ସମାଜ ଡିଜିଟାଲ ଡେସ୍କ: ଆନ୍ଧ୍ରପ୍ରଦେଶରୁ ଗାଈ କିଣି ଘରକୁ ଫେରୁଥିବା ଜଣେ ଚାଷୀଙ୍କୁ ଭୁବନେଶ୍ଵର ପଳାଶୁଣୀ ଛକରେ ଆକ୍ରମଣ କରାଯାଇଛି। ଗୋରକ୍ଷକ ନାମରେ କିଛି ଦୁର୍ବୃତ୍ତ ଚାଷୀ ଏବଂ ତାଙ୍କ ସାଥୀରେ ଥିବା ଲୋକଙ୍କୁ ରାସ୍ତାରେ ଆଣ୍ଠେଇ ମାଡ଼ ମାରିଥିବା ଅଭିଯୋଗ ହୋଇଛି।
ସୂଚନା ଅନୁସାରେ, କଟକ ଜିଲା ସିଠାଳ ଅଞ୍ଚଳର ଜଣେ ଦୁଗ୍ଧ ଚାଷୀ ଆନ୍ଧ୍ରପ୍ରଦେଶରୁ ପିକ୍ ଅପ ଭ୍ୟାନ ଜରିଆରେ କିଛି ଗାଈ ଏବଂ ବାଛୁରୀଙ୍କୁ କିଣି ଓଡ଼ିଶା ଫେରିଥିଲେ। ଗତ ୨୮ ତାରିଖରେ ପଳାଶୁଣୀ ଛକରେ ଏକ କାରରେ କେତେଜଣ ଦୁର୍ବୃତ୍ତ ପହଞ୍ଚି ଗାଡ଼ିକୁ ଅଟକାଇଥିଲେ। ଗୋଚାଲାଣ କରୁଥିବା ଅଭିଯୋଗ କରି ଦୁର୍ବୃତ୍ତମାନେ ଦୁଗ୍ଧ ଚାଷୀ ଏବଂ ତାଙ୍କ ସାଥୀରେ ଥିବା ଲୋକଙ୍କୁ ରାସ୍ତାରେ ଆଣ୍ଠେଇ ମାଡ଼ ମାରିଥିଲେ। ଚାଷୀ ଜଣକ ସମସ୍ତ କାଗଜପତ୍ର ଦେଖାଇଥିଲେ ହେଁ ସେମାନେ ଶୁଣି ନ ଥିଲେ। ଓଲଟି ଗାଡ଼ି ଛାଡ଼ିବାକୁ ଟଙ୍କା ଦାବି କରିଥିଲେ। ପରେ ଖବର ପାଇ ପୁଲିସ ପହଞ୍ଚିବାରୁ ଦୁଗ୍ଧଚାଷୀ ଦୁର୍ବୃତ୍ତଙ୍କ କବଳରୁ ମୁକୁଳିଥିଲେ। କିନ୍ତୁ ଗୋରକ୍ଷକ ନାମରେ ଦୌରାତ୍ମ୍ୟ କରିଥିବା ଯୁବକମାନଙ୍କ ବିରୋଧରେ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଇ ନ ଥିଲା। ଘଟଣା ସମୟର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେଉଛି।
ଏହି ଖବର ରାଜ୍ୟ ଦୁଗ୍ଧଚାଷୀ ସଂଘ ପାଇବା ପରେ ଏଭଳି ଦୌରାତ୍ମ୍ୟ ବିରୋଧରେ ସ୍ଵର ଉତ୍ତୋଳନ କରିଛି। ସଂଘ ପଦାଧିକାରୀ ଏବଂ ପୀଡ଼ିତ ଚାଷୀ କ୍ଷତିପୂରଣ ଏବଂ ଅଭିଯୁକ୍ତମାନଙ୍କୁ ଗିରଫ କରାଯିବା ଦାବିରେ ଶୁକ୍ରବାର ମଞ୍ଚେଶ୍ଵର ଥାନା ସମ୍ମୁଖରେ ଧାରଣା ଦେଇଛନ୍ତି।
