ନ୍ୟୁୟର୍କ: ୱିଗର ମୁସଲମାନଙ୍କ ଉପରେ ଅତ୍ୟାଚାର ପ୍ରସଙ୍ଗରେ ମିଳିତ ଜାତିସଂଘର ଦେଶ ସମୂହ ଚୀନକୁ ନିନ୍ଦା କରିଛନ୍ତି । ଏହି ପ୍ରସଙ୍ଗରେ ମିଳିତ ଜାତିସଂଘରେ ଚୀନ ଏକ ଘରକିଆ ହୋଇ ପଡ଼ିଛି । ୩୯ ଦେଶ ଚୀନ ବିରୋଧରେ ଜାତିସଂଘରେ ନିନ୍ଦା ପ୍ରସ୍ତାବ ଆଣିଛନ୍ତି । ଚୀନ୍ ଜିନଜିଆଙ୍ଗରେ ପ୍ରାୟ ୨ ନିୟୁତ ଉଇଗର ମୁସଲମାନଙ୍କୁ ଅଟକ ରଖି ନିର୍ଯାତନା ଦେଉଥିବା ଅଭିଯୋଗ କରିଛନ୍ତି । କେବଳ ସେତିକି ନୁହେଁ, ଚୀନ୍ ମଧ୍ୟ ତିବ୍ଦତର ସଂଖ୍ୟାଲଘୁ ଗୋଷ୍ଠୀଙ୍କୁ ନିର୍ଯାତନା ଦେଉଥିବା ଓ ହଂକଂ ଉପରେ ନୂତନ ଜାତୀୟ ସୁରକ୍ଷା ଆଇନ ଲାଗୁ କରିଥିବା ଅଭିଯୋଗ ହୋଇଛି। ହଂକଂରେ ମାନବିକ ଅଧିକାରର ଉଲ୍ଲଂଘନ ତଥା ସାମାଜିକ କର୍ମୀଙ୍କୁ ଜେଲକୁ ପଠାଇଥିବାରୁ ଚୀନ୍ ସରକାର କଡ଼ା ସମାଲୋଚନାର ସମ୍ମୁଖୀନ ହେବାକୁ ପଡ଼ିଛି ।
ଆମେରିକା, ୟୁରୋପୀୟ ଦେଶ, ଜାପାନ ସମେତ୩୯ଟି ଦେଶ ଚୀନ୍ କୁ ଜାତିସଂଘ ମାନବ ଅଧିକାର ମୁଖ୍ୟ ମିସେଲ ବେଚଲେଟ୍ ଏବଂ ସ୍ବାଧୀନ ପର୍ଯ୍ୟବେକ୍ଷକମାନଙ୍କୁ ଜିନଜିଆଙ୍ଗ ଅଞ୍ଚଳରେ ମୁକ୍ତ ଭାବରେ ଯିବାକୁ ଅନୁମତି ଦେବାକୁ ଦାବି କରିଛନ୍ତି । ଏହା ସହିତ ଚାଇନାକୁ ମଧ୍ୟ ଉଇଗର ମୁସଲମାନ ଏବଂ ନିଜ ଦେଶରେ ଅଳ୍ପସଂଖ୍ୟକ ସମ୍ପ୍ରଦାୟର ଅନ୍ୟ ସଦସ୍ୟମାନଙ୍କୁ ଦିଆଯାଉଥିବା ନିର୍ଯାତନା ବନ୍ଦ କରିବାକୁ କୁହାଯାଇଛି ।
ମିଳିତ ଜାତିସଂଘ ମାନବ ଅଧିକାର କମିଟି ଦ୍ବାରା ଜାରି ମିଳିତ ବିବୃତ୍ତିରେ ୩୯ ଦେଶ ଚୀନ୍କୁ ହଂକଂର ଆର୍ଥିକ ସ୍ବାଧୀନତା, ସ୍ୱାଧୀନତାର ଅଧିକାର ଏବଂ ନ୍ୟାୟପାଳିକାର ସ୍ବାଧୀନତାକୁ ପୁନସ୍ଥାପନ କରିବାକୁ ଚୀନକୁ ପରାମର୍ଶ ଦେଇଛନ୍ତି । ମିଳିତ ଜାତିସଂଘରେ ଜର୍ମାନୀର ରାଷ୍ଟ୍ରଦୂତ କ୍ରିଜଟୋଫ୍ ହେସଗେନ ଚୀନ ବିରୋଧରେ ପ୍ରସ୍ତାବ ଆଗତ ପରେ ପାକିସ୍ତାନ ଚୀନ ସପକ୍ଷରେ ମତ ଦେଇ ହଂକଂ ପ୍ରସଂଗରେ ହସ୍ତକ୍ଷେପକୁ ବିରୋଧ କରିଥିଲା । ତେବେ ଏହା ଜାତିସଂଘର ଶକ୍ତିଶାଳୀ ଦେଶଗୁଡ଼ିକ ଦ୍ବାରା ପ୍ରତ୍ୟାଖ୍ୟାନ କରାଯାଇଥିଲା ।
