ଆଠଗଡ : ଜୟଶ୍ରୀରାମ କ୍ରିକେଟ କ୍ଲବ ଆନୁକୁଲ୍ୟରେ ଉପରସାହିର ମାଟିଗାଡିଆ ଖେଳପଡିଆରେ ଚାଲିଥିବା ୧୬ତମ ଜୟଶ୍ରୀରାମ କ୍ରିକେଟ ଟୁର୍ଣ୍ଣାମେଣ୍ଟ ଶୁକ୍ରବାର ଉଦ୍ଯାପିତ ହୋଇଯାଇଛି। ଫାଇନାଲ ମ୍ୟାଚରେ ଜୟଶ୍ରୀରାମ କ୍ରିକେଟ କ୍ଲବ ଓ ରାଧାଗୋବିନ୍ଦପୁର କ୍ରିକେଟ କ୍ଲବ ପରସ୍ପରକୁ ଭେଟିଥିଲେ। ମ୍ୟାଚରେ ଟସ୍ଜିତି ରାଧାଗୋବିନ୍ଦପୁର ଦଳ ବୋଲିଂ ନିଷ୍ପତ୍ତି ନେବା ପରେ ପ୍ରତିପକ୍ଷ ଜୟଶ୍ରୀରାମ କ୍ଲବ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୮ଓଭରରେ କୌଣସି ୱିକେଟ ନହରାଇ ପ୍ରଶାନ୍ତ ସାହୁଙ୍କ ଧୂଆଁଧାର ୨୫ବଲରୁ ଅପରାଜିତ ୯୧ରନ୍ ସହାୟତାରେ ଦଳ ୧୯୯ରନ୍ ସଂଗ୍ରହ କରିଥିଲା। ଏହାର ଜବାବରେ ରାଧାଗୋବିନ୍ଦପୁର ଦଳ ୮ ଓଭରରେ ୬ ୱିକେଟ ହରାଇ ମାତ୍ର ୧୨୦ରନ୍ କରି ପରାଜୟ ବରଣ କରିଥିଲା। ଉଦ୍ଯାପନୀ ଉତ୍ସବରେ ଯୁବ ସଂଗଠକ ତଥା ପୂର୍ବତନ ସୈନିକ ଅଭୟ କୁମାର ବାରିକ ମୁଖ୍ୟ ଅତିଥି ଓ ଆଇନଜୀବୀ ଜ୍ଞାନରଞ୍ଜନ ମହାପାତ୍ର ସମ୍ମାନିତ ଅତିଥି ଭାବେ ଯୋଗଦେଇ ଖେଳାଳିଙ୍କୁ ଉତ୍ସାହିତ କରିବା ସହ ବିଜେତା ଓ ଉପ-ବିଜେତାଙ୍କୁ ଟ୍ରଫି ଓ ଆର୍ଥିକ ପୁରସ୍କାର ପ୍ରଦାନ କରିଥିଲେ। ଅମୀୟ କୁମାର ଦାସ ଓ ଅଜୟ ଚକ୍ରବର୍ତ୍ତୀ ମ୍ୟାଚଟିକୁ ପରିଚାଳନା କରିଥିଲେ। ଆୟୋଜକ କ୍ଲବର ସଦସ୍ୟମାନେ ଟୁର୍ଣ୍ଣାମେଣ୍ଟ ପରିଚାଳନା କରିଥିଲେ।
Comments are closed.