ନୂଆଦିଲ୍ଲୀ: ସିବିଏସଇ ଦ୍ୱାରା ପରିଚାଳିତ ଦଶମ ଶ୍ରେଣୀ ପାଠ୍ୟକ୍ରମର ସାମାଜିକ ବିଜ୍ଞାନରେ ଥିବା ଗଣତନ୍ତ୍ର ଓ ବିବିଧତା ଆଧାରିତ ବିଷୟ ୨୦୧୯-୨୦ ବାର୍ଷିକ ପରୀକ୍ଷାରେ ସାମିଲ କରାଯିବ ନାହିଁ। ଗଣତନ୍ତ୍ର ଏବଂ ବିବିଧତା, ଲୋକପ୍ରିୟ ସଂଘର୍ଷ ଏବଂ ଆନ୍ଦୋଳନ ଓ ଗଣତନ୍ତ୍ର କ୍ଷେତ୍ରରେ ଆହ୍ୱାନ ଭଳି ତିନୋଟି ବିଷୟରେ ୨୦୨୦ ବୋର୍ଡ ପରୀକ୍ଷାରେ ମୂଲ୍ୟାୟନ ହେବ ନାହିଁ। ସିବିଏସଇ ଦ୍ୱାରା ଜାରି ଏକ ପତ୍ରରେ କୁହାଯାଇଛି ଯେ ଏହି ବିଷୟ ସବୁ ବିଦ୍ୟାଳୟ ଦ୍ୱାରା ହେଉଥିବା ଇଣ୍ଟରନାଲ ପରୀକ୍ଷାରେ କେବଳ ମୂଲ୍ୟାୟନ କରାଯିବ। ମାନବ ସଂଶାଧନ ବିକାଶ ମନ୍ତ୍ରାଳୟ ଦ୍ୱାରା ସମ୍ପ୍ରତି ଛାତ୍ରଛାତ୍ରୀଙ୍କ ବହି ଭାର କମ କରିବା ଉଦ୍ଦେଶ୍ୟରେ ଏଭଳି ନିଷ୍ପତ୍ତି ନିଆଯାଇଥିବା ଅନୁମାନ କରାଯାଉଛି।
ଅନ୍ୟପକ୍ଷରେ ଏନସିଇଆରଟିର ପୂର୍ବତନ ଅଧ୍ୟକ୍ଷ କୃଷ୍ଣ କୁମାର ଏଭଳି ନିଷ୍ପତ୍ତିକୁ ନାପସନ୍ଦ କରି କହିଛନ୍ତି ଯେ, ୨୦୦୫ରେ ଉଭୟ ଶିକ୍ଷକ ଓ ଛାତ୍ରଛାତ୍ରୀଙ୍କ ଜ୍ଞାନ ବୃଦ୍ଧି ପାଇଁ ଏହି ବିଷୟ ସବୁ ସାମିଲ କରାଯାଇଥିଲା। ଏହା କେବଳ ପରୀକ୍ଷା ପାଇଁ ଉଦ୍ଦିଷ୍ଟ ନ ଥିଲା। ସେ କହିଛନ୍ତି ଯେ ଏ ସବୁ ବିଷୟ ହଟେଇ ଦେବା ଫଳରେ ପିଲାମାନଙ୍କର ପାଠ୍ୟକ୍ରମ ପ୍ରତି ପୂର୍ବ ଭଳି ରୁଚି ରହିବ ନାହିଁ।
