ଆଠଗଡ : କରୋନା ମହାମାରୀର କରାଳ ରୂପ ଥମିବା ପରେ ପ୍ରାୟ ୨୦ମାସ ପରେ ବେଶ ଉତ୍ସାହ ଓ ଉଦ୍ଦୀପନା ମଧ୍ୟରେ ୬ଷ୍ଠ ଓ ୭ମ ଶ୍ରେଣୀ ବିଦ୍ୟାର୍ଥୀମାନେ ସୋମବାର ନିଜ ବିଦ୍ୟାଳୟରେ ପାଦ ଥାପିବା ପରେ ସେମାନଙ୍କ ଆନନ୍ଦ କହିଲେ ନସରେ । କରୋନା ସଂକ୍ରମଣ ପାଇଁ ଏପରି ବହୁ ଛାତ୍ରଛାତ୍ରୀ ଅଛନ୍ତି ଯେଉଁମାନେ ୫ମ ଓ ୬ଷ୍ଠ ଶ୍ରେଣୀ ଅନ୍ୟ ବିଦ୍ୟାଳୟରୁ ପାସ କରି ନୂତନ ଉଚ୍ଚ ବିଦ୍ୟାଳୟରେ ନାମ ଲେଖାଇବା ପରେ ସ୍କୁଲରେ ପ୍ରବେଶ କରିନଥିଲେ। ସୋମବାର ସରକାରଙ୍କ ନିର୍ଦ୍ଦେଶ ଅନୁଯାୟୀ ୬ଷ୍ଠ ଓ ୭ମ ଶ୍ରେଣୀ ପିଲାମାନେ ଶ୍ରେଣୀ କକ୍ଷରେ ଶିକ୍ଷାଦାନ ପାଇଁ ବିଦ୍ୟାଳୟକୁ ଯାଇଥିଲେ। ଆଠଗଡ ସହରର ବିଶ୍ୱନାଥ ବିଦ୍ୟାପୀଠ, ସରକାରୀ ବାଳିକା ହାଇସ୍କୁଲ, ରାସରସିକପରୁ ୟୁଜିୟୁପି ସ୍କୁଲ, କନ୍ତୋଲ ନୋଡାଲ ସ୍କୁଲ ସମେତ ଗ୍ରାମାଞ୍ଚଳର ସମସ୍ତ ହାଇସ୍କୁଲ, ନୋଡାଲ ସ୍କୁଲ ଓ ପ୍ରକଳ୍ପ ବିଦ୍ୟାଳୟରେ ୬ଷ୍ଠ ଓ ୭ମ ଛାତ୍ରଛାତ୍ରୀଙ୍କୁ ଫୁଲଚନ୍ଦନ ଦେଇ ଶିକ୍ଷକ ଶିକ୍ଷୟିତ୍ରୀମାନେ ସ୍ୱାଗତ କରିଥିଲେ। ପିଲାମାନେ ନିଜ ଅଭିଭାବକଙ୍କ ଘୋଷଣାପତ୍ର ସହିତ ବିଦ୍ୟାଳୟରେ ପହଞ୍ଚିବା ପରେ ସେମାନଙ୍କର ଥର୍ମାଲ ସ୍କାନର ମାଧ୍ୟମରେ ଶରୀରର ତାପମାତ୍ରା ପରୀକ୍ଷା କରିବା ସହିତ ବିଦ୍ୟାଳୟ ପକ୍ଷରୁ ଶ୍ରେଣୀ କକ୍ଷ ଗୁଡିକୁ ବିଶୋଧନ କରାଯାଇଥିଲା । ପ୍ରଥମ କରି ୨୦ମାସ ପରେ ବିଦ୍ୟାଳୟରେ ପାଦ ଥାପିଥିବା ବିଦ୍ୟାର୍ଥୀଙ୍କ ସଂଖ୍ୟା ବିଭିନ୍ନ ବିଦ୍ୟାଳୟରେ ହାରାହାରି ୮୦ପ୍ରତିଶତ ରହିଥିବା ବ୍ଲକଶିକ୍ଷାଧିକାରୀ ବିଜୟ ଲକ୍ଷ୍ମୀ ସାମଲଙ୍କ ସୁତ୍ରରୁ ପ୍ରକାଶ । ନୂଆ ରୂପରେ ରୂପାନ୍ତରିତ ବିଶ୍ୱନାଥ ବିଦ୍ୟାପୀଠକୁ ଦେଖି ୬ଷ୍ଠ ଓ ୭ମ ଶ୍ରେଣୀ ବିଦ୍ୟାର୍ଥୀ ଉଲ୍ଲସିତ ହୋଇଯାଇଥିଲେ । ତେବେ ପ୍ରଥମ ଶ୍ରେଣୀରୁ ପଞ୍ଚମ ଶ୍ରେଣୀ ପିଲାଙ୍କ ପାଇଁ ଶ୍ରେଣୀକକ୍ଷ ଶିକ୍ଷାଦାନ ପାଇଁ ସରକାର ଯଥାଶୀଘ୍ର ନିଷ୍ପତ୍ତି ନେବା ପାଇଁ ଅଭିଭାବକ ମହଲରେ ଦାବି ହେଉଛି।
Popular Categories
Previous article
Next article