ଚେନ୍ନଇ : ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ଚଳିତ ବର୍ଷ ଅପ୍ରେଲ ମାସ ସୁଦ୍ଧା ଚନ୍ଦ୍ରଯାନ-୨କୁ ମହାକାଶକୁ ପଠାଇବାର ଲକ୍ଷ୍ୟ ରଖିଛି। ଏଥର ଚନ୍ଦ୍ରଯାନ-୨ ସହ ଏକ ରୋବର୍ଟକୁ ପଠାଯିବ। ଏହି ରୋବର୍ଟ ଚନ୍ଦ୍ରରେ ଓହ୍ଲାଇ ଆବଶ୍ୟକ ତଥ୍ୟ ସଂଗ୍ରହ କରିବ।
ଇସ୍ରୋ ଅଧ୍ୟକ୍ଷ ପ୍ରଫେସର କେ.ସିବନଙ୍କ କହିବା ଅନୁସାରେ ଚଳିତ ବର୍ଷ ଅପ୍ରେଲରେ ଏହି ମିଶନ ପୂରା ନ ହେଲେ ଅକ୍ଟୋବର ମାସରେ ଚନ୍ଦ୍ରଯାନ-୨କୁ ଉତ୍କ୍ଷେପଣ କରାଯିବ । ପ୍ରକାଶ ଯେ ଏହା ପୂର୍ବରୁ ୨୦୦୮ ଅକ୍ଟୋବର ୨୨ରେ ଚନ୍ଦ୍ରଯାନ-୧କୁ ମହାକାଶକୁ ପଠାଯାଇଥିଲା ।
ଚନ୍ଦ୍ରଯାନ- ୨ ସହ ଏକ ଆର୍ବିଟର, ଲ୍ୟାଣ୍ଡର ଏବଂ ୬ ଚକ ବାଲା ରୋବର୍ଟ ମହାକାଶକୁ ପଠାଯିବ । ଚନ୍ଦ୍ର କକ୍ଷରେ ପହଞ୍ଚିବା ପରେ ଚନ୍ଦ୍ରଯାନ-୨ରୁ ରୋବର୍ଟଟି ଅଲଗା ହୋଇଯିବ । ଏହାପରେ ବୈଜ୍ଞାନିକମାନେ ଏହାକୁ ଚନ୍ଦ୍ରରେ ଅବତରଣ କରାଇବେ। ଏହି ରୋବର୍ଟ ଚନ୍ଦ୍ର ପୃଷ୍ଠରେ ଘୁରିବୁଲି ବିଭିନ୍ନ ଫଟୋ ଉଠାଇବା ସହ ଆବଶ୍ୟକ ତଥ୍ୟ ପଠାଇବ ବୋଲି ଇସ୍ରୋ ପକ୍ଷରୁ ସୂଚନା ଦିଆଯାଇଛି ।