ଚୌଦ୍ୱାର: ଚୌଦ୍ୱାର ସହରରେ ବିଭିନ୍ନ ସ୍ଥାନରେ ମା ଶ୍ୟମାକାଳିଙ୍କ ପୂଜା ଧୂମଧାମରେ ଅନୁଷ୍ଠିତ ହୋଇଛି। ବଧୀପଡ଼ିଆସ୍ଥିତ ଶ୍ମଶାନ ନିକଟ ଶ୍ମଶାନବାସିନୀ ମା’ କାଳୀ ମନ୍ଦିରରେ ଗତ ଶନିବାର ଠାରୁ ଆରମ୍ଭ ହୋଇ ଥିବା ଉତ୍ସବରେ ଅଙ୍କୁରାରୋପଣ, ଅଧିବାସ, କଳସ ଶୋଭାଯାତ୍ରା, ସୂର୍ଯ୍ୟପୂଜା, ଗୋପୂଜନ, ଚଣ୍ଡିପାଠ, ଚଣ୍ଡୀ ଆହୁତି, ମହାପୂଜା ଆଦି ବହିବିଧ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ପ୍ରତି ସଂଧ୍ୟାରେ ଭଜନ ସମାରୋହ, ନାମ ସଂକୀର୍ତ୍ତନ ଆଦି ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଶ୍ମଶାନକାଳୀଙ୍କ ଦର୍ଶନ ପାଇଁ ପୀଠରେ ଶ୍ରଦ୍ଧାଳୁଙ୍କ ଭିଡ଼ ଲାଗି ରହିଥିଲା।
ଏହି କାର୍ଯ୍ୟକ୍ରମ ୫ଦିନ ଧରି ଚାଲିବ ବୋଲି ମନ୍ଦିର ପରିଚାଳନା କମିଟି ସୂଚନା ଦେଇଛନ୍ତି। ବଧୀମଠ ପରିସରରେ ନିର୍ମିତ ମା’କାଳୀଙ୍କ ମୃଣ୍ମୟ ପ୍ରତିମାଙ୍କ ପୂଜାର୍ଚ୍ଚନା ସମାରୋହରେ ଅନୁଷ୍ଠିତ ହୋଇଛି। ଥର୍ମାଲ ରୋଡ଼ ପାଖ ଘଡ଼ଘଡ଼ିହୁଡ଼ା ଶ୍ମଶାନ ନିକଟ ମା’ଦକ୍ଷିଣେଶ୍ୱରୀ କାଳୀ ମନ୍ଦିରରେ ସୋମବାର ଦିନ ସକାଳରୁ ମଧ୍ୟରାତ୍ର ପର୍ଯ୍ୟନ୍ତ ଦେବୀଙ୍କର ମହାପୂଜା ଅନୁଷ୍ଠିତ ହୋଇଥିଲା। ଥର୍ମଲ ରୋଡ଼ରେ ନିର୍ମିତ ମାଙ୍କ ମୃଣ୍ମୟ ପ୍ରତିମା ଦେଖିବାକୁ ମଣ୍ଡପରେ ଜନ ଗହଳି ପରିଲକ୍ଷିତ ହୋଇଥିଲା। ଚାରବାଟିଆସ୍ଥିତ କାଳୀ ମନ୍ଦିର, ଗୋଡ଼ିପାଟଣା ସ୍ଥିତ କାଳୀ ମନ୍ଦିର,ବୈଦ୍ୟେଶ୍ୱରସ୍ଥିତ ଦକ୍ଷିଣେଶ୍ୱର କାଳୀ ମନ୍ଦିରରେ ରୀତିନୀତିରେ ପୂଜାଚ୍ଚନା ହୋଇଥିବା ଜଣା ପଡ଼ିଛି।
Comments are closed.