ଓଟାୱା : ମ୍ୟାଁମାର ରାଷ୍ଟ୍ର ମୁଖ୍ୟ ଅଙ୍ଗ୍ ସାନ୍ ସୁ କି’ଙ୍କୁ ପ୍ରଦତ୍ତ ସମ୍ମାନସୂଚକ ନାଗରିକତ୍ୱ ପ୍ରତ୍ୟାହାର କରିନେଇଛି କାନାଡ଼ା। ଦେଶର ପାର୍ଲାମେଣ୍ଟରେ ଶୁକ୍ରବାର ଏ ସଂକ୍ରାନ୍ତ ପ୍ରସ୍ତାବ ସର୍ବସମ୍ମତ ଭାବେ ଗୃହୀତ ହୋଇଛି। ରୋହିଙ୍ଗ୍ୟା ଶରଣାର୍ଥୀ ସମସ୍ୟା ନେଇ କାନାଡ଼ା ଏଭଳି ପଦକ୍ଷେପ ନେଇଥିବା କହିଛନ୍ତି ଦେଶର ବିଦେଶ ମନ୍ତ୍ରୀ ଖ୍ରୀଷ୍ଟିୟା ଫ୍ରିଲାଣ୍ଡ। ୨୦୦୭ରେ ଗଣତନ୍ତ୍ର ଉଦ୍ଘୋଷକ ତଥା ନୋବେଲ ପୁରସ୍କାର ବିଜେତା ସୁ କି’ଙ୍କୁ ଓଟାୱା ପକ୍ଷରୁ ଏହି ବିରଳ ସମ୍ମାନ ପ୍ରଦାନ କରାଯାଇଥିଲା। ଦଲାଇ ଲାମା, ନେଲସନ୍ ମାଣ୍ଡେଲା ଓ ମଲାଲା ୟୁସୁଫଯାଇଙ୍କ ସହ ୫ଜଣ ବିଶିଷ୍ଟ ବ୍ୟକ୍ତିଙ୍କୁ କାନାଡ଼ା ପକ୍ଷରୁ ସମ୍ମାନସୂଚକ ନାଗରିକତ୍ୱ ପ୍ରଦାନ କରାଯାଇଛି। ବର୍ଷକ ପୂର୍ବେ ମ୍ୟାଁମାର ସେନା ବଳପୂର୍ବକ ଦେଶରୁ ୭ଲକ୍ଷ ରୋହିଙ୍ଗ୍ୟା ମୁସଲମାନଙ୍କୁ ତଡ଼ିଦେବା ଓ ସେମାନଙ୍କ ଉପରେ ଅକଥନୀୟ ନିର୍ଯାତନା କରିବା ପରିପ୍ରେକ୍ଷୀରେ ସୁ କି’ଙ୍କ ଆନ୍ତର୍ଜାତିକ ଖ୍ୟାତିରେ ଆଞ୍ଚ ଆସିଛି। ଗୁରୁବାର ଏହି ପ୍ରସଙ୍ଗରେ ଜାତିସଂଘ ପକ୍ଷରୁ ମ୍ୟାଁମାର ସେନାଧ୍ୟକ୍ଷ ଓ ଅନ୍ୟ ୫ବରିଷ୍ଠ ସେନା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଏକ କମିଟି ଗଠନ କରାଯାଇଛି।
