ସମାଜ ଡିଜିଟାଲ ଡେସ୍କ: ପହଲଗାଓଁ ଆକ୍ରମଣର ପ୍ରତିଶୋଧ ନେବାକୁ ୭ମେଇରେ ଭାରତୀୟ ସେନା ଆରମ୍ଭ କରିଥିଲା ଅପରେସନ ସିନ୍ଦୂର । ଏହି ଅପରେସନ ଜରିଆରେ ଶତ୍ରୁ ଦେଶକୁ ଧୂଳି ଚଟାଇ ଆତଙ୍କୀଙ୍କ ଆଡ୍ଡାକୁ ଧ୍ୱଂସ କରିବା ସହ ୧୦୦ରୁ ଅଧିକ ଆତଙ୍କବାଦୀଙ୍କୁ ନିପାତ କରିଥିଲା ଭାରତୀୟ ସେନା । ପୁରା ଦୁନିଆ ଏବେ ଏହି ଶଦ୍ଦକୁ ଆତଙ୍କବାଦ ବିରୋଧରେ ଭାରତର ବଡ କାର୍ଯ୍ୟାନଷ୍ଠାନ ଭାବରେ ମନେ ରଖିବ । ତେବେ ଏହି ଅପରେସନର ଲୋଗୋ କିଏ ତିଆରି କରିଥିଲା, ଡିଜାଇନ୍ କିଏ କରିଥିଲେ ତାହାକୁ ନେଇ ସବୁଠି ଚର୍ଚ୍ଚା । ଏହାକୁ କରିବାରେ ଦୁଇ ଜଣ ସେନା ସୈନିକଙ୍କ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।
ଅପରେସନ ସିନ୍ଦୂରର ସୁନ୍ଦର ଲୋଗୋକୁ କର୍ଣ୍ଣେଲ ହର୍ଷ ଗୁପ୍ତା ଏବଂ ହାବିଲଦାର ସୁରିନ୍ଦର ସିଂହ ମିଳିତ ଭାବେ ତିଆରି କରିଥିଲେ । ସେନାର ଏହି ଦୁଇ ସାହାସୀ ସୈନିକ ଏହି ସୁନ୍ଦର ଲୋଗୋ ତିଆରି କରିଛନ୍ତି ଯାହା ଏବେ ଲୋକଙ୍କ ମନରେ ସବୁଦିନ ପାଇଁ ରହିବ । ଏହି ଦୁଇ ସେନା ଅଧିକାରୀ ସେନାର ରଣନୈତିକ ଯୋଗାଯୋଗରେ ନିୟୋଜିତ ହୋଇଛନ୍ତି । କର୍ଣ୍ଣେଲ ହର୍ଷ ଗୁପ୍ତା ପଞ୍ଜାବ ରେଜିମେଣ୍ଟରୁ ଆସିଥିବା ବେଳେ ହାବିଲଦାର ସୁରିନ୍ଦର ସିଂହ ସେନାର ଶିକ୍ଷା କୋର ସହିତ ଜଡିତ ଅଛନ୍ତି । ଏହି ଲୋଗୋଟି ଏପର୍ଯ୍ୟନ୍ତ ଟ୍ୱିଟରରେ ୯କୋଟି ଥର ଏବଂ ଇନଷ୍ଟାଗ୍ରାମରେ ୫୧କୋଟି ଥର ଦେଖାଯାଇଛି ।
ଭାରତୀୟ ସେନାର ବାର୍ତ୍ତାଳାପ ପତ୍ରିକାରେ ଅପରେସନ ସିନ୍ଦୂରର ଲୋଗୋ ଡିଜାଇନ୍ କରିଥିବା ଏହି ଦୁଇ ଅଧିକାରୀଙ୍କ ଫଟୋ ପ୍ରକାଶିତ ହୋଇଛି । ମାତ୍ର ୪୫ ମିନିଟରେ ଏହି ଲୋଗୋ ଡିଜାଇନ୍ ହୋଇଥିଲା । ପହଲଗାଓଁ ଆତଙ୍କବାଦୀ ଆକ୍ରମଣ ବିଷୟରେ ମଧ୍ୟ ଉଲ୍ଲେଖ ରହିଛି ।
Comments are closed.