ସାଲେପୁର: ମାହାଙ୍ଗା ବ୍ଲକ ଆଗରେ ଦୁଇ ଗୋଷ୍ଠୀଙ୍କ ମଧ୍ୟରେ ଧସ୍ତାଧସ୍ତି ହେବା ଫଳରେ ଘଟଣାସ୍ଥଳରେ ଏସଡିପିଓ ଆହତ ହୋଇଥିବା ସୂଚନା ମିଳିଛି। ଘଣାସ୍ଥଳରେ ମାହାଙ୍ଗା ପୁଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହିତ ପରିସ୍ଥିତି ନିୟନ୍ତ୍ରଣ କରିଥିବା ଜଣାପଡ଼ିଛି।
ବୁଧବାରଠାରୁ ବ୍ଲକ ଅଧ୍ୟକ୍ଷା ଓ ପଞ୍ଚାୟତ ପ୍ରତିନିଧି ମାହାଙ୍ଗା ବ୍ଲକ ଆଗରେ ଧାରଣା ଦେଇଥିଲେ। ବିଭିନ୍ନ କାର୍ଯ୍ୟରେ ଅସନ୍ତୋଷ ପ୍ରକାଶ କରି ସେମାନେ ଧାରଣା ଦେଇଥିଲେ। ବିଧାୟକଙ୍କ ସମର୍ଥକ ଧାରଣାସ୍ଥଳରେ ପହଞ୍ଚି ସେମାନଙ୍କୁ ବିରୋଧ କରିବାରୁ ଠେଲାପେଲା ସ୍ଥିତି ଉପୁଜିଥିଲା। ପରିସ୍ଥିତି ନିୟନ୍ତ୍ରଣ ପାଇଁ ଏସଡିପିଓ ଉଭୟ ଗୋଷ୍ଠୀଙ୍କୁ ବୁଝାସୁଝା କରିବାକୁ ସେଠାରେ ପହଞ୍ଚିଥିଲେ। ଦୁଇ ଗୋଷ୍ଠୀ ମଧ୍ୟରେ ଚେୟାର ଫିଙ୍ଗାଫୋପଡ଼ା କଲାବେଳେ ଗୋଟିଏ ଚେୟାର ସେଠାରେ ଥିବା ଏସଡିପିଓଙ୍କୁ ବାଜିବାରୁ ସେ ଆହତ ହୋଇଥିଲେ। ତାଙ୍କୁ ତୁରନ୍ତ ଚିକିତ୍ସା ପାଇଁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା।
ଘଟଣାସ୍ଥଳରେ ମାହାଙ୍ଗା ପୁଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା। ଗଣ୍ଡଗୋଳକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ଗ୍ରହଣ କରାଯାଇଛି ଏବଂ ତଦନ୍ତ ପ୍ରକ୍ରିୟା ଚାଲୁ ରହିଛି ବୋଲି ମାହାଙ୍ଗା ପୁଲିସ ସୂଚନା ଦେଇଛି।
Comments are closed.