିବା ଏକ ସିମ୍କାଡ଼ରୁ ତାଙ୍କ ପରିଚୟ ପାଇ ପୁଲିସ ଦୀପକଙ୍କ ଘରଲୋକଙ୍କୁ ଏହି ବିଷୟରେ ଜଣାଇଥିଲା। ତେବେ ଦୀପକଙ୍କୁ ହତ୍ୟା କରାଯାଇଛି ବୋଲି ପରିବାର ଲୋକ ଅଭିଯୋଗ କରିଥିଲେ। ଦୀପକଙ୍କୁ ଡାକି ନେଇଥିବା ଦୁଇ ଜଣ ସାଙ୍ଗକୁ ପୁଲିସ ଗିରଫ କରିବା ଦାବିରେ ଗ୍ରାମବାସୀ ଓ ପରିବାର ଲୋକ ଜାତୀୟ ରାଜପଥ ଅବରୋଧ କରିଛନ୍ତି।
