ନିକଟରେ ଗ୍ବାଲିୟର ଚିକିତ୍ସାଳୟରେ ଅଭିଜ୍ଞ ଡାକ୍ତରୀ ଦଳଙ୍କ ପରାମର୍ଶକ୍ରମେ ଏକ ସଫଳ ଅପରେସନ୍ ହୋଇପାରିଛି। ସ୍ଥାନୀୟ ଦତିୟା ନିବାସୀ ଆକାଶ କରୋଠିୟାଙ୍କ ପତ୍ନୀ ପ୍ରିୟଙ୍କା ଯଥାସମୟରେ ସନ୍ତାନ ପ୍ରସବ କରାଇଥିଲେ। ତାଙ୍କର ଏହି ସନ୍ତାନର ଜନ୍ମ ଝାନ୍ସୀର ସରକାରୀ ଚିକିତ୍ସାଳୟରେ ହୋଇଥିଲା। ତେବେ ଡାକ୍ତରୀ ଦଳ ଲକ୍ଷ୍ୟ କଲେ ଯେ ନବଜାତକର ପେଟ ଜନ୍ମପରଠାରୁ ଫୁଲି ରହିଛି। ଜୁନ୍ ୩ରେ ମାତ୍ର ୨୮ଦିନର ଶିଶୁର ଯାଞ୍ଚ କରାଗଲା। ସେଠାକାର ଶିଶୁ ରୋଗ ବିଶେଷଜ୍ଞ ଡାକ୍ତର ଅମିତ୍ ଅଗ୍ରୱାଲ୍ ହିଁ ଏସବୁ ତଦାରଖ କଲେ। ନବଜାତ ଶିଶୁର ପେଟରେ ବିକଶିତ ଭ୍ରୂଣ ଥିବାର ଜଣାପଡ଼ିଥିଲା। ଭ୍ରୂଣର ଶରୀର ଯଥାକ୍ରମେ ଯକୃତ, ମୁଣ୍ଡ, ହାଡ଼, ପ୍ଲାସେଣ୍ଟା ଆଦି ହୋଇସାରିଥିବାବେଳେ କେବଳ ଜୀବନ ନଥିଲା। ଡାକ୍ତରୀ ଦଳ ଆଉ ବିଳମ୍ବ ନକରି ତୁରନ୍ତ ଅପରେସନ୍ ପ୍ରସ୍ତୁତି ଆରମ୍ଭ କଲେ। ୩୫ଦିନର ନବଜାତ ଶିଶୁର ଅପରେସନ୍ ୫ଜଣିଆ ଡାକ୍ତରୀଦଳ ଦେଢ଼ଘଣ୍ଟା କରିଥିଲେ। ଏହି ପଦକ୍ଷେପରେ ସେମାନେ ସଫଳ ହୋଇଥିଲେ। ଡାକ୍ତର ଅମିତ୍ ଅଗ୍ରୱାଲ କହିଛନ୍ତି, ମା’ ଗର୍ଭରେ ଦୁଇଟି ଭ୍ରୂଣ ଥିବା ସମୟରେ ହିଁ ଏଭଳି ପରିସ୍ଥିତି ଉପୁଜେ। ଗୋଟିଏ ଭ୍ରୂଣ ମରିଯିବା ପରେ ତାହା ଅନ୍ୟ ଭ୍ରୂଣ ଭିତରକୁ ଯିବା ପରେ ଏହି ଅସୁବିଧା ହୋଇଥାଏ। ପ୍ରତି ୫ଲକ୍ଷ ନବଜାତକଙ୍କ ମଧ୍ୟରେ ଜଣଙ୍କଠାରେ ଏହି ସ୍ଥିତି ଦେଖାଯାଏ। ବିଶ୍ବସ୍ତରରେ ଏହିପରି କେସ୍ ୨୦୦ଟି ହୋଇଥିବାବେଳେ ଭାରତରେ ୫୦ଟି କେସ୍ ହୋଇଛି। ଏ ରୋଗ ଡାକ୍ତରୀ ଭାଷାରେ ‘ଫିଟସ୍ ଇନ୍ ଫିଟ୍’ ଜଣାଯାଏ।
