ନୂଆଦିଲ୍ଲୀ: ପିଲାମାନଙ୍କ ସୁରକ୍ଷା ପାଇଁ ଯେକୌଣସି ବିପଦକୁ ଭ୍ରୂକ୍ଷେପ କରନ୍ତି ନାହିଁ ମା’, ବାପା। ଏହାର ଏକ ଉଦାହରଣ ଅଷ୍ଟ୍ରେଲିଆରେ ଦେଖିବାକୁ ମିଳିଛି। ଅଷ୍ଟ୍ରେଲିଆର ଜଣେ ବାପା ବିଶାଳକାୟ ଗ୍ରେଟ୍ ହ୍ବାଇଟ ସାର୍କ ସହ ଲଢ଼ି ନିଜ ପୁଅର ଜୀବନ ବଞ୍ଚାଇବାକୁ ସକ୍ଷମ ହୋଇଥିବା ଖବର ଚର୍ଚ୍ଚାର ବିଷୟ ପାଲଟିଛି। ସୂଚନାନୁଯାୟୀ ବାପା ଓ ତାଙ୍କ ପୁଅ ମାଛ ଧରିବାକୁ ଡଙ୍ଗା ନେଇ ସମୁଦ୍ରକୁ ଯାଇଥିଲେ। ମାଛ ଧରୁଥିବା ବେଳେ ହଠାତ୍ ଏକ ସାର୍କ ଆସି ତାଙ୍କ ଡଙ୍ଗାକୁ ଧକ୍କା ଦେଇଥିଲା। ଫଳରେ ଡଙ୍ଗାରେ ଥିବା ପୁଅ ପାଣିରେ ପଡ଼ି ଯାଇଥିଲା। ସାର୍କ ପୁଅର ଗୋଡ଼କୁ କାମୁଡ଼ି ଦେଇଥିଲା। ପୁଅର ଏପରି ଅବସ୍ଥା ଦେଖି ବାପା ତାକୁ ବଞ୍ଚାଇବାକୁ ପାଣିକୁ ଡେଇଁଥିଲେ। ପାଣିକୁ ଡେଇଁ ସାର୍କର ଆଖିକୁ ଜୋର୍ରେ ଦାବି ଦେବା ସହ ତା’ ମୁହଁକୁ ମୁଥ ମାରି ଚାଲିଥିଲେ। ଅତର୍କିତ ଆକ୍ରମଣରେ ଭୟଭୀତ ସାର୍କ ପୁଅକୁ ଛାଡ଼ି ପଳାଇ ଯାଇଥିଲା। ପୁଅକୁ କଷ୍ଟେମଷ୍ଟେ କୂଳକୁ ଆଣି ବାପା ଡାକ୍ତରଖାନାକୁ ଫୋନ କରିଥିଲେ। ସ୍ବାସ୍ଥ୍ୟକର୍ମୀମାନେ ପୁଅକୁ ଡାକ୍ତରଖାନାକୁ ନେଇଥିଲେ। ପୁଅର ଗୋଡ଼ରେ ସାର୍କର ୩ଟି ଦାନ୍ତ ଗଳି କ୍ଷତ ହୋଇଥିଲା। ତେବେ ତା’ ଅବସ୍ଥା ଗୁରୁତର ନଥିବା ଡାକ୍ତରଖାନା ତରଫରୁ ସ୍ପଷ୍ଟ କରି ଦିଆଯାଇଛି। ବାପାର ସାହସିକତା ଯୋଗୁଁ ପୁଅ ନିଶ୍ଚିତ ମୃତ୍ୟୁମୁଖରୁ ବର୍ତ୍ତି ଯାଇଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି।
Comments are closed.